Read Mousgoum Yama na wiini David 10 Bible Online

Yama na wiini David 10 - Mousgoum bible

Yama na wiini David 10

¹EPIƊ-ƊAI, ku ɗiyasi edi gaigai ɵa buri maɗa? War mefeŋ zi gir ɗa, ku ŋoya suku buri maɗa?

²Ɗai na maafanai ɗa e ziɗi gir wiiɗi ɗai na haw ɗa gaini hiinini haw kai, e yimiɗi warni yel n’e ziŋ siɗi lai.

³Ɗif na meefeŋ hanɗa agulni t'aŋ gaini vi tini hiini na meefeŋ, a firiya burini hanɗa lai, a zini yewere wiini EPIƊ-ƊAI, a muɗa seŋ na meefeŋ sini lai, buri ɓa wala n’a zaŋ paŋ a nava paŋ.

⁴War kûlini-si na wiini, ɗif na meefeŋ ɗa zilbi ktai midini kai, a hiina ɓa Alaw spakni aŋ kai, yelni ɗa a ni nɵa ta.

⁵Ɗif hanɗa, wala n’a zaŋ paŋ ɗa a za paŋ, sariya na wiini Alaw t'aŋ gaini gaigai, a tiliɗi gawni maini wala kadai nɵa.

⁶A hiina warni ɓa: Wala ktai n’a muguzaŋa aŋ kai, wala na meefeŋ aga a za sa duk kai, ɵa haa kureɗ.

⁷Mini aŋ gaini vi gaini tusa, gaini eles gaini karai lai. Gir gaini haw aŋ midiɗi alsini.

⁸A ŋoya edi arni hlai, gobi sini fuŋ n’agogoi, a fuɗa ɗif na tini war seŋ kai ɗa war ŋoyai, a piyiɗi ɗa e ɗi nagai na ɗif n’a zina piɗi aŋ kai ɗa.

⁹A ŋoya, a cikiɗa maini gurnai n’arni luwuŋ nɵa, a cikiɗa kapai a yima ɗif na haw ɗa, a yimaŋ a sapaŋ warni azawni sek.

¹⁰A goɓo azumai, a roko, a pra midini ɗif na haw gaini spakni paŋ.

¹¹A hiina warni ɓa: Alaw midini a na wula, arni aŋ gaini bindi edi pla, a na tala wala ktai kai sam.

¹²Fakasi amai fak kai ɗi, EPIƊ-ƊAI, Alaw wiya, siŋka spakku edi ta kai ɗi, Alaw wiya! Ku hina muduku a wula gaiɗi nagai na haw ɗa kai.

¹³Ɗif na meefeŋ ɗa a miisa Alaw ɵa maɵa maɵa ɗa? A hiina warni ɓa: Alaw aga a zilba seŋ ktai maa ta kai, buri maɗa?

¹⁴Amma tuku Alaw na wiya, ku sɗa wala paŋ, ku na tiliɗi nagai n’e ɗa war gir, n’e ɗa haw lai, e ɗa war tuku, ɗif na haw ɗa a hina sini ɗa war tuku. Ɗif na huyuk ɗa, ku liwiini ɗuwal ku tuku lai.

¹⁵Ku vada spakni ɗif na meefeŋ edi vat, nɵa kapai ku paya meefeŋ n’a zaŋ ɗa, aga ku nava wala kir kai.

¹⁶EPIƊ-ƊAI a pai ɵa haa kureɗ, pinziba n’edi par ɗa e vidi edi midini aftini par vat.

¹⁷Hiini n’aŋ warɗi nagai na gulɗi gaini hûsi ɗa, tuku EPIƊ-ƊAI ku yimaŋ tiɗi, ku siɗi arai-zi-pi warɗi agulɗi, ku zaga ɵimaku miɗi lai.

¹⁸Ku siŋka jre na wiiɗi na huyokai edi gaiɗi nagai na ɗai e siɗiɗi gir arɗi lai edi, nɵa ɗif ktai na midiɗi yai n’a kiɗa a mula hunai piɗi marni aŋ kir kai.