Read Mousgoum Yama na wiini David 69 Bible Online

Yama na wiini David 69 - Mousgoum bible

Yama na wiini David 69

¹Yama na wiini David n’e tikiŋsi war maktuɓ na wiini abai na midini yama par, n’e ziniŋ gaini adill zi sogom.

²Alaw wiya, kurɗaŋa, buri ɓa yem a yimaŋa haa amai wula ta.

³M'an na arni ŋoroɓok n’aza a ɗiya kai, mu na niya azumai pin yem na hulum, yem a na hala gaya.

⁴Mu ɗuula haa mu kaya li, wula a siita kaŋ, ara a kaya tin bayai na mu baya Alawŋa ta.

⁵Nagai n’e diriŋa kai kadai meere ɗa, viyaɗi a suwa ayir na mada ɗa, nagai n’e piyi aŋ fiɗiŋa pin wala ktai ta kai ɗa, e ɗa spak gara. Wala na mu halaŋ kai tekeɗe kaw, a dewele ɓa mu vurgaŋ.

⁶Alaw wiya, ku sɗa duuli na wiya ya. Meefeŋ na wiya aŋ gaini ŋûyi wuzani arku kai.

⁷EPIƊ-ƊAI, Alaw zi Spak paŋ, hiniɗi nagai n’e biyi war tuku siyer a yimiɗi buriya kai. Alaw na wiiɗi Izrayel, nagai n’e piyuku ɗa, ku hina siyer a duguɗi buriya kaalai.

⁸Buri ɓa, mu yima tirki sa na ɗa buriku, ara a yima amai tin siyer kai na ɗa buriku;

⁹mu bunda aŋ ɗif na ɗai e siɗiŋ kai arbaɗi zagalakaiya, aŋ morkoi arbaɗi aliɗi ama lai.

¹⁰Buri hiini n’aŋ wara midini Dalam na wiiku ɗa a ya amlai wara ahini afu nɵa, tirki na wiiɗi nagai n’e turkuku, a pa ɗa sa.

¹¹Mu tuwa, mu tika sai, a bunda buriya ɗa aŋ tirki.

¹²Mu wa sapa zi tuwi li sa ɗa, mu bunda aŋ awala zi yewere.

¹³Nagai n’e simniwar faada ɗa, e miɗi ɗa gaya, nagai zi ci suwil ɗa e zi yama gaya lai.

¹⁴Ammata mu siiwuku, EPIƊ-ƊAI, Alaw wiya, za yimku sa tiyana, buri pɗemku n’abai, wayaŋa seŋ pin jreku gaini pli n’edi na wiiku lai.

¹⁵Yimaa edi arni ŋorɓok ɗa par kaai, hinaŋa mu ɓla azumai sek kai, plaŋa edi tiɗi nagai n’e diriŋa kai ɗa par, min yem na hulum par lai.

¹⁶Hina yem a hala gaya kai, hina waŋ a rɓaŋa kai hina kalaŋ a doogo mada kaalai.

¹⁷EPIƊ-ƊAI wayaŋa seŋ, buri ɓa jreku ɗa pɗem gara. Pin hiinini haw na wiiku n’abai ɗa, bundasi arku sa.

¹⁸Ku bunda arku edisa ta na ɵeŋku ar kai, wayaŋa seŋ witaw, buri ɓa m’aŋ war gir.

¹⁹Torosi sa gobi, kurɗa suŋfaŋa, plaŋa edi tiɗi gawŋa par.

²⁰Tuku ku sɗa tirki n’e ɗa tirkiŋa, siyer n’e tikiŋa gaini miisi n’e ɗa miisiŋa, gawŋa paŋ e ɗa wuzani arku.

²¹Tirki ɗa, a mula sirdaiŋa ca, mu bunda veglek, mu baya ɓa ɗif aga a hiina haw buriya ɗi ɗa, ɗif ara kai. Mu paya ɗif n’a saŋa arai zi pi, amma ɗif aŋ kaalai.

²²Gawŋa e zi wala zi fiɗi ɗai arni simi, sai te yimaŋa li ɗa, e siŋa aŋ ci ɗa a vinegre.

²³Simi na wiiɗi na pɗamai a bunda buriɗi aŋ azaw, derɗi na viya lai aŋ ava.

²⁴A zuva ɓa arɗi a ŋulva a tala kir kai, ku hiniɗi kureɗ, gdaŋɗi a ɗiya amai kai.

²⁵Hina suwar na wiiku a kɵa midiɗi, hiyku na gdaŋ ɗa a yiɗi maini afu nɵa.

²⁶Kaŋɗi n’e pi warni a tuuura edi, ɗif a hina war gumuɗi kir kai.

²⁷Buri ɓa ɗif na tuku ku na zini gir ɗa, nagai e huuri midini e riyi girni ɗa amai.

²⁸Pɵa meefeŋ hanɗa mini meefeŋ na wiiɗi, ku za yimku siɗi kai.

²⁹Haza yikiɗi edi war maktuɓ zi suŋfa par, ku piɵiɗi gaiɗi na jrekai kaalai.

³⁰Ta ɗa, mu ɗif na murga, mu sɗa na ɗa a gir, Alaw wiya, kurɗaŋa, yimaŋa amai.

³¹Aga mu kola yikini Alaw gaini yama, aga mu siŋkiti abaini edi gaini zini tese.

³²Kol ɗa a firya agulni EPIƊ-ƊAI a suwa gari na gaini miyok na gaini tetrek ezini lai.

³³Na murgakai e tili hanɗa e firyi, tiki na ki piyi Alaw ɗa, wala a ziki kai.

³⁴Buri EPIƊ-ƊAI a ɵina miɗi na murgakai, nagai na wiini n’e ɗa war daŋgai ɗa, a hiniɗi edi kai.

³⁵Hlai n’amai gaiɗi yai a sini kol wiini Alaw, yem -ra n’abakai gaini wazagai na karni paŋ nɵa lai.

³⁶Buri ɓa Alaw a ga a kurɗiti Yeruzalem, aga a rga fuŋ n’abakai na Yuda ɗa amai, ɗaini aga e simni warni, aga e tikiŋ aŋ wiiɗi lai.

³⁷Aliɗi ɗai na wiini aga e tikiŋ aŋ bulum, nagai n’e diri yikini ɗa, aga e simni warni lai.