Read Mousgoum Yama na wiini David 106 Bible Online

Yama na wiini David 106 - Mousgoum bible

Yama na wiini David 106

¹Kûli EPIƊ-ƊAI, ki si kol sini EPIƊ-ƊAI, bri ni a pɗem, Buri pɗemni a na haa kureɗ

²N'a kiɗa a muɗa edi midini sda n’abakai na wiini EPIƊ-ƊAI ɗa asiya ɗa? N'a kiɗa a muɗa edi midini kol n’a kiɗa a sa sini paŋ ɗa asiya ɗa?

³Sleɗ aŋ midiɗi nagai n’e ɗiyi midini gadai n’Alaw a ɗiyaŋ ɗa, na kureɗ e zi paŋ war jre ɗa.

⁴EPIƊ-ƊAI, won hlai n’aga ku za pɗem siɗi ɗaiku ɗa, hiina buriya lai, won hlai n’aga ku kûrɗiɗi edi ɗa, kurɗaŋa ta lai.

⁵Hinaŋa mu tala simni na ɵeɗ na wiiɗi ɗaiiku na ku viriɗi edi ɗa, hinaŋa mu firya gaiɗi ɗaiku, mu va gaini firyi gaini bulum na wiiku lai.

⁶Tiyi mi zi tuwur maiɗi tamaiyi ɵa, mi zi meefeŋ, mi zi maiɗi ɗai na maafani ɵa lai.

⁷Tamaiyi aha war Egipte ɗa, e ɵini ezini sdaku n’abakai n’a bunda ɗif hiyak ɗa kai, midiɗi wula gaini wazagai na ku zaŋ siɗi buri pɗemku ɗa, e fiki amai suku, agoɗom wulani yem-ra n’abai, yem-ra n’abai na mekele ɗa.

⁸Amma EPIƊ-ƊAI a kurɗiɗisi edi buri pɗem na wiini yikini, kapai a siŋka spakni edi.

⁹A ɓara yem-ra n’abai na mekele, a huula amai, a vigiɗisi azumai war hulumni ɗaw, maini n’e hili war basga na kaɗataŋ nɵa;

¹⁰A kûrɗiɗi edi war tini ni n’a diriɗi kai ɗa par, a miliɗisi edi tini gawɗi par.

¹¹Yem a biɗi gawɗi, ɗif ktai ma a pra edi piɗi kai.

¹²Nɵa e yimi seŋ n’Alaw a muɗaŋ ɗa, e zini yama zi kol burini lai.

¹³Amma midiɗi a wula gaini sdani n’a zaŋ ɗa, gaini yafai kai. E biyi ɓa wala n’a hiinaŋ a va amai haw kai.

¹⁴Edi war basga na kaɗataŋ ɗa, suuna a viɗi, midini hlai na kooloŋ ɗa, e piyini mini Alaw.

¹⁵A siɗi wala n’e zilbiŋ tini ɗa, asakal par a hinasi huruf a yimiɗi.

¹⁶War kaŋɗi ɗa e zi sile sini Musus, gaini Aaron ɗif n’EPIƊ-ƊAI a varaŋ ɗa.

¹⁷Afti a mala mini edi, a rɓa Datan, a doogo midini vok na pini Abiram ɗa lai.

¹⁸Afu a tika pini vokɗi ɗai ɗi ɗa, alesni afu a yiɗi ɗai na maafanai ɗa lai.

¹⁹A Horeb, e zizini ahi ɵeŋ ktai, e hûrgi azumai wuzani alaw zi rgi na gaini kawai n’e hiliyiŋ.

²⁰Alaw n’a kol na wiiɗi ɗa, e bindiŋ aŋ wala n’a siɗa maini ahi ɵeŋ n’a suma ɗa a kuzum kadai nɵa.

²¹Midiɗi a wula gaini Alaw, ni n’a kurɗiɗisi edi, n’a za wazagai n’abakai aha war Egipte ɗa.

²²N'a za wazagai n’a bunda ɗif hiyak midini afti na wiini Kam, n’a za sda zi mili hunai pini ɗif agoɗom war yem-ra n’abai na mekele.

²³A firya a vidiɗi edi, amma Musus, ɗifni n’a varaŋ ɗa, a haa a ɗiya mini zaw, kapai a ɵaɗa hiyni n’abai ɗa azumai, a vidiɗi edi kir kai.

²⁴E hini afti na pɗem edi mak, e yimi seŋni n’a muɗaŋ ɗa kaalai.

²⁵E ŋuriyi amlai war gumuɗi ɗa, e ɵini mini EPIƊ-ƊAI kai

²⁶A yima tini amai, a ha wala mini, buri a fiɗiɗi edi, edi war basga na kaɗataŋ.

²⁷Buri a fiɗiɗi pinzibaɗi edi arbaɗi ɗai, a ɵiriɗi edi midini afti zamai zamai.

²⁸E tipi gaini Baal Peor, e simi ɓaka n’e ziŋ buriɗi zi mri ɗa.

²⁹E ɓilkini agulni Alaw gaini sdaɗi na meefeŋ ɗa, wala na meefeŋ ktai a niyasi arbaɗi.

³⁰Pinehas a faka amai a zizina seŋ hanɗa, meefeŋ ni ɗa a ɗiya ta lai.

³¹Sda hanɗa a pɵa burini aŋ sda na jre, war vna vna paŋ ɵa haa kureɗ.

³²E bindi Alaw hiy ɵimani yem na Meriba, haa Musus a nava seŋ buriɗi.

³³Buri e pi sini hiinini, haa a muɗa seŋ gaini hiini na hulum kai.

³⁴E vidiɗi ɗai, n’EPIƊ-ƊAI a miɗiɗi gaiɗi edi kai.

³⁵E ɵihiɗi gaiɗi, e yimi sdaɗi lai.

³⁶E zi pini alawai na wiiɗi, a bunda buriɗi aŋ azaw.

³⁷E zi ɓaka wiini matai, gaiɗi aliɗi na maɵagai gaiɗi na falakai.

³⁸E mi felɗi ɗai na tiɗi war seŋ kai ɗa edi, felɗ aliɗi na maɵagai gaiɗi na falakai, n’e zi ɓaka gaini wiiɗi alawai na wiiɗi kananiyakai, afti a bunda hi-hir burini fel hanɗa.

³⁹E bind siɗi haharai gaini sdaɗi ɗa, E bindi siɗi maiɗi zawarai ɵa, gaini sdaɗi n’e ziŋ ɗa lai.

⁴⁰Nɵa EPIƊ-ƊAI a za hiy siɗi ɗaini, a tala bulmni ɗa maini wala na hi-hir nɵa.

⁴¹A siɗi war tiɗi ɗai zamai, nagai n’e diriɗi kai ɗa, e ŋi midiɗi.

⁴²Gawɗi e ziɗi gir, e tikiɗi siyer lai.

⁴³A piliɗisi ka edi azi viya, amma hiini zi hriŋ n’a rga warɗi ɗa, e zi meefeŋ wuzaɗi sek.

⁴⁴Won hlai n’a ɵina tuwiɗi, a tala girɗi ɗa,

⁴⁵pin bonu n’a zaŋ gaiɗi ɗa, midini a kɵa gaiɗi, pin pɗem na wiini ɗa, hiinini haw a yimaŋ buriɗi lai.

⁴⁶A wa hiinini haw, warɗi nagai n’e miliɗi aŋ bagakai ɗa paŋ.

⁴⁷Kurɗiyi kruɗ kai ɗi, EPIƊ-ƊAI, Alaw na wiyi, tipiyisi aha, edi arbaɗi pinzibaɗi ɗai par, kapai mi kûli yikiku na sɗik, kapai tiyi mi firyi won hlai na mi ɗa suku kol.

⁴⁸Kol sin EPIƊ-ƊAI, Alaw na wiiɗi Izrayel, won hlai n’a vada kai par, haa hlai n’a vada kai, a zuva ɓa, ɗai aŋ e miɗi ɓa: A zila ɗa ɵa, kûli EPIƊ-ƊAI