Read Mousgoum Yama na wiini David 22 Bible Online

Yama na wiini David 22 - Mousgoum bible

Yama na wiini David 22

¹Yama na wiini David n’a tikaŋsi warni maktuɓ zi yama na wiini abai na midini yama par, a zina gaini wûle n’e yikiŋ ɓa: "Wudrai na hlai rum rum".

²Alaw wiya, Alaw wiya, ku hinaŋa ɵa buri maɗa? Ku ɗiyasi gaigai ɵa buri maɗa? Ku kurɗaŋa kai na ɗa buri maɗa? Ku ɵina tûwiŋa kai na ɗa buri maɗa?

³Alaw wiya, girvudi mu ɗuuluku, amma ku wayaŋa seŋ kai, duvuk ɗa, mu ɗuula pra, ma ɗa a doogo kai.

⁴Paŋ ktai tuku k’Alaw na sɗik, k’aŋ gaini simni midiɗi Paramai zi pai na wiiku, aliɗi Izrayel e si kol suku gaini yama mefeŋ mefeŋ paŋ.

⁵Tamaiyi e ɗiyi yimiɗi muduku, e ɗiyi yimiɗi muduku, tuku ku piliɗi edi.

⁶E tûwi suku, tuku ku piliɗi edi, e ɗiyi yimiɗi muduku, ku hina siyer a ɗûkûɗi kai.

⁷Amma ta ɗa mu ɗif kir kai, m’atla, ɗai e tirkiŋa, e miisiŋa,

⁸nagai paŋ n’e tiliŋa ɗa e ziŋa yewere, e riyi pa, e kikiyi midiɗi e miɗi:

⁹Hina suku war tini EPIƊ-ƊAI kir ka, aga a kurɗaŋ edi lai, a plaŋ edi lai kir ka, a daraŋ gara na ɗa.

¹⁰Aakam, tuku ku waŋasi warɗi ama par ku tuku, ku giɗimaŋa mini fiyawɗi ku tuku.

¹¹Mu poko tar ɗa e hiniŋa war tuku, haa war gutɗi ama par, Alaw na wiya ku tuku.

¹²Ku hinaŋa edi kai, buri ɓa gir a na gobi gaya, buri ɓa ɗif n’a zina pa aŋ kai.

¹³Gawŋa viya e gûniŋa azumai, maini garakai nɵa, maini garakai zi spak na war Basan nɵa.

¹⁴E milisi miɗi sa maini gurnai, n’a ɓasa wala, n’a nuuma nɵa.

¹⁵Gɗaŋŋa a yima edi maini yem n’a ka nɵa, Keɵkeŋa a rɗa war gaɵni ta ta, agula te hiliya amlai wara, maini analam nɵa.

¹⁶Gdaŋŋa vada edi maini afti na huleŋ nɵa, alsiya te deɓiga amai pini hiŋahiŋaŋa, ku fanaŋa azumai arni alogodo maini ɗif zi mri nɵa,

¹⁷vokɗi ɗai na maafanai a gunaŋ azumai, hirgakai hanɗa e hiniŋa baŋa sa kai, e ɓili aza gaini ta,

¹⁸mu hoga haa keɵkeŋa paŋ ɗif a kiɗa a pɵaŋ; nagai e mili arɗi sa e ziziriŋa.

¹⁹E ɓûrwi sapaŋa arbaɗi, e ɓiliti sapaiŋa aŋ tambulo.

²⁰Tuku EPIƊ-ƊAI, ku hinaŋa edi gaigai kai, tuku na ku gdaŋ na wiya, halasi witaw, zina pa ta.

²¹Koraŋa edi mini kaɵkar par, kora sunfaŋa edi mini tetriŋni hirgakai par.

²²Kurɗaŋa edi mini gurnai par, mini miyokni hilu par lai. Tuku ku ɵina tûwiŋa;

²³Aga mu muɗa edi midini yikuku arbaɗi tawalakaya, aga mu kuluku gaini yama arbani vokɗi diŋgi, aga mu muɗa ɓa:

²⁴Tiki paŋ na ki si hormo wiini EPIƊ-ƊAI ɗa, ku kûliŋ gaini yama, tiki paŋ na war pinzibani Yakob, kûliŋ amai! Ziriyi wuzani, tiki paŋ na war pinzibaɗi Izrayel.

²⁵Buri ɓa gir na wiini ɗif na haw ɗa a yimaŋ aŋ wala na kagai kai, a talaŋ aŋ wala na kadai kaalai. A bunda arni edi sini par kaalai, won hlai na ɗif na haw a tuwa li sini ɗa, a ɵina tuwini a liwiini ɗuwal lai.

²⁶Kol na mu saŋ suku wuzani diŋgi n’abai ɗa a halasi na ɗa suku par, ɵinini-ha na mu zaŋ buriku paŋ ɗa aga mu vaŋ amai wuzaɗi nagai n’e suku hormo ɗa.

²⁷Na murgakai aga e simi haa e vi, nagai n’e piyi EPIƊ-ƊAI ɗa aga e kûliŋ, a zuva ɓa wala na meefeŋ a ziki kai. Ki simni zam, ɵa haa kureɗ.

²⁸Ɗai na midiɗi yai paŋ, midiɗi aga a kɵa gaini EPIƊ-ƊAI, aga e wiyisi sini, pinzibaɗi ɗai paŋ aga e hûrgi azumai wuzani.

²⁹Buri ɓa pai te wiini EPIƊ-ƊAI, a ŋa midiɗi ɗai paŋ.

³⁰Ɗai zi spak na midini afti paŋ aga e simi, e hûrgi azumai wuzani lai, nagai paŋ na gaini mri, n’e kiɗi e gidi suŋfaɗi kai ɗa, aga e hiɗi azumai wuzani.

³¹Aliɗi gaiɗi tiyakaiɗi aga e zi ɵeŋni, aga e miɗi midini EPIƊ-ƊAI sini piniziba na asakal sek.

³²Aga e virniɗi wiiɗi ɗai n’aga e wi, sda n’Alaw a zaŋ kapai a kûrɗiɗi ɗaini edi ɗa.