Read Mousgoum Yama na wiini David 18 Bible Online

Yama na wiini David 18 - Mousgoum bible

Yama na wiini David 18

¹Yama n’a tikasi warni maktuɓ na wiini abai na midini yama par. David, ɵeŋ na wiini EPIƊ-ƊAI, a zinaŋ woni hlai n’EPIƊ-ƊAI a plaŋsi edi war tiɗi gawni tini Sawul par lai.

²A muɗa: Mu duruku EPIƊ-ƊAI, Gdaŋ na wiya,

³EPIƊ-ƊAI ɗa a huwuŋ na wiya, a Hlai zi ŋoyai na wiya, a Ɗif n’a plaŋa edi. A Alaw na wiya, a Huwuŋ na mu ŋoya sini. A Gamar na wiya, a Spak n’a kurɗaŋa, a Fuŋ n’abai zi ɵaga na wiya.

⁴Mu ɗuula, EPIƊ-ƊAI a kurɗaŋa edi tiɗi gawŋa par, kol a wiini.

⁵Zab na wiini mri a ɵawaŋa, kiini yem na wiini ɓilki n’edi a mulaŋa hunai pa.

⁶Zab na wiini Hlai zi simni na wiiɗi zi mri a gunaŋa azumai gun, azaw na wiini mri a nafu wuza gaini giŋi gaŋ,

⁷War girŋa mu yika EPIƊ-ƊAI, mu ɗuula Alawŋa buri a zina pa, war hlai zi simni na wiini par a ɵina wula. Ɗuwal na mu ɗuula sini ɗa a co haa ɵimani co.

⁸Afti a muguza, a ziriya, ezini huwoŋai n’azumai a gigiɗa, a muguza, buri ɓa Alaw a za hiy ta.

⁹Agiyiŋ a niyasi edi merfeŋni par, afu n’a ya wazagai a niyasi edi war mini par, morjo na mekele hilis a yakasi mini par lai.

¹⁰A jagasi mini hlai n’amai ɗa azumai, a niyasi azumai sini, gaini ɗugul na diɓilik azumai pini ezini.

¹¹A niya duɓani Kerebim ktai a ɗufla, a guvula midini graŋni smer.

¹²A bunda gegeŋ ɗa aŋ hlai n’a ŋoya woni, a hara sini amlai gaini ɗugul na murɗek, gaini yem na murɗek lai.

¹³Gaglai na wuzani su ɗa, ɗugaul zi faŋ gaini wutiŋ gaini morjo a niyasi edi warni par.

¹⁴EPIƊ-ƊAI a ɓara warni hlai n’amai, Alaw n’Amai wulani a wa edi, gaini wutiŋ gaini morjo z'afu lai.

¹⁵Alaw a ɓa ɓarawni, a ɵiriɗi gawni edi, a za wilɗi war hlai n’amai par, a miliɗi hunai n’abai piɗi.

¹⁶Won hlai n’EPIƊ-ƊAI a ɓiriɗi ɗa, warni arakai a tikasi amai, eziɗi yai n’azumai par a siŋkasi amai, pini smer na ku yibaŋ, pini smer n’a niyasi merfeŋku par ɗa.

¹⁷Amai par EPIƊ-ƊAI a witisi tini, a yimaŋa, a yimaŋasi edi arni yem n’a dara a baŋa ɗa par.

¹⁸A plaŋasi edi tini gawŋa zi spak par, tiɗi gawŋa na gdaŋɗi a suwaŋa par lai.

¹⁹E biyiŋa war mefeŋ na m’aŋ war gir ɗa, amma EPIƊ-ƊAI a lawaŋa ɗuwal.

²⁰A yimaŋsi edi war gir ɗa par, a blaŋa baŋa sa, a kurɗaŋa buri ɓa a daraŋa.

²¹EPIƊ-ƊAI a za sa maini hanɗa ɵa buri jre na wiya, a za pɗem sa nɵa buri ɓa ta te tetema wala na meefeŋ kai.

²²Buri ɓa mu hina futi na wiini EPIƊ-ƊAI edi kai, mu za wala na meefeŋ arni Alawŋa maiɗi na maafanai nɵa kaalai.

²³Gadaini zi ɗiyi a nafu wuzani ara kureɗ, mu ɓurwa gaini gadaini zi ɗû kai,

²⁴a nava wala ktai na meefeŋ sa par kai, mu ɗala sa burini meefeŋ paŋ.

²⁵EPIƊ-ƊAI a za sa nɵa burini jreŋa, buri pɗemŋa na mu zaŋ n’a talaŋ gaini arni.

²⁶Ɗif n’a na jre ɗa ku na jre gaini lai, ɗif n’a na ɗikat ɗa, ku na ɗikat gaini lai.

²⁷Gaini ɗif na hilu tuku ku na hilu lai, amma gaini ɗif zi rhai ɗa, tuku yel gara.

²⁸Buri ɓa ku kûrɗiɗi nagai n’e ɗa siɗi gir tiɗi marɗi ɗa edi ku tuku, amma nagai n’e kuli-siɗi ku hûsiɗi azumai.

²⁹EPIƊ-ƊAI, lampa na wiya ku tuku, Alaw wiya, ŋala gaglai war gegeŋ na m’aŋ warni ɗa.

³⁰Gaiku tuku, mu kiɗa mu purma aŋ hitimiɗi vokɗi askarai, gaini Alaw na wiya, mu kiɗa mu pra aha warni fuŋ n’abai zi ɵaga.

³¹Futi na wiini Alaw, wala na meefeŋ warɗi kai, seŋ na mini par ɗa eles warni kaalai. Ni a Gamar na wiiɗi nagai n’e ŋûyi sini.

³²Na a sɗa aŋ za aŋ Alaw asiya ɗa, na ɓa a EPIƊ-ƊAI kai ɗa! Na a kiɗa a za aŋ huwuŋ na wiimu asiya ɗa, a Alaw na wiimu ɵa kai ɗi?

³³A Alaw n’a na sdaŋa gdaŋ wara, a ziti futiŋa pɗemi na ɗa a ni.

³⁴A bunda aza kolek maiɗi eziɗi hudrai nɵa, a ɗiyaŋa amai merfeŋni hlai n’amai mogo.

³⁵A hitraŋa mini hatam, a zina aŋ fa taŋ zi kiiya.

³⁶Tuku ku saŋa gamar na wiiku, n’a saŋa rɗi n’amai. Spak na wiiku a zina pa, pɗem na wiiku a zaŋa aŋ ɗif n’abai.

³⁷Gaiku tuku, mu lawa kokolai, aza a hurzila kai,

³⁸mu tika futi li piɗi gawŋa ɗa, sai mu yimiɗi, mu vidiɗisi edi kai ɗa mu wayasi kai.

³⁹Mu vidiɗi edi, e kiɗi e fikisi amai kir kai, e yiki azumai mu baza aza midiɗi.

⁴⁰Ku saŋa gdaŋ wara aŋ hitima, gawŋa ku hiɗiɗisi azumai wuza,

⁴¹Gaini zinai na wiiku ɗa, gawŋa e liwi wuza, nagai n’e diriŋa kai ɗa, mu vidiɗi edi.

⁴²E piyi zinai amma ɗif n’a kûrɗiɗi aŋ kai e yiki EPIƊ-ƊAI amma a wiyiɗi seŋ kai.

⁴³Mu siriɗi maini alogodo na smer a tikaŋ ɗa nɵa, mu dugiɗi edi maini zilgit na warɗi futi nɵa.

⁴⁴Ɗaiŋa e fiki amai sa, amma tuku ku plaŋa edi, ku tikaŋa aŋ abai midiɗi pinzibaɗi ɗai, Pinzibaɗi ɗai n’e siɗiŋa kai, e bindi aŋ ɗai na mu ŋa midiɗi.

⁴⁵Mu muɗa li tar ɗa, e ɵini ma tar, Na morkokoi, e miɗiŋa seŋ na bla sa amai.

⁴⁶Ɗai na morkokoi ɗa gdaŋɗ a vada edi vat, e niyisi aha war ɵagaɗi par gaini jiriyi.

⁴⁷EPIƊ-ƊAI aŋ karni, kol sin Huwuŋ na wiya, Alaw n’a kurɗaŋa ɗa a nava kol n’abai.

⁴⁸A ziɗi gir wiiɗi gawŋa ɗa a Alaw, a wiyiɗisi ɗai azumai pa na ɗa a ni.

⁴⁹A kurɗaŋa tiɗi gawŋa par, a saŋa rɗi n’amai midiɗi gawŋa, a plaŋa edi tini ɗif na garmas ɗa par.

⁵⁰Buri nɵa, aga mu kuluku arbaɗi pinziba n’edi par aga mu kolaiikuku gaini yama.

⁵¹A za wazagai n’abakai buri pli n’edi na wiini paini azi viya, a siŋka dirini sini ni n’e mi emel n’e tiki ɗai war sda gaini midini ɗa, Sini David gaini pinzibani n’asakal sek haa kureɗ.