Read Mousgoum Yama na wiini David 148 Bible Online

Yama na wiini David 148 - Mousgoum bible

Yama na wiini David 148

¹Kûli EPIƊ-ƊAI! Kûliŋ amai war hlai n’amai par! Kûliŋ amai arbani hlai par!

²Kûliŋ, tiki ɵeŋ na wiini paŋ, kûliŋ tiki wazagai zi rgi n’arbani hlai n’amai.

³Kûliŋ, futi gaini tile, kûliŋ meelzek zi ŋili n’arbani hlai n’amai.

⁴Kûliŋ, hlai n’amai par midini hlai n’amai, gaini yem n’amai midini hlai n’amai par paŋ.

⁵A zuva ɓa wazagai hanɗa paŋ a kola yikini EPIƊ-ƊAI, buri a sa miɗi wazagai hanɗa a rga lai.

⁶A tika wala paŋ war balamni ta ta buri a sumna haa hlai n’a vada kai, a ɗiya gadai ktai zaw na Ni a kiɗa a ha amai midini kai.

⁷Kûli EPIƊ-ƊAI, tiki paŋ na ki ɗa azumai par midini afti, wala meefeŋ n’abakai n’arni yem, gaini yem-ra n’abakai.

⁸Afu na wiini Alaw gaini wutiŋ, maaɗai zi glas gaini hlai zi digi, gaiku tuku barawai na ku va ɵeŋni amai ɗa.

⁹Huwoŋai gaini boŋorai, luwoŋai zi simi gaiki tiki luwoŋai Sedre paŋ.

¹⁰Wazagai n’ezini puɗu puɗu n’edi buza gaini n’aha, wazagai zi hidili gaini zi ɗufli.

¹¹Paakai na midini afti gaiɗi paŋ, abakai zi ɵi wuze gaiɗi paakai zi ɗukuliti sariya paŋ.

¹²Gawlakai gaiɗi ɓulamai, tiki na walakai gaiɗi aliyagoi n’agogoi.

¹³Kûli yikini EPIƊ-ƊAI! Buri ɓa yiki n’a suwa paŋ ɗa a na wiini, a ŋala ɗa a suwa hlai n’amai gaiɗi yai.

¹⁴A va firyiɗi ɗaini amai, a siɗi spak lai, marmakaini na jre ɗa e kûliŋ na ɗa burini hanɗa, a suwa paŋ buriɗi aliɗi Izrayel, na ɗaini n’arbaɗi pɗem ɗa. Kûli EPIƊ-ƊAI!