Read Mousgoum Yama na wiini David 103 Bible Online

Yama na wiini David 103 - Mousgoum bible

Yama na wiini David 103

¹Yama na wiini David. A pɗem ɓa, mu sa kol sini EPIƊ-ƊAI, a juva ɓa wazagai na sa paŋ a sa kol sini yikini na sɗik.

²A pɗem ɓa mu sa kol sini EPIƊ-ƊAI, mada a wula gaini sda na pɗama n’a zaŋ buriya ɗa kai.

³- A suku ni burini mefeŋku paŋ ɗa a ni, a zuula veglekku paŋ ɗa a ni lai.

⁴A kurɗasi suŋfaku min waŋ par ni, a vuku amai war jre, gaini hiinini haw lai,

⁵a suku der viya war welku a ni, a hunuku ku waya agwi pra pra maini muka nɵa lai.

⁶EPIƊ-ƊAI a za sda paŋ ɗa war jre, a ɵa pini piɗi nagai na ɗai e ziɗi gir ɗa par.

⁷A siŋka hiini n’aŋ warni wiini Musus, sdakaini n’abakai wiiɗi aliɗi Izrayel lai.

⁸EPIƊ-ƊAI ɗa, hiinini ha warni gara, a faka pin seŋ tar kaalai, a luba seŋ gara, pɗemni abai lai.

⁹EPIƊ-ƊAI a hina pin meefeŋ na wiini ɗif ɵa teɓ kai, a tika seŋ warni ɵa gamai kaalai.

¹⁰A za sumu na ɗa pin tuwurmu kai, a sumu na ɗa, a vrak na buri meefeŋmu kaalai.

¹¹Pɗemni Alaw n’a zaŋ siɗi nagai n’e sini hormo ɗa, a na amai gara, maini hlai n’amai n’a na amai gaigai midini afti ɗa nɵa.

¹²A tika tuwurmu edi sumu par gaigai, maini mogoni hlai n’arbani piɗi futi na dawai par, gaini piɗi futi na koskoi ɗa nɵa.

¹³EPIƊ-ƊAI a na hiina haw buriɗi nagai n’e sini hormo maini api n’a hiina haw buriɗi alini nɵa.

¹⁴Buri ɓa ni a sɗa wala n’a zumu gaini ɗa ya, a zumu gaini logodo, a wala n’a wula midini kai.

¹⁵Suŋfani ɗif ɗa, a na maini evek nɵa, a ciifiya maini evek n’edi buza ɗa nɵa.

¹⁶Won hlai na smer a vugali midini ɗaw ɗa, aŋ kir kai, hlai n’a naka warni tiɓ ɗa, a sɗaŋ kir kaalai.

¹⁷Amma pɗem na wiini EPIƊ-ƊAI ɗa, a na haa hlai n’a vada kai par haa hlai n’a vada kai, buriɗi nagai n’e sini hormo ɗa. Ɗikatni ɗa, haa siɗi tiyakaiɗi lai.

¹⁸Buriɗi nagai n’e giɗimi bonuni, n’e hini midiɗi a kɵa gaini gadai n’a saŋ ta ta, kapai e zi pini ɗa.

¹⁹EPIƊ-ƊAI a tikiti paramaini zi pai amai war hlai n’amai, paini te ŋa midini wazagai paŋ.

²⁰Ki zi tese sini EPIƊ-ƊAI tiki na ɵeŋni, tiki zi spak gara, na ki zi pini seŋni, won hlai na ki ɵiniŋ li ɗa,

²¹Tiki ki zi tese sini EPIƊ-ƊAI, tiki wazagai zi rgi n’arbani hlai n’amai, na ki ɗa war ɵeŋni, na ki vi dirini amai.

²²Ki zi tese sini EPIƊ-ƊAI, tiki wazagai zi rgi na wiini paŋ, war hlai na Ni a ŋa midini ta ta ɗa paŋ, a zuva ɓa ta lai mu zini tese wiini EPIƊ-ƊAI.