Read Mousgoum Yama na wiini David 36 Bible Online

Yama na wiini David 36 - Mousgoum bible

Yama na wiini David 36

¹Yama na leŋ na wiini EPIƊ-ƊAI, n’a tikaŋsi war maktuɓ zi yama na wiini abai na midini yama par.

²Burini ɗif na meefeŋ ɗa, miɗi n’a muɗa midini hi n’amai midini gadai ɗa a na amlai warɗi agula, hunai na wuzani Alaw a na wuzani arni kai.

³A tala sini ɗa a kiɗa ta, a kiɗa a sda meefeŋni kai, a kiɗa a bula edi sini kaalai.

⁴A niyasi war mini par ɗa a seŋ na meefeŋ gaini rha, zini pɗem ɗa, pɗemni arni kir kai.

⁵A fana li waŋ ɗa a hiina warni a sda na maafaŋai, a tikiti te futi na gaiɗi futiɗi kai, a bula edi sini meefeŋ kaalai.

⁶EPIƊ-ƊAI, pɗemku a na haa amai war hlai n’amai, ɗikatku ɗa haa amai arni ɗugul ta.

⁷Jreku ɗa a suwa huwoŋai na mogokai amai, sariya na ku ziti li ɗa te na maini yem-ra n’abai na hulum nɵa, EPIƊ-ƊAI, tuku ku kurɗa ɗai gaini wazagai n’ezini puɗu puɗu paŋ.

⁸Alaw wiya pɗemku ɗa abai gara, ɗai murɗakai e ŋûyi ɗa piɗi graŋku.

⁹Ahaku ɗa, ku siɗi simi haa viya, Ku siɗi aŋ yem zi ci ɗa a pɗemku n’a naka maini yem ɵa ɗa.

¹⁰Buri ɓa, pi zi tiki na wiini suŋfa ɗa aŋsi suku par, gaini gaglai na wiiku ɗa mi tili gaglai.

¹¹Nagai n’e siɗiku ɗa ku za pɗemku siɗi wuzaku sek, ku za jreku siɗi nagai n’agulɗi hilu lai.

¹²Ku hiniɗi nagai n’e kûli siɗi e kiɗisi amai sa kai, ku hiniɗi na maafaŋai e birgiŋa edi kaalai.

¹³Hanɗa a hlai na ɗai n’e zi meefeŋ e kɵi warni ɗa, e kɵi na ɗa e kiɗi e fiki amai kir kai.