Read Mousgoum Yama na wiini David 31 Bible Online

Yama na wiini David 31 - Mousgoum bible

Yama na wiini David 31

¹Yama na wiini David, n’a tikaŋsi war maktuɓ zi yama na wiini abai na midini yama par

²EPIƊ-ƊAI, tuku ku hlaiŋa zi ŋoyai, ku hiina siyer a dogoŋa kai, pin jreku ɗa, plaŋa edi su.

³Zagasi ɵimaku ma, purmasi ma, plaŋa edi, za suku burya aŋ huwuŋ na gdaŋ, aŋ ɵaga zi ŋoyai n’a kiɗa a kurɗaŋa.

⁴Buri huwuŋ na wiya gaini ɵaga na wiya ku tuku, tuku aga ku ɵa wuza, ku kaŋa, kapai ku siŋkiti abaiku edi.

⁵Plaŋa edi min azaw n’e giŋiŋ wuza par, buri tuku ku hlai zi ŋoyai na wiya.

⁶Mu hina suŋfaŋa war tuku, ku plaŋasi edi, Epiɗ-ɗai Alaw na jre.

⁷Nagai n’e hûrgi azumai wuzani alawai na kadai ɗa, mu firyiɗi kai, Ta ɗa, mu ɗiya yimiŋa midini EPIƊ-ƊAI.

⁸Mu pra amai gaini firyi n’abai burini pɗemku buri ku na tala hawŋa, ku na sɗa gir n’aŋ sa lai.

⁹Ku hinaŋa war tiɗi gawŋa kai, ku bulaŋa baŋa sa.

¹⁰EPIƊ-ƊAI, hiina haw buriya, buri m’aŋ war gir. Tuwi ɗa a suma ara edi ta, amur-sa gaini suŋfaɗi agula paŋ aŋ war gir.

¹¹Mu vada na ɗa war gir, mefeŋŋa a vada na ɗa war tuwi ɵa tuwurŋa a yima gdaŋŋa edi kap, keɵkeŋa maa, gdaŋ warni kir kai.

¹²Gawŋa gaiɗi ɗai na ɵima paŋ, e trkiŋa gai tirki. Buriɗi marmakaiya maa, mu wala zi mili hunai e tiliŋa li blaŋ ɗa, e rûvi wuza gai rûvi.

¹³Ɗai midiɗi a wula gaya maini ɗif n’a mra su nɵa, mu bunda aŋ pakatawni wula.

¹⁴Mu ɵina seŋ na maafanai n’e miɗiŋ mada miɗi ɗai viya won hlai n’e tipi miɗi li mada, e piyi dabarai n’e fiɗiŋa edi gaini.

¹⁵Amma ta ɗa, mu baiya tuku, EPIƊ-ƊAI, mu muɗa ɓa Alawŋa ku tuku.

¹⁶Mefeŋŋa ɗa, aŋ war tuku, plaŋa edi war tiɗi gawŋa gaiɗi nagai n’e ziŋa gir ɗa par.

¹⁷Mula arku mada, ta na ɵeŋku ɗa ku koraŋa edi pin yimku.

¹⁸EPIƊ-ƊAI, na ɓa mu yikuku li ɗa, ku hina siyer a dogoŋa kai amma, ku hina siyer a yimiɗi nagai na maafanai e niyi azumai war hlaiɗi ɗai zi mri sek ɗa, miɗi a muɗa seŋ kai.

¹⁹Z'alasakai, ku duguɗi miɗi e miɗi sini ni n’a ɵina muku gaini hormo kai. E miɗi gaini kûlûni-si gaini miisi lai.

²⁰Pɗemku ɗa suwa abai gara, pɗemku na ku na gɗamaŋ buriɗi nagai n’e ɗa hunuku ɗa Na ku na zaŋ siɗi nagai n’e ŋûyi suku, wuzani arɗi ɗai paŋ.

²¹Nagai ɗa, ku ŋuyiɗi war hlai n’arku sini ca edi gaigai sini eles na miɗi ɗai par, ku ŋuyiɗi amlai war gumu ku kutuɗi wuzaɗi ɗai n’e pi seŋ midiɗi ɗa.

²²Kol sini EPIƊ-ƊAI, A za pɗem n’abai sa n’a bunda ɗif hiyak aha war fuŋ n’abai zi ɵaga.

²³Ta ɗa, hlai ktai na mu yima ta sini aŋ kir kai ɗa, mu hiina ɓa: Ku birgaŋa edi wuzani arku par su paŋ ktai ku ɵina tûwiŋa, won hlai na mu tuwa suku.

²⁴Diri EPIƊ-ƊAI, tiki marmakaini na jre, EPIƊ-ƊAI a giɗimiɗi nagai n’e yimi warni amma a ziɗi gir wiiɗi nagai n’e kûli siɗi.

²⁵Ɗiyi gdaŋ, pi arki, tiki paŋ na ki biyi tini EPIƊ-ƊAI.