Read Mousgoum Yama na wiini David 119 Bible Online

Yama na wiini David 119 - Mousgoum bible

Yama na wiini David 119

¹Sleɗ midiɗi nagai n’e ɗa ɗikat war payaiɗi; n’e zi pini gadai na wiini EPIƊ-ƊAI.

²Sleɗ midiɗi nagai n’e yimi gadaini zi ɗiyi, n’e piyiŋ gaiɗi agulɗi paŋ.

³E zi wala na warɗi futini kai ɗa kai zaŋ, e zi ɗa a diri na wiini.

⁴Ku ɗiya gadaiku zaw zaw, kapai e zi pini gaini futini.

⁵Paiaiŋa a nafu gaini futini ɗa, aga mu za pini gadaiku zi ɗiyi ɗa.

⁶Nɵa Won hlai n’aga mu tala gadaiku ɗa, siyer aga a yimaŋa kai.

⁷Aga mu sa kol suku gaiɗi agul na ɗikat, mu hitra gadaini jre ɗikat na wiiku lai.

⁸Mu dara mu za pini gadai zi ɗiyi na wiiku ɗa, hinaŋa edi gamai kai.

⁹Gawla aga a paya payai na hilu maɵa maɵa ɗa? Sai won hlai n’a za pini seŋku.

¹⁰Mu piyuku na gaiɗi agula paŋ, hinaŋa mu zaga edi sini gadaiku par kai.

¹¹Mu giɗima seŋku amlai warɗi agula, kapai mu za tuwur suku kai.

¹²Kol suku EPIƊ-ƊAI, hitraŋa gadaiku zi ɗiyi.

¹³Gaini ma mu pɵa gadai zi ɗiyi, n’a niyasi muku par paŋ.

¹⁴Zi na pini gadaiku zi ɗiyi ɗa a saŋa firiyi gara, maini na ɓa der na midiɗi yai paŋ ɗa a wiya ɵa.

¹⁵Mu hiina midini gadaiku n’aŋ gaini ɗiyi zaw zaw ɗa, futiku paŋ ɗa aŋ wuzani ara.

¹⁶Gadai zi ɗiyi na wiiku ɗa a saŋ firiyi gara, mada a wula gaini seŋku ɗa kai.

¹⁷Zaŋa pɗem wiya ta na ɗifku ta, kapai mu sumna kara, kapai mu za pini seŋku ɗa lai.

¹⁸Mala ara edi, kapai mu tala pɗemni gadaiku zi ɗiyi ɗa.

¹⁹Mu ɗif zi zak warɗi, ŋoya gadaiku wuza kai.

²⁰Sunaŋa na pini siɗini gadaiku ɗa, a n’a vadaŋa gdaŋŋa edi mefeŋ paŋ.

²¹Ku faka amai siɗi nagai n’e kûli siɗi, na gaini tûsi, n’e zigi edi gaigai sini gadaiku par ɗa.

²²Tika tirki gaini miisi edi mada par ɗaw, buri mu za na ɗa pini gadai zi ɗiyi na wiiku.

²³Koo ɓa n’abakai e simni azumai aŋ kiti miɗi mada tekeɗeɗi ɗa, mu hiina midini gadai zi ɗiyi na wiiku.

²⁴Gadai zi ɗiyi na wiiku ɗa a saŋa firiyi gara, mu nava gadai na pɗem warni par.

²⁵M'an na azumai arni alogodo ɵa dam, ku bundaŋa kara pini seŋku.

²⁶Mu vurnuku na sa paŋ, tuku ku ɵina tûwiŋa lai, hitaŋa gadaiku zi ɗiyi ɗa.

²⁷Siŋkitiŋa futi na te ka sini gadaiku zi ɗiyi ɗa, kapai mu hiina midini sdaku n’abakai n’a bunda ɗif hiyak ɗa.

²⁸Mu tuwa na ɗa tini gir, yimaŋa pini seŋku.

²⁹Hinaŋa warɗi futi z'eles ɗa kai, za yumku sa kapai mu za pini gadaiku zi ɗû ɗa.

³⁰Mu viriti futi na wiini jre na wiiku, mu dara mu za maini na gadaiku a ɗiya nɵa.

³¹Mu naga sa sini gadaiku zi ɗiyi, EPIƊ-ƊAI, hinaŋa mu tuka siyer kai.

³²Mu lawa warɗi futi na wiini gadaiku ɗa, buri ku malaŋa hiiniŋa edi mal.

³³EPIƊ-ƊAI, hitraŋa futini gadaiku zi ɗiyi ɗa, kapai mu yimaŋ warɗi agula haa sini dibiŋa.

³⁴Saŋa siɗi kapai mu yima gadaiku zi ɗû ɗa, mu za pini gaiɗi agula paŋ lai.

³⁵Sla wuza warɗi futi na wiini gadaiku ɗa, buri a saŋa firiyi gara.

³⁶Bundaŋa hiiniŋa sini gadaiku zi ɗiyi sek, ku hinaŋ a naga sini piyini der ɗa kai.

³⁷Bundaŋa ara ɗa edi sini wazagai na nafani aŋ kai ɗa par, hinaŋa mu paya warɗi futiku.

³⁸Na ku muɗaŋ ɗa, vaŋ amai sa ta na ɵeŋku, vaŋ amai siɗi nagai n’e suku hormo ɗa.

³⁹Tirki n’a na mulaŋa hunai pa na ɗa, ku sini mini edi sa par ta, buri gadaiku zi ɗiyi ɗa a pɗemai.

⁴⁰Sunaŋa ɓa sai mu za pini gadaiku n’aŋ gaini ɗiyi ta ta ɗa, Hinaŋa mu paya war jre na wiiku,

⁴¹EPIƊ-ƊAI, za pɗemku sa ta, kurɗaŋa edi kruɗ lai maini na ku muɗaŋ ɗa nɵa.

⁴²Nɵa aga mu wiyini seŋ wiini ni n’a tirkaŋa ɗa, buri mu ɗiya ɗa midini seŋku.

⁴³Ku tika seŋku na jre edi war ma par kai, buri mu yima ɓa sariya na wiiku aga a za.

⁴⁴Aga mu za pini gadai zi ɗû na wiiku mefeŋ paŋ, kureɗ haa hlai n’a vada kai.

⁴⁵Aga mu paya mada su, buri mu paya aŋ sɗa ezini gadaiku n’aŋ gaini ɗiyi zaw zaw.

⁴⁶Aga mu muɗa edi midini gadaiku zi ɗûwuzaɗi paakai, aga mu za siyer kai.

⁴⁷Gadai na wiiku ɗa mu zaŋ aŋ wala n’a saŋa firiyi gara, mu daraŋ lai.

⁴⁸Mu yima ta amai pini gadaiku na mu firiyaŋ gara ɗa, mu dara mu hiina midini gadaiku zi ɗiyi lai.

⁴⁹Hina muduku a kɵa gaini seŋ na ku muɗaŋ buriya ɗa, buri ku hogoŋa ta na ɗifku aŋ baiya pini ɵeɗ.

⁵⁰Hanɗa a arai zi pi na wiya na war girŋa: seŋku na ku muɗaŋ a saŋa gdaŋ aŋ sumna kara.

⁵¹Ɗai n’e kûli siɗi ɗa e ziŋa yewere gaini zi, amma ta ɗa mu zaga edi sini gadaiku zi ɗû par kai.

⁵²Mada a kɵa gaini sariyaku na ku zaŋsi ɗipar ɗa, mu nava arai zi pi war hanɗa, EPIƊ-ƊAI.

⁵³Nagai na maafanai n’e hini gadaiku edi ɗa, wara a lumaŋa siɗi,

⁵⁴Gadai zi ɗiyi na wiiku ɗa mu za yama gaini, edi midini afti na mu na edi warni aŋ zak ɗa.

⁵⁵Duvuk ɗa, mu yika ma ɗa a yukuku EPIƊ-ƊAI, mu za ɗa pini gadaiku zi ɗû lai.

⁵⁶Hanɗa a wala na mu kiɗa mu zaŋ, buri mu yima gadaiu n’aŋ gaini ɗiyi zaw zaw ɗa.

⁵⁷Mu muɗaŋ gaini ma ɓa: Buri na wiya, a zi na mu za pini seŋku.

⁵⁸Mu paya futi gaiɗi agula paŋ aŋ ɵiɗi tuku agulku azumai, za yumku sa ta, pini na ku muɗaŋ ɗa.

⁵⁹Mu hiina midini payaiŋa haa, mu wayasi aza sini gadai zi ɗiyi na wiiku.

⁶⁰Mu na purma mu dara mu yima aza kai, aŋ za pini gadaiku.

⁶¹Azaw na wiiɗi na maafanai a gunaŋa azumai gun, amma mada a wula gaini gadai zi ɗû na wiiku kai;

⁶²Duvuk n’arba, mu faka amai, mu kuluku gaini yama; Buri sariyaku na ku zaŋ war jre.

⁶³Mu paya ɗa gaiɗi nagai n’e suku hormo, gaiɗi nagai n’e zi pini gadaiku n’aŋ gaini ɗiyi zaw zaw ɗa.

⁶⁴EPIƊ-ƊAI, pɗemku ɗa a viti yai ɗa ta, hitraŋa gadaiku zi ɗiyi ɗa.

⁶⁵EPIƊ-ƊAI, ku zaŋa pɗem wiya ta na ɗifku ɗa pini seŋ na wiiku,

⁶⁶Hitraŋa aŋ za ɓraw arbani pɗem gaini meefeŋ aŋ sɗa ezini wazagai lai, buri ɓa mu ɗiya yimiŋa ɗa midini gadaiku.

⁶⁷Won hlai na gir a za sa kai ɓa ɗa, mu nafu warni wili n’edi, amma tiyana ɗa, mu za ɗa pini seŋku na ku muɗaŋ ɗa.

⁶⁸Tuku ku pɗem, ku za pɗem siɗi ɗai lai, hitraŋa gadaiku zi ɗiyi ɗa,

⁶⁹ɗai n’e kûli siɗi ɗa, e didiɓiŋa gaini elesɗi ɗa, amma ta mu yima gadaiku zi ɗiyi ɗa gaiɗi agula paŋ.

⁷⁰Agulɗi te cika warɗi maini emel na gdaŋ nɵa, amma ta ɗa, gadai zi ɗû na wiiku mu zaŋ aŋ wala n’a saŋa wala gara ta.

⁷¹A pɗem ɓa mu nava gir, kapai mu hitra gadaiku zi ɗiyi ɗa;

⁷²Buriya, gadai zi ɗû n’a niyasi war muku par ɗa, a suwa wazagai zi or gaini zi arzaŋ na dubu dubu.

⁷³Tuku te rgaŋa, te zaŋa aŋ ɗif lai, saŋa siɗi kapai mu hitra gadaiku ɗa.

⁷⁴Nagai n’e suku hormo ɗa, e tiliŋa li ɗa, e firiyi gara, buri mu baya na ɗa a seŋku na ku muɗaŋ na ɗa.

⁷⁵EPIƊ-ƊAI, mu sɗa ɓa sariyaku na ku zaŋ na ɗa a jre, ku tikaŋa gir mada na ɗa buri tuku ku bunda kai.

⁷⁶Za barka, ku hina pɗemku ɗa a saŋa arai-zi-pi, pini miɗi na ku muɗaŋa wiya ta na ɗifku ɗa.

⁷⁷Ku za yumku sa, kapai mu sumna kara, buri gadai zi ɗû na wiiku a saŋa firiyi gara.

⁷⁸Ɗai n’e kûli siɗi, n’e ɗa ziŋa gir kadai meere na ɗa, hina siyer a yimiɗi, amma ta ɗa, mu hiina midini gadaku n’aŋ gaini ɗiyi zaw zaw ɗa.

⁷⁹Nagai n’e suku hormo, gaiɗi nagai n’e siɗi gadaiku zi ɗiyi ɗa, e wiyisi sa.

⁸⁰A zuva ɓa, mu ɗiya midini gadaiku zi ɗiyi ɗa war jre, kapai siyer a yimaŋa kai.

⁸¹Mu na kaya tini bayai na mu baya kûrɗi na wiiku ɗa, amma mu baya na ɗa pini seŋku na ku muɗaŋ na ɗa.

⁸²Ara a kaya ca tini bayai na pini seŋku na ku muɗaŋ ɗa, mu muɗa: aga mu saŋa arai-zi-pi ɗa kaswata ɗa?

⁸³Koo ɓa mu bunda maini kene kene n’e huliŋ amai midini afu nɵa tekeɗeɗi, mada a wula gaini gadai zi ɗiyi na wiiku kai.

⁸⁴Mefeŋŋa ɗa a hina maɵa ta ɗa? Aga ku ziɗi sariya wiiɗi nagai n’e ziŋa gir ɗa kaswa ta ɗa?

⁸⁵Ɗai n’e kûli siɗi e ɓili waŋ wuza, pini gadai zi ɗû na wiiku a za nɵa kai.

⁸⁶Gadaiku paŋ ɗa a jre, e ziŋa gir na ɗa kadai meere, zina pa ta.

⁸⁷Agwi kai ɗa e fiɗiŋa na ɗa a fiɗi, amma ta ɗa, mu hina gadaiku n’aŋ gaini ɗiyi zaw zaw ɗa edi kai.

⁸⁸Hina mu sumna kara pini pɗemku, kapai mu za pini gadai zi ɗiyi n’a niyasi edi war muku par ɗa.

⁸⁹EPIƊ-ƊAI, seŋku ɗa a na war hlai n’amai, ɵa haa kureɗ.

⁹⁰Haa hlai n’a vada kai, n’a vada kai pɗemku a sini ɵa, ku rgiti yai, ku ɗiyiti gdeŋi, te na ɵa haa girŋa lai;

⁹¹Wazagai n’a na girna paŋ ɗa, a na na ɗa pini gadaiku zi ɗiyi ɗa, buri ɓa paŋ a za ɵeŋ na wiiku.

⁹²Na ɓa gadaiku zi ɗû ɗa a saŋa fu firiyi gara kai ɗa, a na ta ɗa war girŋa mu mra li su.

⁹³Mada aga a wula gaini gadaiku n’aŋ gaini ɗiyi zaw zaw ɗa kai zaŋ, tuku ku hinaŋa aŋ sumna kara na ɗa gaini.

⁹⁴Ta mu wiiku, kurɗaŋa kruɗ, buri mu paya na ɗa a gadaiku n’aŋ gaini ɗiyi zaw zaw ɗa.

⁹⁵Ɗai na maafaŋai e ɗa piyi aŋ fiɗiŋa edi, amma ta mu tika hangalasini gadaiku zi ɗiyi ɗa.

⁹⁶Wala paŋ n’aŋ gaini vi amai war pɗem ɗa, mefeŋni a na, amma gadai na wiiku ɗa dibini aŋ kai.

⁹⁷Gadaiku zi ɗû ɗa, mu dara gara, mu hiina midini mefeŋ mefeŋ paŋ.

⁹⁸Gadai na wiiku ɗa a bundaŋa yel, mu siiwiɗi gawŋa ɗa buri mu ɓurwa gaini kai.

⁹⁹Hiiniŋa ɗa a suwa na wiiɗi nagai n’e hitrŋa ɗa, buri mu na hiina hulum midini gadaiku zi ɗiyi ɗa;

¹⁰⁰Siɗiŋa a sûwiɗi na walakai ɗa, buri mu yima gadaiku n’aŋ gaini ɗiyi zaw zaw ɗa.

¹⁰¹Futi na wiini meefeŋ ɗa, mu tika aza warɗi kai, buri mu na za pin gadaiku n’aŋ gai ɗiyi zaw zaw ɗa.

¹⁰²Mu jaga edi sin gadaiku zi ɗiyi par kai, buri ku hitraŋa gadai hanɗa ku tuku.

¹⁰³Seŋku ɗa aŋ war ma nem, nemni ɗa a suwa emel n’ami ɗa;

¹⁰⁴Gaini gadaiku zi ɗiyi ɗa, mu za yel ta, futi z'ales paŋ mu firyaŋ kai.

¹⁰⁵Seŋku a lampa n’aza, a gaglai na woɗi futiŋa lai.

¹⁰⁶Jre jaŋ, aga mu pla ma kai, aga mu za pin gadaiku zi ɗiyi na jre ɗa.

¹⁰⁷Mu sɗa gir viya gara: EPIƊ-ƊAI, hinaŋa mu sumna kara pin seŋku ɗa,

¹⁰⁸Za barka EPIƊ-ƊAI, yima siiwa n’a niyaɗi war ma par paŋ, hitraŋa gadaiku zi ɗiyi ɗa.

¹⁰⁹M'an na kureɗ min mri, amma mada a wula gaini gadaiku zi ɗû kai.

¹¹⁰Na maafanai e gini azaw azumai wuza, amma gai hanɗa paŋ ɗa, mu jaga edi sin gadaiku zi ɗiyi par kai.

¹¹¹Gadaiku zi ɗiyi ɗa, a godaiŋa n’a na haa kureɗ, a firyi na warɗi agula lai.

¹¹²Mu fuɗa was mefeŋ paŋ aŋ za pin gadai zi ɗiyi na wiiku, ɵa kureɗ, haa sin dibini suŋfaŋa.

¹¹³Nagai n’e si siɗi aŋ wiiku gaini agulɗi paŋ kai ɗa, mu diriɗi kai, amma mu dara ɗa a gadaiku zi ɗû ɗa.

¹¹⁴Tuku ku halaiŋa zi ŋoyai, ku gamar na wiya lai; mu baya na ɗa pin seŋku na ku muɗaŋ ɗa.

¹¹⁵Yimi siki edi sa par, tiki na maafanai, hiniŋa mu za pin gadai na wiini Alaw na wiya.

¹¹⁶Zina pa ta, pin miɗi na ku muɗaŋ ɗa, kapai mu sumna kara, hinaŋa mu baya haa, mu tika siyer kadai meere kai.

¹¹⁷Zina pa ta, kapai mu kurɗa, kapai mu mula ara sini gadai zi ɗiyi na wiiku ɗa;

¹¹⁸Ku birgiɗi nagai n’e hini gadaiku zi ɗiyi edi ɗa edi, buri ɓa rhai na wiiɗi ɗa a eles meere.

¹¹⁹Ɗai na maafanai na midini afti ɗa, ku vidiɗi edi maini fotorok n’e pukiŋ edi nɵa, mu dara gadai zi ɗiyi na wiiku na ɗa buri hanɗa;

¹²⁰Hunai na mu hunuku ɗa, a fakaŋa ayir na sa ɗa amai, mu huna sariya na ku zaŋ ɗa lai.

¹²¹Mu za paŋ maini n’a na ɗa ɵa, war jre lai, ku hinaŋa war tiɗi nagai n’e ziŋa gir ɗa kai;

¹²²Sla puku gaya ta na ɗifku su, kapai sdaŋa paŋ a za pɗem, hiniɗi nagai n’e kûli siɗi ɗa, e ziŋa gir mada kai.

¹²³Ara a kaya ca, tin bayai na mu baya kûrɗi na ku kurɗaŋa, gaini miɗi n’a muɗa edi midini jre ɗikat na wiiku lai.

¹²⁴Za sa ta na ɗifku pin pɗemku, hitraŋa gadaiku zi ɗiyi lai.

¹²⁵Ta mu ɗifku: Saŋa siɗi, kapai mu sɗa gadaiku zi ɗiyi ɗa.

¹²⁶Sarti n’EPIƊ-ƊAI a fakasi amai woni aŋ za wala ɗa a cosi li, buri ɓa ɗai e ɗa zi pin gada zi ɗû na wiiku kir kai.

¹²⁷Buri nɵa, mu dara gadaiku, a suwa or, a suwa or na gai futini paŋ.

¹²⁸Buri nɵa, gadaiku zi ɗiyi paŋ a tala ara ɗa ɗikat, furi z'ales ɗa, mu firyiti kai.

¹²⁹Gadaiku zi ɗiyi ɗa a wala na juf gara, mu za pini na ɗa buri hanɗa.

¹³⁰Ɗif na seŋku a siŋka li edi wuzani arni ɗa a nava gaglai, nagai na gai niyi kai ɗa, e nivi yel warni par lai.

¹³¹Mu mala ma amai, sai aŋ ma, burini suunaŋa aŋ pini gadaiku gara.

¹³²Bundasi arku sa, za yumku sa, maini na ku na zaŋ siɗi nagai n’e diriku ɗa nɵa.

¹³³Ku saŋa gdaŋ aŋ ɗiya warni seŋku na ku muɗaŋ ɗa, ku hina meefeŋ ktai kaw a ŋa mada kai.

¹³⁴Plaŋa edi mini gir na tiɗi ɗai par, kapai mu za pini gadaiku n’aŋ gaini ɗiyi zaw zaw ɗa.

¹³⁵Za pɗem sa ta na ɗifku ɗa, hitraŋa gadaiku zi ɗiyi ɗa.

¹³⁶Tuwi ɗa a ka ara par maini yem zi ki nɵa, buri ɓa ɗai e zi pini gadaiku zi ɗiyi kai.

¹³⁷EPIƊ-ƊAI, tuku ku jre, seŋku na ku ɗiyaŋ paŋ ɗa a na ɗikat.

¹³⁸Tuku ku ɗiya gadaiku zi ɗiyi ɗa war ɗikat, war jre lai.

¹³⁹Waŋ hlai na mu tiliɗi gawŋa midiɗi a wula gaini seŋku ɗa, diri na mu duruku ɗa a fuɗa sa gara.

¹⁴⁰Seŋku ɗa a na hilu gara, ta ɗifku ɗa mu daraŋ.

¹⁴¹M'aŋ gaini hûgi ya haa, hiinini ɗif mada kai, amma mada a wula gaini gadai n’aŋ gaini ɗiyi zaw zaw ɗa kai.

¹⁴²Jire ɗikat na wiiku ɗa a jre ɗikat ɵa haa kureɗ, gadaiku zi ɗû ɗe a jre lai.

¹⁴³Gir gaini hunai a yimaŋa, amma gadaiku ɗa a saŋa firiyi n’abai.

¹⁴⁴Gadaiku zi ɗiyi ɗa a jre ɵa haa kureɗ, hinaŋa mu ɵina ezini edi kapai mu sumna kara.

¹⁴⁵Mu tuwa suku na ɗa gaiɗi agula paŋ, ɵina tûwiŋa EPIƊ-ƊAI, kapai mu za pini gadaiku zi ɗiyi ɗa.

¹⁴⁶Mu tuwa na ɗa suku, kurɗaŋa kruɗ, kapai mu za pini gadaiku zi ɗiyi ɗa.

¹⁴⁷Mu tika sa na ɗa wuzani hlai na rum rum, aŋ paya zinai war tuku par. Mu na baiya wala n’aga ku muɗaŋ ɗa.

¹⁴⁸Ara a mala edi wuzani hlai na hlai a sɗasi edi ɗa, aŋ hiina midini seŋ na ku muɗaŋ ɗa.

¹⁴⁹Pini pɗem na wiiku ɗa, ɵina tûwiŋa, EPIƊ-ƊAI, hinaŋa mu sumna kara pini hiini na wiiku.

¹⁵⁰Ngai n’e piyi aŋ zi meefeŋ ɗa, e ŋisi gobi gaya, e yimi warɗi na ɗa edi gaigai sini gadai zi ɗû na wiiku par.

¹⁵¹Amma tuku k’aŋ ɵima gobi EPIƊ-ƊAI, gadaiku paŋ ɗa a jre lai.

¹⁵²Mu sɗa ɓa gadai zi ɗiyi na wiiku ɗa ku tikini pini ɗa haa gamai par, a na haa hlai n’a vada kai.

¹⁵³Tala n’aŋ sa, plaŋa edi su, buri ɓa mada a wula gaini gadaiku zi ɗû ɗa kai.

¹⁵⁴Siŋka jreŋa edi, kurɗaŋa edi lai, hinaŋa mu sumna kara pini seŋ na ku muɗaŋ ɗa.

¹⁵⁵Kûrɗi ɗa a na gaigai siɗi ɗai na maafanai par, buri ɓa e piyi aŋ zi pini gadaiku zi ɗiyi kai.

¹⁵⁶EPIƊ-ƊAI, hiinini haw n’aŋ warku ɗa a suwa abai gara, hinaŋa mu sumna kara pini gadaiku zi ɗiyi ɗa.

¹⁵⁷Nagai n’e ziŋa gir mada gaiɗi gawŋa ɗa e sûwi viya. Amma mu zaga edi sini gadaiku zi ɗiyi par kai.

¹⁵⁸Nagai n’e ɗiyi midini yimiɗi kai ɗa, mu tiliɗi li ɗa agula te lumaŋa siɗi, buri ɓa e zi pini seŋ na ku muɗaŋ ɗa kai.

¹⁵⁹Yima ɓa, ta mu dara gadaiku n’aŋ gaini ɗiyi zaw zaw ɗa, EPIƊ-ƊAI, hinaŋa mu sumna kara pini pɗemku.

¹⁶⁰Seŋku ɗa a ɗiya midini jre, gadaiku zi ɗiyi na jre paŋ ɗa a na buri haa hlai n’a vada kai.

¹⁶¹N'abakai e ziŋ gir mada pini wala ktai kai sam, agula te huna ɗa a seŋ na wiiku ktai.

¹⁶²Mu firiya pini seŋku na ku muɗaŋ ɗa, maini ɗif n’a nava der n’abai nɵa.

¹⁶³Mu firiya eles kai, a tala ara hi-hir, mu firiya ɗa a gadaiku zi ɗû ɗa.

¹⁶⁴War yuvai ɗa mu kuluku azi muguzak, burini gadaiku zi ɗiyi na jre ɗa.

¹⁶⁵Nagai n’e diri gadaiku zi ɗû ɗa, ɵeɗ n’abai aŋ midiɗi, wala ktai na eziɗi a daba sini nɵa aŋ kai.

¹⁶⁶EPIƊ-ƊAI, mu tika hiiniŋa midini kûrɗi n’aga ku kurɗaŋa ɗa, mu va gadaiku amai lai.

¹⁶⁷Mu za pini gadaiku zi ɗiyi ɗa, mu daraŋ gara lai.

¹⁶⁸Mu na za pini gadaiku n’aŋ gaini ɗiyi zaw zaw ɗa gaini gadai zi ɗiyi lai, buri futiŋa paŋ ɗa ku sɗaŋ paŋ.

¹⁶⁹EPIƊ-ƊAI, hina tûwiŋa a halaɗi haa suku ta, pini seŋku ɗa, saŋa siɗi pini seŋku lai.

¹⁷⁰Hiŋa siiwa na wiya a halaɗi haa suku ta, plaŋa edi pini seŋku na ku muɗaŋ ɗa.

¹⁷¹Hina yama zi kol a niyasi edi war ma par, buri ɓa ku hitraŋa gadaiku zi ɗiyi ɗa.

¹⁷²Hina seŋku na ku muɗaŋ ɗa, a niyasi edi midiɗi alsiya par aŋ yama, buri gadaiku paŋ ɗa a jre.

¹⁷³Lawana ɗuwal; buri mu vara aŋ za pini gadaiku n’aŋ gaini ɗiyi zaw zaw ɗa.

¹⁷⁴EPIƊ-ƊAI, m’aŋ gaini sai ma burini kûrɗi n’aga ku kurɗaŋa ɗa, gadai zi ɗû na wiiku a saŋa firiyi n’abai.

¹⁷⁵A zuva ɓa mu sumna kara buri mu kuluku gaini yama, hiini na wiiku ɗa a zina pa lai.

¹⁷⁶M'an na gaini wili skeŋ maiɗi adumi na gaini bi edi ta nɵa. Payaŋa, ta na ɗifku ɗa, buri mada a wula gaini gadaiku kai.