Read Mousgoum Yama na wiini David 66 Bible Online

Yama na wiini David 66 - Mousgoum bible

Yama na wiini David 66

¹Yama na wiini David n’e tikiŋsi war maktuɓ zi yama na wiini abai na midini yama par. Yama. Sliɓi tiki pini Alaw, tki ɗai na midiɗi yai paŋ.

²Kûli yikini n’abai ki kûliŋ gaini yama.

³Miɗini wiini Alaw ɓa: sdaku na ku zaŋ ɗa a zi mili hunai piɗi ɗai, wuzani gdaŋku n’abai ɗa, gawku e kuluku gaini miɗi kadai.

⁴Ɗai na midini afti paŋ e hûrgi azumai wuzaku, e zini yama buriku, e zini yama gaini yikuku, Sela.

⁵Hilisi tili sda n’Alaw a zaŋ, sdani n’abakai n’a zaŋ buriɗi ɗai ɗa a wala zi mili hunai.

⁶A bunda yem-ra n’abai aŋ afti na hûleŋ, ɗai e vigi gaini eziɗi. Hanɗa a wala n’a siyi firiyi warni ɗa.

⁷Gaini spakni a ŋa haa hlai n’a vada kai, arni aŋ midiɗi pinzibaɗi ɗai paŋ. A pɗem ɓa nagai n’e ɵini pini kai ɗa e fiki seŋ kai. Sela

⁸Tiki ɗai ɗa sini kol wiini Alaw a wiyi, kûliŋ gaini yama.

⁹A hiniyi aŋ simni karyi, a hina aziyi a ɵiɓa tukm kai.

¹⁰Alaw wiyi, ku tala n’aŋ siyi ɗa paŋ, ku ziyi edi hilu gaini gir maini arzaŋ n’e hiliyiŋ arni afu par nɵa.

¹¹Ku hiniyi war azaw, ku tika zak na guma midiyi.

¹²Ku hiniɗi ɗai zi plasai e kirpiyi, mi vigi arni afu gaini yem, amma tiyana ku piliyisi edi, ku siyi der viya.

¹³Aga mu halaɗi amlai warni dalam na wiiku gaini ɓaka zi yi, mu va ɵinini-ha na mu zuŋku ɗa amai.

¹⁴Na ma a muɗaŋ, n’a niya edi war ma par wa hlai na mu naka war gir.

¹⁵Aga mu zuku ɓaka zi yi gaini farai na gaini liki gaini adumai na maɵagai gaini wazagai zi ɗûgûdi zi lûgûzi, aga mu za ɓaka gaini garakai gaini yaakai na maɵagai lai. Sela

¹⁶Hilisi, ɵini, tiki paŋ na ki sini hormo wiini Alaw ɗa, aga mu virniki wala n’Alaw a zaŋ buriya ɗa.

¹⁷Mu ɗuula sini gaini ma, mu kolaŋ gaini ma lai.

¹⁸Hiini na meefeŋ a nafu warɗi agula ɗa, EPIƊ-ƊAI aga a ɵina ma kai.

¹⁹Amma Alaw a ɵina ma, a zibura siiwaŋa lai.

²⁰Kol sini Alaw, n’a bula edi sini siiwaŋa kai, pɗemni n’a zaŋ sa ɗa a hinaŋ kaalai.