Read Mousgoum Yama na wiini David 39 Bible Online

Yama na wiini David 39 - Mousgoum bible

Yama na wiini David 39

¹Yama na wiini David, n’e tikiŋsi war maktuɓ zi yama na wiini Yedutun, abai na wiini yama par.

²Mu hiina wara ɓa: Mu tika hangala ta, kapai mu za tuwur war seŋŋa zi miɗi kai; wuzani ɗif na meefeŋ ɗa, aga mu wa eleŋje ma, kapai mu muɗa seŋ kai.

³Mu sumna wiya dam, mu muɗa kai, mu doogo ma duk, amma a zina pa kai. Girŋa a riya amai wuzani sek.

⁴Agula te huura amlai wara, Nuumuŋa a bunda maini yuvuguni afu nɵa. Nɵa, mu tika pa aŋ muɗa seŋ.

⁵EPIƊ-ƊAI, siŋkaŋa dibini suŋfŋa ɗa ta, hina ma mfeŋ gama ɗa? Kapai mu sɗa ɓa m’an na buri hlai n’agwi kadai.

⁶Mogoni suŋfaŋa a na maini brukni ti nɵa, simniŋa na kara ɗa wuzani arku a wala na kadai, koo ɓa ɗif aŋ karni ɗi a smer kadai. Sela.

⁷A na maini sezeni luwuŋ nɵa, a bunda na zaw, na sek lai. A kaya sini aŋ tapa wazagai amai viya, amma aga a ya edi kadai. A tapa der amai viya, amma ɗif n’aga a sumaŋ ɗa a sɗaŋ kai.

⁸Tiyana ɗa, EPIƊ-ƊAI, mu baiya zamai na ɗa a ma ɗa? Mu baiya na ɗa tuku tuku.

⁹Plaŋa edi war hiŋa n’amai midini gadai ɗa par, hinaŋa min tirki na wiiɗi ɗai na tatalakai kai.

¹⁰Tiyana ɗa, mu sumna wiya dam, mu muɗa seŋ kir kai, buri ɓa ku za wala paŋ ku tuku.

¹¹Ku ɵiɓaŋa ɵa ta kai ɗi? Buri gdaŋŋa a yima ɵiɓi na tuku kai.

¹²Won hlai na ku zini gir wiini ɗif buri meefeŋni ɗa, ku gdaŋ na ɗa a gidi, wala n’a daraŋ gara ɗa, ku sumaŋ maini foto ɵa. Nkam, ɗif paŋ ɗa a giyiŋ kadai. Sela.

¹³Slina siiwiŋa, EPIƊ-ƊAI, jaaga ɵimaku min tûwiŋa, ku taka ɵimaku min tûwiŋa kai. Buri mu na ahaku na ɗa maini ɗif zi zak nɵa. Gaini aza blaŋ maiɗi tamaiya nɵa.

¹⁴Saŋa si n’a mula, kapai mu firya agwi, wuzani hlai na mu mra, na mu vada edi sek ɗa.