Read Mousgoum Yama na wiini David 40 Bible Online

Yama na wiini David 40 - Mousgoum bible

Yama na wiini David 40

¹Yama na wiini David n’a tikaŋsi war maktuɓ zi yama na wiini abai na midini yama par.

²Mu baiya tini EPIƊ-ƊAI haa, a jagasi ɵimani ma, a ɵina tûwiŋa.

³A yimasi amai war waŋ na wiini ɓilki n’edi par, azumai pin ŋorɓok n’azumai ɗa par, a ɗiyaŋa amai midini aza, amai midini huwuŋ, A sa gdaŋ aŋ hili.

⁴A tika yama na hehe war ma, a yama zi kol na sin Alaw na wiimu, Ɗai viya aga e tiliŋ, aga e sini hormo wiini EPIƊ-ƊAI, e ɗiyi yimiɗi midini lai.

⁵Sleɗ aŋ midini ni n’a ɗiya yimini midini EPIƊ-ƊAI, n’a tapa gaiɗi nagai n’e zili siɗi amai gaiɗi z'alasakai ɗa kai.

⁶Epiɗ-ɗai Alaw na wiyi, sda na ku hiinaŋ buriyi gaini wazagai n’abakai n’a bunda ɗif hiyak, na ku zaŋ buriyi ɗa suwa viya gara. Ɗif n’a kata gaiku aŋ kai, mu dara mu waya pini pra, mu waya pini pra, aŋ muɗa edi midini, amma a suwa viya gara.

⁷Tuku ku paya ɓaka na gaini wazagai n’ezini puɗu puɗu kaalai, na gaini ali seyem ɗa kaalai. Ku yimaŋŋa mada gai futini gara. Ku zilba ɓaka zi yi, zaw ɓaka na burini tuwur ta kaalai.

⁸Nɵa, mu muɗa: Mu na halaɗi, Gaini maktuɓ zi fiɗɗi n’a ɗo mada ɗa.

⁹Alaw wiya, mu firya mu za diriku, gadai zi ɗû na wiiku a na amlai warɗi agula.

¹⁰Amlai war diŋgi n’abai, aga mu sa labar na pɗem hanɗa edi ɓa: EPIƊ-ƊAI a sa pli n’edi. EPIƊ-ƊAI, tuku ku sɗa ya, mu kiɗa mu doogo ma kai.

¹¹Jreku ɗa, mu kiɗa aŋ ŋuyiti warɗi agula kai, aga mu muɗa edi midini ɗikatku gaini pli na ku plaŋasi edi ɗa, pɗemku gaini jreku aga mu muɗa edi midini war diŋg n’abai.

¹²EPIƊ-ƊAI, ku bula edi sa gaini hiinini haw na wiiku kai, pɗemku gaini jreku aga a kaŋa pa haa kureɗ.

¹³Buri ɓa gir viya a haɵaŋa haɵ, meefeŋŋa aŋ pa ɵa tiɓ, mu firiya u talaŋ gaini ara ir kai, viyani ɗa a suwa ayir na mada ɗa, gdaŋŋa vada edi vad.

¹⁴Plaŋaedi su kai ɗi EPIƊ-ƊAI! Sla, EPIƊ-ƊAI, halasi witaw, zina pa ta.

¹⁵Nagai n’e piyi sunfaŋa, n’e piyi ŋ fiɗiŋa ɗa, hina siyer a ymiɗi, a diyiɓiɗi. N'e firiyi pini girŋa ɗa e wiyi duɓaɗi gaini siyer.

¹⁶Nagai n’e riyi pa kak kak ɗa, siyer aga a rgiɗi,

¹⁷a zuva ɓa nagai n’e firiyiku ɗa, e firiyi, e pri amai gaini firiyi, a zuva ɓa e miɗi kureɗ ɓa: EPIƊ-ƊAI abai. Nagai n’e diri kûri na wiiku ɗa.

¹⁸Ta mu na murga, na haw, amma EPIƊ-ƊAI a na hiina buriya, tuku ku zinai na wiya, ku ni n’a plaŋa edi. Alaw wiya, ku baiyasi kir kai.