Read Mousgoum Yama na wiini David 105 Bible Online

Yama na wiini David 105 - Mousgoum bible

Yama na wiini David 105

¹Kûli EPIƊ-ƊAI, miɗi edi midini yikini, siŋki sdani n’abakai edi arbaɗi ɗai,

²Zini yama burini, kûliŋ gaini wazagaiki zi zini yama, miɗi edi midini sdani zi hiila ɗa paŋ.

³Firiyi burini yikini na sɗik, ki firiyi tiki paŋ na ki ɗa piyi EPIƊ-ƊAI.

⁴Piyi EPIƊ-ƊAI, piyi spakni, ki piyiŋ kûreɗ-kûreɗ.

⁵Hini miɗiki a kɵa gaini hiila n’a zaŋ, gaini wazagai zi hiila, gaini seŋ n’a ɗiyaŋ n’a niyasi edi war mini par.

⁶Tiki na pinzibani Izrayel na ɵeŋni, tiki na pinzibani yakob zi viri n’edi.

⁷EPIƊ-ƊAI a Alaw na wiimu, a ŋa midiɗi yai paŋ ɗa a ni.

⁸Ki hini miɗiki a kɵa kureɗ gaini bonu na wiini, seŋ n’a niyasi war mini par a na buri pinziba na wuzani sek haa dubu.

⁹Bonu n’a zaŋ gaini Abraham, n’a ɗiya midini pra gaini wala zi hi-mi wiini Isak;

¹⁰a bundaŋ aŋ gadai zi ɗiyi burini Yakob, aŋ bonu n’a vada kai burini Izrayel lai.

¹¹Won hlai n’a muɗa: Aga mu suku afti na Kanaan aŋ wiiku, hanɗa a bulum n’aga a sa suku tuku gaini pinzibaku.

¹²Tiki ki ɗa viya kai, ɗif a kiɗa a pɵiki ta, vok n’agwi kadai na wiiɗi ɗai na morkokai.

¹³E zugu midini afti na ktai par midini na zamai, warɗi pai ktai par, warɗi na zamai.

¹⁴Paŋ ktai Alaw a hina ɗif aŋ siɗiɗi gir arɗi kai, a ziɗi gir wiiɗi paakai zamai zamai buriɗi.

¹⁵A muɗa: Ki tiki tiki siɗi ɗaiŋa na mu viriɗi edi kai, ki zi wala na meefeŋ siɗi ɗai na ma ɗa kaalai.

¹⁶A kasi wiyamai midini afti, a tika simi na miɗi edi.

¹⁷A ɵinaɗi ɗif ktai wuzaɗi su, Yosef n’e wiriŋ edi aŋ bege.

¹⁸E wi ezini war pokolom, e rgi jaɓ wulani.

¹⁹Haa mefeŋ yaw asakal par, mefeŋ ktai, miɗi na Yosef a muɗaŋ ɗa a va amai. Nɵa EPIƊ-ƊAI a siŋkaŋ edi ɓa a na tini war seŋ kai.

²⁰Pai a sa miɗi buri e ɵiŋ, epingezaɗi ɗai a plaŋsi edi.

²¹A tikaŋ aŋ n’abai midini damlamni, aŋ ɗif n’a ŋa midini wazagaini paŋ,

²²kapai a hitriɗi n’abakai na wiini pai maini n’a dara nɵa, a hitriɗi yel wiiɗi nagai n’e sini gadai ɗa lai.

²³Nɵa Izrayel a halasi war Egipte, Yakob a sumna aŋ ɗif zi zak midini afti na wiini Kam.

²⁴Alaw a hiniɗi ɗaini e sisiɗi gara, a bindiɗi gdaŋai e sûwiɗi gawɗi lai.

²⁵A bunda hiiniɗi gawni, e tiki piɗi aŋ bili gaw siɗi ɗaini ɗa, aŋ piyi yel siɗi lai.

²⁶A ɵina Musus na ɵeŋni, gaini Aaron n’a varaŋ lai.

²⁷E zi wazagai zi siŋki aha arbaɗi, gaini wazagai zi hiila lai midini afti na wiini Kam.

²⁸Alaw a hinasi gegeŋ, gegeŋ a hlai paŋ, ɗif ktai n’a bla edi sini seŋni aŋ kai.

²⁹A bunda yemɗi aŋ fel, a fuɗa hilif na arni edi lai.

³⁰Aftiɗi paŋ a va gaini megûze, a niya haa amlai war dalam zi feŋ na wiini pai.

³¹A sa miɗi: Abazani a luɓasi, gaini avuli lai midini aftiɗi paŋ.

³²A siɗi wutiŋ ɗa aŋ faŋ a hinasi afu n’a ya midini aftiɗi.

³³A tuura luwuŋ zi vin gaini luwuŋ Fige na wiiɗi edi, a haɗa luwoŋai na midini aftiɗi azumai.

³⁴A sa miɗi, pinzibani ayuwi a luɓasi, a pɵa kai, viya gara,

³⁵a luma evek na midini afti ɗa edi kafa, a luma seyem na wiini afti edi kafa lai.

³⁶A fiɗiɗi ali n’e wii avut na midini aftɗi paŋ edi, nagai n’e ɗi merfeŋɗi tamaiɗi, n’e tili gdaŋɗi edi gaiɗi.

³⁷A miliɗisi ɗaini edi gaini arzaŋ gaini or war tiɗi, arbaɗi pinziba paŋ ɗa ktai na ahina piɗi marni aŋ kai.

³⁸Ɗai n’Egipte e firiyi pini niyiɗi n’edi ɗa, buri hunai n’e ɗa miliŋɗi piɗi ɗa a suwa gdaŋ gara.

³⁹A gaŋa ɗugul amai midiɗi maini rido ɵa, duvuk ɗa ɗe afu a za gaglai wuzaɗi lai.

⁴⁰Pini wala n’e zilbiŋ tini ɗa, a hinasi murvai, a viɗi gaini peŋ na amai par.

⁴¹A ɓasa huwuŋ, yem a tika pini a kasi, a ka midini hlai na hûleŋ maini ra nɵa.

⁴²Buri midini a kɵa gaini ɵinini-ha na sɗik n’a zaŋ wiini Abraham na ɵeŋni.

⁴³A miliɗisi ɗaini edi war firiyi, nagai zi viri edi ɗa war ɗuwal zi firiyi.

⁴⁴Alaw a siɗi afti na wiiɗi pinziba zamai ɗa, wazagai na ɗa e ziŋ ɗa a bunda aŋ wiiɗi,

⁴⁵kapai e zi pini gadaini zi ɗiyi, e yimi gadaini zi ɗû lai. Kûli EPIƊ-ƊAI!