Read Mousgoum Yob 6 Bible Online

Yob 6 - Mousgoum bible

Yob 6

¹Nɵa Yob a tika seŋ a muɗa:

²Ayy, na ɓa ɗif a talafu gumani hûwyi n’aŋ sa ɓa ɗa, na ɓa ɗif a tikafu girŋa midini kilo ta ɗa,

³gumani ɗa aga a suwa gumani kai kai n’agoɗom war yem-ra n’abai ɗa, mu muɗa kla kadai na ɗa buri hanɗa.

⁴Buri ɓa, ɓaraw na wiini Alaw zi spak paŋ ɗa a yimaŋa, musnawni a niya sa yaw, wazagai zi mili hunai n’abai na wiini Alaw a garasi maa gar gar aŋ hitimaŋa.

⁵Ablehö na buza ɗa a tuwa ɵimani kuzum na hirnaŋ ɗi, zaw gari ɗa a tuwa Won hlai na kuzum na hûleŋ a mini sa ɗi?

⁶Wala na siimuk ɗa, manta sini kai ɗa a suma ɗi? Warni eɵe na muɗukwi ɗa, lemni a na ɗi?

⁷Wazagai hanɗa ma a daraŋ kai, mu hunvaŋsi edi, girŋa ɗa a na maini simi n’a huŋva ɗif nɵa.

⁸N'aga a zina pa ta, kapai wala na mu payaŋ ɗa mu navaŋ zek na ɗa asiya kiɗi ɗa? A juva ɓa Alaw a saŋa wala na mu na bayaŋ ɗa wiini ta kai ɗi?

⁹Alaw a saraŋa fu wiini edi gamai ɗa kai! a hinitifu tini zi spak te vadaŋafu wiiɗi edi marwai ɗa kai!

¹⁰A za fu na ɵa ɗa aga mu nava arai zi pi, koo gaini gir hanɗa tekeɗeɗi, aga mu pra amai gaini firiyi, mada aga a wula gadai na wiini Alaw na sɗik ktai maa kai.

¹¹Amma tiyana ɗa, gdaŋŋa na mu baiya gaini aŋ kir kai, na dibiŋa aga a za maini hanɗa ɵa ɗa, simni na kara ɗa, a navaŋa ɗa a maɗa?

¹²Gdaŋŋa ɗa a gdaŋ na wiini ahi-fuŋ zaw, zaw, amur-sa ɗa e rgiŋ gaini kiya ɗi?

¹³Wala ktai nɵa n’a zina pa nɵa a hina sa kai, koo n’agwi nɵa tekeɗe maa aŋ kai.

¹⁴Ɗif n’aŋ war hûyûyi ɗa, a zuva ɓa marmakaini ɗa e hiiniŋ, koo ɓa a dara a sini hormo wiini Alaw zi spak ɗa kai tekeɗeɗi.

¹⁵Marmakaya ɗa e ɓilkiŋa hiiniŋa maiɗi avai na yem warɗi kai nɵa, maini arakai na yem na warni a yima edi nɵa,

¹⁶na Won hlai na hlai na ɗarak a vada li ɗa, glas ɗa a kasi yem zi dûrgûzi warni, maaɗai zi glas ɗa ɗe a hiliyasi azumai warni sek lai, haa arakai ɗa a huŋva edi.

¹⁷Amma hlai na hlai a za li afu ɗa a hiɗika amai, futi te yima li ɗa, a hula kaŋ.

¹⁸Vokɗi ɗai n’e hili midiɗi marɗi warɗi futi waŋ ɗa, e vigi edi sini ɗaw, arɗi edi war basga sek, haa e vidi edi war basga ɗa ɵa.

¹⁹Nagai n’e hilisi war Tema par, e mili arɗi sini, na Saba par e tiki hiiniɗi midini lai.

²⁰E tiki siyer buri e hiini ɓa yem aŋ warni, Won hlai n’e cû woni ɗa, hiiniɗi a ɓulka.

²¹Tiki nɵa lai, tiyana ɗa ki nivi wala ktai kai, Won hlai na ki tili girŋa ɗa hunai a yimiki yaw.

²²Mu miɗiki ka ɓa ki siŋa katu ɗi? Zaw, mu zilbiki ka ɓa ki tipisi tiki agwi agwi kapai ki zini pa gaini,

²³ki piliŋa edi tini gawŋa par, zaw, ki ɵiŋa tini ɗif zi garmas ɗa par ki ɗi ɗi?

²⁴Siŋkiŋŋasi kapai mu ɓa ma ɗa, yimaŋasi ezini edi ara kapai mu sɗa wili na mu wula gaini ɗa!

²⁵Seŋ na jre ɗa a fuɗa sini ɗif ɗe, tiyana seŋ na ki miɗiŋ sa na ɗa, ki piyi gaini tiɓ ɗa a maɗa?

²⁶Tiyana ɗa meefeŋ na wiya ɗa a seŋ na mu muɗaŋ ɗa zaw, a miɗi na ɗif na hangalni a ɵiɓa edi tiɓ, a muɗaŋ arni smer kadai koo.

²⁷Tiki ki firiyi maa ki zi wala zi vili maiɗi ɗai e diri e siɗi epiŋgezani ahi na huyuk ɗa nɵa, kapai asakal par ki siŋa ta na marmaiki ɗa edi.

²⁸Tiyana ɗa, tiliŋasi amai ara haw ɗa, ara arki nɵa ca, mu kiɗa mu dûûliki ɗi?

²⁹Seŋ na mu muɗaŋ na ɗa a wiini ɗif na jreni aŋ kai ɗi? Ta mu sɗaŋ meefeŋ ɗa kai ɗi? Tiliŋa pɗem, mu muɗumu eles wiiɗi marmu kai, mu dara mu miɗiki ktai pra, tiliŋa pɗem, aga ki siɗi edi gaglai ɓa seŋ hanɗa meefeŋŋa warni kai.