Read Mousgoum Yama na wiini David 104 Bible Online

Yama na wiini David 104 - Mousgoum bible

Yama na wiini David 104

¹Mu dara mu sa kol sini EPIƊ-ƊAI! EPIƊ-ƊAI, Alaw na wiya, tuku k’abai gara, ku wa ŋili gaiɗi abai suku maini sapa nɵa.

²A wa gaglai ɗa sini maini kaput nɵa, a bara ɗugul sini maini sapa nɵa.

³A rga dalamni zi etaz amai midini yem amai, a za ɗugul ɗa aŋ saret.

⁴A bunda smer ɗa aŋ ɗaini zi ɵeŋ, afu n’a ya ɗa aŋ ɗifni zi sda lai.

⁵A tûûriti yai ɗa midini gaarakai na piɗi, te gigiɗa kir kai gamai gamai,

⁶Ku hina yem a yima midiɗi maini sapa nɵa, yem a hala haa amai midini huwoŋai par,

⁷won hlai na ku ɓaraŋ ɗa, a faka aŋ luwi, won hlai n’a ɵina wulaku zi ɓarai ɗa a faka a lawa gaini gdaŋni.

⁸A pra amai midini huwoŋai, a niya war hudokai, a ka war hlai na ku zizinaŋ burini ɗa,

⁹ku siŋkini hlai n’a ɗiya warni ta ɗa, kapai a wayasi a simiti yai ɗa pra kir kai.

¹⁰A hina yem zi liiwi a ka warni raakai, n’a ka arbani huwoŋai,

¹¹wazagai na buza paŋ a ca yem ɗa warni, ablehökai na basga a vada saini warni.

¹²Wazagai zi ɗifli n’arbani hlai n’amai a za gutni ɵimani gobi, a zinasi yama amai tini luwuŋ par.

¹³Amai war dalamni zi etaz par a hina faŋ a ɵaŋ midini huwoŋai, afti paŋ a va gaini sdaku na ku zaŋ ɗa.

¹⁴A hina evek a diya amai burini wazagai n’ezini puɗu puɗu, gaini luwoŋai na ɗif a paŋ, kapai a nava simini arni afti par gaini lai.

¹⁵Viŋ ɗa a sa firiyi wiiɗi ɗai, a bunda wuzani arɗi ɗa a ŋala a suwa emel, peŋ ɗa a siɗi gdaŋ lai.

¹⁶Luwuŋai na wiini EPIƊ-ƊAI maa a va gaini yem, luwuŋ Sedre na Liban na paŋ ɗa.

¹⁷Woni wala zi ɗufli a za gutni, sahaw te Sipre.

¹⁸Huwoŋai na mogokai a hlai zi simni na wiini haakai na basga, huwoŋai a hlai zi simni na wiini meneve na sini huwuŋ.

¹⁹EPIƊ-ƊAI a za tile kapai e kiti mefeŋ na wiini fet ɗa gaini, futi ɗa ɗe te sɗa sarti na te nawa woni ɗa lai.

²⁰Ku tapasi gegeŋ ɗa tan tan, te duvuk tar, wazagai na buza paŋ a barasi edi lai.

²¹Ali gurnai a nuuma aŋ paya simini, a zilba Alaw burini walani zi simi ɗa,

²²futi te yimasi li amai ɗa a waya warni waŋni, a fana azumai waŋ waŋ.

²³Ɗif a niya anene, a hala war sdani, a za sda haa koskoi.

²⁴Sda na ku zaŋ ɗa viya gara EPIƊ-ƊAI, ku za hanɗa paŋ gaini yel, afti paŋ a va gaini sda na ku zaŋ ɗa.

²⁵Tala yem-ra n’abai ɗa, a na abai, bruk lai. Wazagai na karni n’abakai gaini n’agogoi a muguza arni.

²⁶Hulamai n’abakai lai a vuga midini, gaini Leviyatan na ku rgaŋ buri ku ɵa dawaŋ gaini lai.

²⁷Wazagai hanɗa paŋ a pɵa na ɗa muduku, ɓa kapai ku sini simini war hlaini.

²⁸Tuku ku sini simi, a mulaŋ, ku mala tuku li edi ɗa a va gaini wazagai na pɗamai paŋ.

²⁹Ku bunda arku li edi sini par ɗa, hunai te yimaŋ. Ku tika suŋfani li ɗa, a mra, a waya azumai arni afti.

³⁰Na ɓa ku sini suŋfa li ɗa a waya karni pra, afti a bunda hehe pra,

³¹A zuva ɓa abai na wiini EPIƊ-ƊAI te sumna haa kureɗ, a zuva ɓa EPIƊ-ƊAI a firiya burini sda na zaŋ.

³²War hiyni, a mula arni li sini afti ɗa, a ziriya, a tikiti ahi tini li siɗi huwuŋ ɗa te ɗuguda agiyiŋ.

³³Na ɓa m’aŋ kara ɗa aga mu kola EPIƊ-ƊAI gaini yama, na ɓa mu mra kai ɗa aga mu kola EPIƊ-ƊAIÑA gaini yama.

³⁴A zuva ɓa miɗi na ma par ɗa a tala arni pɗamai, ta ɗa aga mu firiya war EPIƊ-ƊAI.

³⁵A zuva ɓa ɗai na tuwarai e vidi edi midiɗi yai ɗa par, na maafanai ɗe e hini kir kaalai. A zuva ɓa mu sa kol sini EPIƊ-ƊAI, Kûli EPIƊ-ƊAI.