Read Mousgoum Yama na wiini David 45 Bible Online

Yama na wiini David 45 - Mousgoum bible

Yama na wiini David 45

¹Hitri na wiiɗi alini kore n’e tikiŋsi war maktuɓ na wiini abai na midini yama par. Yama zi diri n’e zniŋ gaini adill zi sogom.

²Agula te va gaini miɗi na pɗamai, mu firiya mu ziniti yamai ktai burini pai, a zuva ɓa ma ɗa a kata gaini wala na ɗif zi ɗû wala a ɗo gaini nɵa.

³Tuku ku suwa ɗai paŋ gaini zuf, miɗi na muku par ɗa a zuva gara, Alaw a ɓukuku haa kureɗ na ɗa burini hanɗa.

⁴Gaŋgalaŋ na kurfuk, ɵa kaɵkarku paɵaku, hanɗa t'abai na wiiku, kol na wiiku lai.

⁵Aakam, warɗi abaiku, niya midini saretku zi gaw, duɓura, ɗiya midini jre, hangal gaini ɗikat lai. A zuva spakku a siŋka sdaku na pɗamai edi.

⁶Ɓarawku ɗa mini suweɗ suweɗ gara, ɗai aga e kɵi war tuku, ɓaraw aga a ɓula agulɗi gawni pai ɗa,

⁷Alaw, paramaku zi pai ɗa te na haa kureɗ, haa hlai n’a vada kai, amaraŋai zi pai na wiiku ɗa, t'amaraŋai na ɗkat.

⁸Ku firiya jre, ku bula edi sini meefeŋ, buri nɵa Alaw Alaw na wiiku a ma emel zi firiyi muduku, a duruku a sûwiɗi paakai na zamai ɗa.

⁹Wazagai zi ɗûgûdi zi lûgûzi: Mirr, alowes gaini kanel, a luguza sini sapakaikku, amlai warni dalamku zi pai n’a zizina gaini sesiyeŋ ni pekne par, wulani adill zi sogom n’a wasi woni par ɗa a suku firiyi.

¹⁰Aliɗi paakai na ɓulamai e rgisi amai gaini wazagai zi zuv na ku siŋɗi ɗa, amma munini pai na mini sa ɗa, t'aŋ midiɗi tuku na wus a ni or na Ofir par siɗi.

¹¹A hiya, ɵina pɗem, tala, zaga ɵimaku, hina muduku a wula gaiɗi ɗaiku, gaini dalamni apuku lai.

¹²Hina pai a firiya burini juf na suku, buri ni a epin-gezaku, hurga azumai wuzani.

¹³Nɵa, tiki ɗai na Tirus, ɗai zi farai ɗa, aga epiyi aŋ marmai gaiki ɗa, e wiriki ɗa gaini farai.

¹⁴Ahini pai ɗa te ŋala gaini ŋili aha war dalam zi pai ɗa, sapa na siɗi e tihiriŋ gaini or.

¹⁵E ɗa kitini wiini pai gaini sapaɗi na jereni kiini kiini viya, ɓulamai na marmakaiɗi duɓaɗi par yaw, e kiɗi piɗi amlai sini pai.

¹⁶E kiɗi piɗi arbani leŋi leŋi gaini ɗuwal zifiriyi. E niyi aha war dalam zi pai ɗa.

¹⁷Mefeŋ ktai aliku aga e tiki balamɗi tamaiku, aga ku tikiɗi aŋ paakai midini afti ɗa paŋ.

¹⁸Aga mu yika yikuku haa sini piniziba na wuza sek, nɵa ɗai aga e suku kol haa hlai n’a vada kai n’a vada kai.