Read Mousgoum Yob 9 Bible Online

Yob 9 - Mousgoum bible

Yob 9

¹Yob a waya seŋ a muɗa:

²A futini, mu sɗa ɓa na ku muɗaŋ na ɗa a na ɵa, ɗif murɗek ɗa, jreni na wuzani Alaw a na wata ɗa!

³Na ɓa ɗif a dara a sispa gaini ɗa, a muɗa haa dubu, a wiyini seŋ ktai ma kai.

⁴Yelni abai gara, spakni abai lai, n’a kiɗa a ɗiya mini zaw a nava seŋ kai ɗa asiya ɗa?

⁵A zogo huwaŋai edi gai habar tini kai, war hiyni, a hogoŋ azumai lai.

⁶A muguza afti war balamni, gaarakai na pini ɗa, a gigiɗa amai,

⁷a kiɗa a ɗiliti futi te diyasi amai kai, zaw, a hina meeɵek a za gaglaini kai.

⁸Hlai n’amai ɗa, a gaŋaŋ edi kiini, a hala amai midini mayaw na war yem-ra n’abai.

⁹A zizina meeɵek n’e yikiŋ ɓa: Urs, diŋis dawra pekne gaini farani meeɵek zamai na war gal n’amai sek ɗa lai.

¹⁰A za wazagai n’abakai n’a bunda ɗif hiyak, sdani na pɗamai a pɵa tini ɗif kai.

¹¹A vuga ɵima ɗaw ma mu kiɗa mu talaŋ kai, a hala ɗaw ma mu sɗa kai,

¹²Na a zini gdaŋ midini aŋ wayasi wala n’a tikaŋ gaini gdaŋ ɗa asiya ɗa? Zaw n’aga a miɗini ɓa: Ku za ɵa na ɗa a maɗi ɗa asiya ɗa?

¹³Alaw a za li hiy ɗa a waya asakal kai, wazagai na maswarai n’agoɗom pini yem: Rahab gaiɗi marni na zamai ɗa paŋ a na azumai pini.

¹⁴Na ɓa a na ɵa ɗa, mu kiɗa mu wiyini seŋ ɗa maɵa maɵa ɗa, seŋ na mu tikaŋ ma aŋ miɗiŋni tiɓ ɗa, a na wata ɗa?

¹⁵Koo ɓa meefeŋŋe aŋ kai tekeɗeɗi, mu miɗini na maɵa, mu tuwa ɗa a tuwi sini n’a zitiŋa sariya ɗa bas.

¹⁶Koo mu yikaŋ a ɵena ta kaw ɗi ɗa, mu sɗa ɓa aga a ɵina seŋ na mu miɗiŋni ɗa kai.

¹⁷Ni n’a na vadaŋa edi gaini gir n’abai, n’a na riya wurukŋa amai sek sek pini wwala ktai ta kaalai.

¹⁸A hina kaw mu suŋfa kai, a vaŋa gaini marava.

¹⁹Na ɓa a zi gdaŋ ma, gdaŋ ɗa A ni, na ɓa azi sariya ma, ɗif n’a zitiyi sariya n’arbaɗi aŋ kir kaalai.

²⁰Koo ɓa jre ɗa a wiya ma, na mu muɗaŋ ma par ɗa aga a rgaŋa, koo ɓa ta war seŋ kai kaw, meefeŋ ɗa a wiya ɵa.

²¹Mu na ɗa seŋ aŋ mada ma mu sɗa hanɗa kai, simni na kara a baza ma ta.

²²Maini na mu muɗaŋ ɗa ɵa, ɗif na tini war seŋ kai, gaini ɗif na seŋ aŋ midini ɗa a wala ktai, Alaw a vidiɗi edi sulu paŋ.

²³Na ɓa gir a cosi tizaw midiɗi ɗai, a fiɗiɗi ɗai edi lai ɗa, Alaw a riya gaini riyi piɗi nagai na tiɗi war seŋ kai n’e ɗa siɗi gir ɗa.

²⁴Na ɓa afti a sa li tini ɗai na maafanai ɗa, Alaw a digiɗi arɗi paakai n’e ɗûkliti sariya, na ɓa a zaŋ ɗa a ni kai ɗa, asiya kiɗi?

²⁵Mefeŋŋa a na lawa kokolai a sûwiɗi ɗai zi luwi ɗa, a vuga ɗa war gir ɵa.

²⁶A vuga maini hulomai n’abakai n’e ziŋ gaini vayai ɵa, maini muka n’a yorasi amai par midini wala nɵa.

²⁷Na ɓa mu hiina li ɓa mu wula mada gaini hûwyi n’aŋ sa ɗa, mu hina marava mak, mu yimiti agula lai ɗa,

²⁸girŋa n’aŋ sa ɗa paŋ a mulaŋa hunai pa, mu sɗa ɓa tuku Alaw, ku yimaŋa aŋ ɗif na tini war seŋ kai kai.

²⁹Na ɓa meefeŋ muta ɗa, mu kaya sa zamai aŋ bulaŋ buri maɗa?

³⁰Koo ɓa mu ma sa gaini zabul, koo ɓa mu ma ta gaini hum tekeɗeɗi,

³¹aga ku waŋŋa arni zilgit, koo sapa na sa ma aga mu bunda arni hi-hir.

³²Buri ɓa Alaw ɗa a ɗif maya ɵa kapai mu wiyini seŋ kai, na kapai mi hili mi ɗiyi wuzaɗi sariya miɗi maryi sa kaalai.

³³Na ɓa ɗif a nafu arbaɗi zaw, n’a kiɗa a ɓirwiyi edi siɗi maryi par ɗa mariya,

³⁴aga a caka Alaw cak a ɵiɓa kir kai, hunai na mu huna wuzani ɗe aga vada edi lai.

³⁵Nɵa mu kiɗa mu miɗini seŋ hunai pa kai, amma a na ɵa kir kai, m’an na kiya pal.