Read Mousgoum Yama na wiini David 147 Bible Online

Yama na wiini David 147 - Mousgoum bible

Yama na wiini David 147

¹Kûli EPIƊ-ƊAI! Buri zinini yama zi kol na sini Alaw na wiimu ɗa a wala na pɗem, a tala pɗem gara, juf gara lai, buri e kûliŋ.

²EPIƊ-ƊAI a waya aŋ rgiti Yeruzalem amai pra, a tipiɗisi nagai n’e ɵiri edi war Yeruzalem par ɗa.

³A zuuliɗi nagai n’agulɗi aŋ war marava, a ma min wurukɗi edi, a rga mini lai.

⁴A sɗa, piɵini meeɵek ɗa paŋ, meeɵek paŋ aŋ gai yikini yikini.

⁵Epin-gezamu ɗa abai gara, spakni abai lai, siɗini ɗa dibini aŋ kai.

⁶EPIƊ-ƊAI a zina piɗi na murgakai, na murgakai ɗa a wiyiɗi haa azumai arni afti.

⁷Zini yama zi zini tese wiini EPIƊ-ƊAI, ɵiɓi adill pin Alaw na wiimu.

⁸A bula ɗugul zi faŋ amai war hlai n’amai ɗa a ni, a zasi faŋ burini afti ɗa a ni, a hina evek a diya amai sini huwuŋ ɗa a ni lai.

⁹A sa simi na wiini wazagai n’ezini puɗu puɗu, gaini alini zeleke n’a na tuwa wiyamai lai.

¹⁰A sini firyi ɗa a gdaŋ na wiini plis ɗa kai, a gorzom na wiini ɗif kaalai.

¹¹EPIƊ-ƊAI a firyiɗi ɗa e ɗi nagai n’e sini hormo, nagai n’e pɵi midini pɗemni ɗa.

¹²Yeruzalem, kola EPIƊ-ƊAI! Siyon, kola Alaw na wiiku ɗa!

¹³Buri a ɵa min magalaku ɗa gaini kawakai na gdaŋai, a ɓikiɗi ɗai n’aha warku ɗa lai.

¹⁴A sa ɵeɗ midini aftiku, a vuku gaini algama na gai futini,

¹⁵A sa miɗi edi midini afti, seŋni a hala witaw tar.

¹⁶A hina maɗai zi glai ɗa a wa muɗukwi maini aduzi ɵa, a hina maɗai zi glas ɗa a yima amai ɵimani luwoŋai muɗukwi fuuwa maini bono nɵa.

¹⁷A hinasi glas na wiini a yakasi aŋ wutiŋ, n’a kiɗa a yima gadaŋni hlai na ɗarak na wiini ɗa asiya ɗa?

¹⁸A sa miɗi li ɗa, glas hanɗa a hiliya, a hinasi smer li ɗa, yem a faka a ka.

¹⁹A siŋka seŋni ɗa wiini pinzibani Yakob, gadaini zi ɗiyi gaini gadaini ɗa, wiiɗi Izrayel lai.

²⁰A za sda hanɗa gaini pinziba zamai kai, pinziba zamai ɗa e siɗi gadaini zi ɗiyi ɗa kaalai. Kûli EPIƊ-ƊAI!