Read Mousgoum Yob 7 Bible Online

Yob 7 - Mousgoum bible

Yob 7

¹Yob a muɗa pra, Simnini ɗif warɗi yai ɗa a na maini na wiini askar ɗa nɵa kai ɗi? Mefeŋni a na maini ɗif n’a za sda burini vrak nɵa kai ɗi?

²Maini bege n’a na paya seze nɵa, maini ɗif zi sda n’a na baiya vrakni nɵa lai,

³Ta ɗa, bulum na wiya a tile yaw na wiini gir, godai na wiya ɗa a feŋ na war gir ɗa lai:

⁴Mu fana li azumai tar ɗa, mu zilba sa ɓa: Mu faka amai na ɗa kaswa kiɗi ɗa? Hlai ɗe a sɗasi edi kir kai, mu hina waŋ aŋ bunda midini liyŋa haa gorof par.

⁵Atla a mula sa ca, amur-sa ɗa a fufuta, a ɓasa, a ka alu lai.

⁶Mefeŋŋa ɗa a vuga witaw, a suwa wala n’e dibiri e dûzi gaini ɗa, Won hlai na sogom na wiini biyi na pini ɵeɗ a vada li ɗa a ɗiyini lai.

⁷Alaw, ku hina muduku a wula kai ɓa sunfaŋa ɗa a smer kadai, ɓa ara aga a tala muluk katawai duk kir kai.

⁸Tuku na arku a naka mada ɗa, aga ku talaŋa kir kai, aga ku paya futi aŋ talaŋa, amma aga ku navaŋa kir kai.

⁹Ɗif n’a niya azumai warni hlai zi simni na wiiɗi ɗai zi mri a kiɗa a wayasi amai kai, maini ɗugul n’a bla amai, asakal par a giha edi nɵa.

¹⁰A kiɗa a wayasi aha war dalamni kir kai, hlai n’a za fuŋ woni ɗa, ɗai e siɗiŋ kir kaalai.

¹¹Nɵa ɗa, mu kiɗa mu ɓa ma kir kai, diriŋa tekeɗe mu muɗa bas, war maravaŋa kaw, mu ɵa hama bas.

¹²Ku tika ɗif ma ta ɗa aŋ giɗimaŋa ɗa, mu yem-ra n’abai zaw, mu wala n’abai ɗi?

¹³Mu fana azumai sek ɗa, mu hiina ɓa aga mu nava arai zi pi war weseŋ ɗi, girŋa ɗa aga a tika azumai agwiiya ɗi,

¹⁴amma ku halasi ku huuyaŋa gaini weseŋ zi pɵi, ku mulaŋa hunai pa gaini wazagai zi siŋki pra.

¹⁵Mu rga funa sa amai ɓak ma marya, mri pɗem pɗem sini simni zi gir hanɗa.

¹⁶Hinaŋa mak, mu hina fu ɵa gaimai zaw, sunfaŋa ma a smer meere kadai, hinaŋa gaini hangala haw.

¹⁷Ɗif murɗek ɗa ku zaŋ aŋ wala n’abai nɵa maruwa maɵa maɵa ɗa, na kapai hangalku gaini tiki sini ɵa ta,

¹⁸na kapai gorof gorof paŋ ku tala sdani paŋ, ku tetemaŋ gaini yafai kai lai ɗa maɵa maɵa ɗa?

¹⁹Kapai ku mula arku pa kir kai ɗa, kaswa ta ɗa? Aga ku hinaŋa mu rɓa teenek agwi nɵa kaswa ta ɗa?

²⁰Na ɓa mu za tuwur suku ɗa, na mu zuku ɗa a na wa ɗa? Tuku na ku mula arku piɗi ɗai gara, ku yimaŋa aŋ kaltam buri maɗa? Mu bunda buriku aŋ wala na guma nɵa buri maɗa?

²¹Ku kiɗa ku yima hi-n’amai midini gadai na wiya suku kai ɗi, ku kiɗa ku haza meefeŋ na wiya ɗa edi kai ɗi? Buri ɓa mu ŋa ta, mu waya fu na azumai arni afti, aga ku payaŋa, amma m’aŋ kir kai.