Read Mousgoum Yama na wiini David 107 Bible Online

Yama na wiini David 107 - Mousgoum bible

Yama na wiini David 107

¹Ki si kol sini EPIƊ-ƊAI, buri Ni a pɗem, buri pɗemni a na haa kureɗ.

²Nagai n’EPIƊ-ƊAI a piliɗisi edi ɗa, e miɗi hanɗa, nagai n’a miliɗisi tiɗi gawɗi par ɗa.

³N'a tipiɗisi edi midini afti zamai zamai par, na piɗi futi na dawai par, na piɗi futi koskoi par, na war gal n’azumai par gaiɗi n’amai par lai.

⁴Zamai arbaɗi e ɗifu yaw aŋ giliŋi edi war basga na kaɗataŋ, midini hlai na kooloŋ, e nivi futi n’a kiɗi aha warni fuŋ n’abai n’e kiɗi e simni warni kai.

⁵E siɗi gir tiɗi wiyamai gaiɗi sai, gdaŋɗi a vada edi.

⁶War girɗi e ɗûûli EPIƊ-ƊAI, a piliɗi edi war huwuyiɗi par.

⁷A ɵa wuzaɗi warɗi futi na ɗikat, kapai a kiɗi aŋ simni aha war fuŋ n’abai.

⁸A zuva ɓa e kûli EPIƊ-ƊAI burini pɗemni, gaini sdani n’abakai n’a bunda ɗif hiyak n’a zaŋ buriɗi ɗai,

⁹nagai a sai te ziɗi ɗa a siɗi yem aŋ ci, na wiyamai te ziɗi ɗa a viɗi gaini wazagai na pɗamai lai.

¹⁰Zamai e ɗifu war gegeŋ pini sezeni mri, warɗi daŋgai na wiini haw gaini nigi war jaɓ,

¹¹buri e diri e yimi gadai na wiini Alaw kai, e yimi miɗi na wiini Alaw n’Amai ɗa maini wala kadai nɵa.

¹²A haɗasi agulɗi azumai gaini gir, e yiki azumai, ɗif ktai n’a zina piɗi aŋ kai.

¹³War girɗi e ɗûûli EPIƊ-ƊAI, a piliɗi edi war huwiyiɗi par,

¹⁴a miliɗisi edi war gegeŋ gaini sezeni mri par, a rawa jaɓ n’eziɗi edi.

¹⁵A zuva ɓa e kûli EPIƊ-ƊAI burini pɗemni, gaini sdani n’abakai n’a bunda ɗif hiyak.

¹⁶A kukuɗa porte n’e ziziniŋ gaini kawai zi kiya ɗa, a haɗa kawai n’e ɵi mini gaini lai.

¹⁷Zamai ɗa e ki siɗi mini gir, pini fiiɗi n’amai gaini meefeŋɗi ɗa.

¹⁸Simi paŋ ɗa a bunda arɗi maini wala na hi-hir ɵa, e ɗifu gobi mini mri.

¹⁹War girɗi e ɗuulu EPIƊ-ƊAI, a piliɗi edi war huwiyiɗi par.

²⁰A ɵiniɗi seŋni a zuuliɗi, a piliɗi edi war hufiɗi paŋ par.

²¹A zuɓa e kûli EPIƊ-ƊAI burini pɗemni, gaini sdani n’abakai n’a bunda ɗif hiyak.

²²A zuva ɓa e zi ɓaka zi zini tese, e miɗi edi midini sdani gaini yama zi firiyi.

²³Nagai n’e hili agoɗom ɗaw gaini hulamai n’abakai, n’e zi sakalaɗi agoɗom war yem-ra n’abakai ɗa,

²⁴nagai e tili sda na wiini EPIƊ-ƊAI, gaini sdani n’abakai n’a bunda ɗif hiyak n’a zaŋ azumai war hulumni yem-ra n’abakai lai.

²⁵A sa miɗi, a hinasi berber, berber a fakasi mayaw amai.

²⁶Mayaw a kiɗi amai, a wiyiɗisi azumai, gdaŋɗi paŋ a vada edi war gir hanɗa.

²⁷Arɗi a tika pini a wûliɗi, e bindi e kɵiŋi maiɗi ɗai na gaini ciini ca nɵa. Yelɗi paŋ a vada edi.

²⁸War girɗi e ɗûûli EPIƊ-ƊAI, a piliɗi edi war huwiyiɗi par,

²⁹A ɗiya berber ɗa a tikaŋ azumai, mayawa tika azumai lai

³⁰Efiriyi buri hlai n’a tika azumai, a kiɗi war hlai n’e hili woni lai.

³¹A zuva ɓa e kûli EPIƊ-ƊAI burini pɗemni gaini sdani n’abakai n’a bunda ɗif hiyak.

³²A zuva ɓa e kûliŋ war diŋgi na wiiɗi ɗai, e kûliŋ gaini yama war diŋgi na wiiɗi n’abakai n’arbaɗi ɗai lai.

³³A bunda raakai aŋ basga na kaɗataŋ, hlai zi liiwi yem ɗa aŋ afti na kooloŋ lai.

³⁴A bunda afti z'alam, aŋ afti n’a za seyem kai. Buri meefeŋ na ɗai na warni e ziŋ ɗa.

³⁵A bunda basga na kaɗataŋ aŋ bal, afti na kooloŋ ɗa aŋ hlai zi liiwi yem lai.

³⁶A miliɗi nagai na wiyamai te ziziɗi ɗa woni, nagai e zi fuŋ n’abai e simni woni lai.

³⁷E bili seyem war vuwaiɗi, e pi luwoŋai zi vin, e hiɗi seyem viya lai.

³⁸A ɓikiɗi, e bindi viya, farani faraiɗi ɗa a faya kaalai.

³⁹Zamai ɗa e fiyi fai, e kiɗi e ɗiyi amai cir kai, tini gir na e niviŋ gaini gir n’a na za siɗi lai.

⁴⁰A hinasi miisi midiɗi n’abakai zi ɵi wuze, a hiniɗi aŋ giliŋ edi war basga na kaɗataŋ na futi warni kai.

⁴¹Amma na murgakai a yimiɗi amai war gir par, a bunda pini zibaɗi viya maini farani farai nɵa.

⁴²Ɗai n’agulɗi hilu ɗa e tili hanɗa e firiyi, amma nagai n’agulɗi meefeŋ ɗa, miɗi a doogo.

⁴³A zuva ɓa ɗif na yel ɗa a tika hangalni sini wazagai hanɗa, a sɗa pɗem na wiini Alaw ɗa lai.