Read Mousgoum Yob 8 Bible Online

Yob 8 - Mousgoum bible

Yob 8

¹Nɵa Bildad na Suwa par a tika seŋ a miɗini wiini Yob:

²Seŋ n’aŋ tuku na ɗa, suku pini aŋ miɗiŋ ɵa haa kaswa ta ɗa? Seŋ n’a niyasi muku par maini berber na gdaŋ ɵa na ɗa, aga ku ɗiyaŋ kaswa ta ɗa?

³Ku hiina ɓa Alaw a kiɗa a bunda gadai ɗa ɗi? Zaw, Alaw zi spak paŋ ɗa a bunda wala na jre ɗa aŋ meefeŋ ɗi?

⁴Na ɓa aliku e zi wala na meefeŋ li sini ɗa, a siɗi na ɗa a vrak na pini meefeŋ lai kai ɗi;

⁵Amma na ɓa tuku, ku na paya Alaw, ku na siiwa Alaw zi spak lai,

⁶na ɓa ku na ɗikat, jre lai ɗa, nɵa aga a giɗimuku, aga a suku balamku na ku kiɗa midini ɗa.

⁷Simniku n’avut ɗa aga a tala arku maini wala na agwi kadai nɵa, na ɓa ku kataŋ gaini simniku na dawai sek ɗa.

⁸Ku zilbiɗi nagai na wuzaku par ɗa, tika hangalku sini yel n’e niviŋsi siɗi tamaiɗi par ɗa lai.

⁹Tumu ɗa, mu ɗumu na ɗibi ɗibi na, mu suɗumu wala kai, simnimu na warɗi yai ɗa a yafa kai maini seze nɵa.

¹⁰Amma nagai aga e hitruku, aga e muɗuku, pini n’a za siɗi ɗa, aga e muɗuku seŋ zi yel maini nɵa:

¹¹Taitai ɗa a diya amai gdaŋ ɗi, zaw vayai ɗa, yem pini kai ɗa a wula ɗi?

¹²Hirnaŋ ɵa waŋ, ɗif a ɵaŋ kaalai, amma a huula witaw a suwa evek na zamai ɗa paŋ.

¹³Hanɗa a wala n’aga a za siɗi nagai na midiɗi a wula gaini Alaw ɗa, bayai na pini ɵeɗ na wiiɗi ɗai na maafanai a tuura edi ɗa maini hanɗa ɵa lai,

¹⁴Wala n’a tika hiinini midini ɗa a tuura edi, simni na jam na wiini ɗa, a na maini misûɗek n’a yima amai ɗa nɵa.

¹⁵E pɵi midini dalamɗi amma a kiɗa a ɗiya amai kai, koo e zi sini ɗa a maɗi aga a kɵa bas.

¹⁶E ɗa maini luwuŋ na siyem sini viya n’a wula arni futi, n’a wa ali tini n’a pa hahakai edi midini zardeŋ ɗa,

¹⁷sirdaini a ɵawa sini marni azumai pini ali-fuŋ na gaini firi midini marni, e tili dalam n’e rgiŋ gaini ali-fuŋ ɗa, e zi suna sini.

¹⁸Amma na ɓa, a yima li edi war fuŋ n’a naka warni par ɗa, ɗai ɗa aga e miɗi ɓa: Mi siɗiŋ ka duk kai.

¹⁹Tala haw muluk na wiiɗi nagai na midiɗi a wula gaini Alaw ɗa a vada maini hanɗa nɵa, luwuŋi zamai te diya war balamni ɗa lai.

²⁰Zaw kai, Alaw a bla ɗif na jre ɗa edi kai, a zina piɗi nagai n’e zi meefeŋ kaalai.

²¹A hina agwiiya ɗa aga a va muku gaini riyi, muku aga a ɗuula ɗuwal zi firiyi lai.

²²Gawku ɗa aga e dûgûku gaini siyer, ɗai na maafanai ɗa aga e vidi edi lai.