Read Mousgoum Yama na wiini David 102 Bible Online

Yama na wiini David 102 - Mousgoum bible

Yama na wiini David 102

¹Siiwa na wiini ɗif na haw, na gai kiyi su, n’a ka tuwini wuzani EPIƊ-ƊAI

²EPIƊ-ƊAI, ɵina siiwiŋa, hina tûwiŋa na buri zinai a halaɗi haa suku ta.

³War mefeŋ na m’aŋ war gir ɗa, ku bunda arku edi sa par kai. Won hlai na mu ɗuulaɗi suku, jaga ɵimaku ma, wayaŋa seŋ witaw tar.

⁴Buri ɓa mefeŋŋa a vada na ɗa maini agiyiŋ nɵa, keɵkeŋa a ya maini morjo nɵa.

⁵Agula te siita amlai wara maini evek n’e ɗukliŋ daf, n’a siita ɗa nɵa, haa mada a wula gaini simi na mu sumuŋ ɗa.

⁶A hina sa ɗa a amur kadai dug dug, tin nuumi na mu nuuma ɗa,

⁷Mu bunda maini dram n’edi war basga na kaɗataŋ nɵa. Mu bunda maini tuktruk na war hlai zi greŋ ɗa nɵa.

⁸Mu fana kaara dam aŋ nuumi, maini wala zi ɗifli n’a sumna kiini ktai amai midini dalam nɵa.

⁹Mefeŋ paŋ, gawŋa e yivi aŋ tirkiŋa ɵa, war hiyɗi ɗa, e tuusi marɗi gaya.

¹⁰A hina ma aŋ simi ɗa a alogodo, wala na mu caŋ paŋ ɗa, aŋ gai jilni gaini tuwi n’ara.

¹¹Burini suwarku gaini hiyku ɗa, buri ɓa ku tikaŋa amai, ku bulaŋa edi gaigai suku par.

¹²Mefeŋŋa a na maini sezeni luwuŋ na siɗi futi koskoi nɵa, mu siita maini evek nɵa.

¹³Amma tuku EPIƊ-ƊAI ku na aŋ pai ɵa haa kureɗ, aga e yiki yikiku war vna vna paŋ.

¹⁴Tuku aga ku fakasi amai, aga ku hiina haw buriɗi Yeruzalem, buri ɓa, hanɗa a hlai na ku hiina haw buriɗi ɗa, sarti na gai ɗiyi ɗa a cosi li.

¹⁵Buri tiyi na ɗaiku, mi firyi ali-fuŋ na siɗi ɗa gara, koo alogodoɗi maa, hiinini haw a yimiyi burini.

¹⁶Nɵa pinzibaɗi ɗai n’edi par paŋ, aga e hûni EPIƊ-ƊAI, paakai na midini afti paŋ aga e huniti abaiku lai.

¹⁷Buri ɓa EPIƊ-ƊAI a waya a rgiti Yeruzalem amai pra, a siŋka sini edi warɗi abaini lai.

¹⁸A bundasi arni sini siiwa na wiini ɗif na haw, a yima siiwoni lai.

¹⁹A zuva ɓa seŋ hanɗa a ɗo, buriɗi pinziba n’asakal sek ɗa, kapai pinziba n’aga a rgiɗi wuzamu sek ɗa, e kûli EPIƊ-ƊAI lai

²⁰Amai war hlaini na sɗik n’amai ɗa par, EPIƊ-ƊAI a bundasi arni azumai, amai war hlai n’amai par par, a talasi arni azumai,

²¹kapai a ɵina nuumi na wiiɗi nagai n’e ɗa war daŋgai, kapai a pliɗi nagai n’e ŋi gobi min mri ɗa edi.

²²Kapai ɗai e miɗi edi midini yikini EPIƊ-ƊAI war Siyon, e miɗi midini kol n’a sa sini war Yeruzalem lai,

²³won hlai na pinzibaɗi ɗai, gaini aftiɗi paakai na ta ta ɗa paŋ, aga e diŋgi aŋ zi ɵeŋni EPIƊ-ƊAI.

²⁴A haɗaŋa gaini gdaŋ wara ta hay, a ɗiya mefŋŋa gulai zaw.

²⁵Mu muɗa: Alaw wiya, ku tikaŋa wuzani dibini mefeŋŋa kai, tuku na ku na haa hlai n’a vada kai.

²⁶Ku tikiɗi piɗi yai azumai ɗa ku tuku, haa avut par, hlai n’amai ɗa, te zaŋ te tuku lai.

²⁷Wazagai hanɗa aga a vada edi, amma tuku ku na ɵa, aga a tumsa maini sapa nɵa, aga ku juunaŋ maini sapa zi wi si nɵa, maini zamai a bundasi ezini pra pra.

²⁸Amma tuku, ku tuku ɵa, mefeŋku ɗa a zi vidi kai.

²⁹Aliɗi ɗaiku ɗa, aga e zi gaini fuŋɗi, pinzibaɗi ɗa aga e bindi gdaŋai wuzani arku.