Read Mousgoum Yob 42 Bible Online

Yob 42 - Mousgoum bible

Yob 42

¹Yob a wiyini seŋ wiini EPIƊ-ƊAI a muɗa:

²Mu sɗa ɓa ku na spak gara, wala n’a kiɗa a za gaiku kai aŋ kai.

³Zilbi na ku zilba ɓa: Ɗif n’a firiya hiiniŋa, gaini seŋ zi miɗi na baiya kadai ɗa, asiya ɗi ɗa? A na ɵa, mu muɗa midini wazagai n’abakai n’a suwa gdaŋŋa na mu sɗaŋ kaalai, mu sɗa ezini edi kaalai.

⁴Ku muɗa zamai pra ɓa: Mu zizina sa pɗem aŋ wus, aga ku zilbaŋa, kapai mu wuyuku seŋ ɗa.

⁵Avut par mu ɵina ɗa a labarku gaini ɵeŋ, amma tiyana ara te tuluku li.

⁶Buri nɵa n’a niyasi ma par paŋ ɗa ku tika pini kai, mu sɗa ɓa mu za meefeŋ suku, mu na sumna azumai arni alogodo gaini bono lai buri hanɗa.

⁷Asakal n’EPIƊ-ƊAI a muɗa seŋ hanɗa wiini Yob ɗa li, a miɗini wiini Elifaz na Teman par maini nɵa: M'aŋ gaini hiy suku tuku gaiɗi marmakaiku na sulu lai, buri ɓa ki miɗi mada edi gaini futini maini Yob na ɵeŋŋa nɵa kai.

⁸Tiyana ɗa ki piyi garakai muguzak gaini adumai na maɵagai muguzak lai, hili sini Yob na ɗifŋa gaini, ki zi ɓaka zi yi buriki tiki dama. Yob na ɗifŋa aga a siiwa buriki. Pini pɗem n’arba gaini ɗa, aga mu za siki pini dûûli na wiiki kai buri ki miɗi edi mada gaini futini maini Yob na ɗifŋa a zaŋ ɗa ɵa kai.

⁹Elifaz na Teman par, Bildad na Suwa par gaini Sofar na Naama par lai, e fiki e hili, e zi maini n’EPIƊ-ƊAI a muɗaŋ ɗa nɵa. EPIƊ-ƊAI a zini pɗem wiini Yob.

¹⁰EPIƊ-ƊAI a waya Yob war balamni n’avut asakalni siiwa na buriɗi marmakaini par ɗa. EPIƊ-ƊAI a wiyinisi wazagai maini n’avut ɵa ta ta sulu.

¹¹Tawalakaini na maɵagai gaiɗi na falakai, gaiɗi nagai n’e siɗiŋ ɗipar paŋ ɗa e hilisi sini, e simi gaini ahani. E tûwi gaini, e sini arai zi pi lai burini gir n’EPIƊ-ƊAI a kaŋsi midini. Ɗif paŋ a sini sulai zi arzaŋ ktai, adoŋo zi or ktai lai.

¹²EPIƊ-ƊAI a ɓaka simnini Yob ɗa, a suwa n’avut ɗa. Adumaini a za dubu doogo pi puɗu, ɵiginini dubu ɵaara, ɵaakai dubu sulu, ablehökai na falakai dubu ktai lai.

¹³A w ali na maɵagai muguzak, na falakai hu lai.

¹⁴A siɗi yiki wiiɗi n’amai ɗa ɓa Yemima, na te g'aŋ sulu ɓa Ketsia, na te g'aŋ hu ɗa ɓa: Keren-Puk.

¹⁵Midini afti paŋ, falakai na jafai maiɗi alini Yob nɵa e ɗi kai. Apiɗi a siɗi bri na wiiɗi war bulum na wiini maiɗi alini na maɵagai ɗa ɵa lai.

¹⁶Asakal hanɗa, Yob a za buza katawai miya gai doogo doogo puɗu; a tiliɗi alini, gaiɗi aliɗi alini, haa siɗi tiyakaini na ŋolo n’ag'aŋ puɗu.

¹⁷Asakal par a mra, gai zi wel takai takai, a mra sek na ɗa warni gai ɵiɗi ɵeɗ.