Read Mousgoum Yama na wiini David 135 Bible Online

Yama na wiini David 135 - Mousgoum bible

Yama na wiini David 135

¹Kûli EPIƊ-ƊAI, Kûli yikini EPIƊ-ƊAI, Kûliŋ, tiki ɗai na wiini EPIƊ-ƊAI,

²na ki ɗa amlai war tempel na wiini EPIƊ-ƊAI, aha war pakatai na wiini tempel na wiini Alaw na wiimu.

³Kûli EPIƊ-ƊAI buri Ni a pɗem, kûli yikini gaini yama buri Ni a juf gara.

⁴Buri EPIƊ-ƊAI a vara Yakob ɗaw, a vara Izrayel aŋ wiini ni gaini midini.

⁵Ta mu sɗaŋ edi gaglai ɓa, EPIƊ-ƊAI ɗa a abai, EPIƊ-ƊAI na wiimu ɗa a sûwiɗi alawai na zamai ɗa paŋ.

⁶Wala n’a firiya a zaŋ paŋ ɗa, a zaŋ, koo amai war hlai n’amai, koo azumai midini afti, koo war yem-ra n’abai, koo war hulumni yem-ra n’abai.

⁷Edi woni koŋɗi yai par a kasi ɗugul zi faŋ, A za wilɗi gaini faŋ, a hinasi smer a kasi edi warni hlai n’a giɗimaŋ woni par.

⁸A fiɗiɗi ali zi wii n’avut na war Egipte ɗa paŋ edi, siɗi ɗai par haa sini wazagai n’ezini puɗu puɗu.

⁹A za wazagai zi siŋki gaini hiila, arbaki tiki ɗai n’Egipte, sini Farawn gaiɗi ɗai n’ahani paŋ lai.

¹⁰A rɗa amai midiɗi pinzibaɗi viya, a fiɗiɗi paakai zi spak lai.

¹¹A fuɗa Sihon pai na wiiɗi Amoritekai, Og, pai na Basaŋ, gaiɗi paakai na midini afti na Kanaan paŋ lai.

¹²A sa aftiɗi aŋ bulum, aŋ bulum wiiɗi Izrayel na ɗaini.

¹³EPIƊ-ƊAI, yikuku aga a waa ɵa haa kureɗ, EPIƊ-ƊAI, aga e yiki yikuku ɵa haa hlai n’a vada, n’a vada kai.

¹⁴Buri EPIƊ-ƊAI a ziti sariya wiiɗi ɗaini, aga a hiina haw buriɗi ɗaini zi sda ɗa.

¹⁵Alawai zi rgi na wiiɗi ɗai ɗa azi arzaŋ, azi or lai, a sda n’e ziŋ ɗa e ɗi ɗai.

¹⁶Mini a na, amma a muɗa kai, arni a na, amma a tala kai,

¹⁷Slimani a na, amma a ɵina kai, suŋfa warɗi kai.

¹⁸Nagai na e ziziniŋ ɗa e siɗi maini ɵa, gaiɗi nagai paŋ n’e ɗiyi yimiɗi midiɗi ɗa nɵa lai.

¹⁹Tiki ɗai na Izrayel, ki si tese wiini EPIƊ-ƊAI, pinzibani Aaron, ki si tese wiini EPIƊ-ƊAI,

²⁰pinzibaɗi Levivitekai, si tese wiini EPIƊ-ƊAI, tiki na ki sini hormo wiini EPIƊ-ƊAI ɗa, zini tese wiini EPIƊ-ƊAI lai.

²¹Ki si tese wiini EPIƊ-ƊAI aha war Siyon par, Ni n’a sumna aha warɗi Yeruzalem, kûli EPIƊ-ƊAI.