Read Mousgoum Yama na wiini David 7 Bible Online

Yama na wiini David 7 - Mousgoum bible

Yama na wiini David 7

¹Yama zi tuwi na wiini David n’a zinaŋ wiini EPIƊ-ƊAI burini Kus na war pinzibani Benyamin.

²Epiɗ-ɗai Alaw na wiya, mu ŋoya suku, koroŋa edi tiɗi nagai n’e ɗa e zini gir ɗa paŋ par, plaŋa edi.

³Sla kai ɗa, aga e ɓisiŋa edi maini gurnai nɵa, maini gurnai n’a yima wala li ɗa, ɗif n’a plaŋ mini par aŋ kai ɗa nɵa.

⁴Epiɗ-ɗai Alaw na wiya, na ɓa mu za li wala ktai na meefeŋ maini hanɗa ɵa: Mu za meefeŋ gaini ta,

⁵zaw na ɓa mu za meefeŋ sini ɗif n’aŋ gaya pɗem, zaw mu mula wazagaini gawŋa kadai meere ɗi ɗa,

⁶na ɓa mu za li maini hanɗa ɵa ɗa, a zuva ɓa gawŋa ɗa a tika futi pa a yimaŋa, a kirpaŋa azumai arni afti, a bubula hormoŋa azumai arni alogodo. Sela

⁷EPIƊ-ƊAI, fakasi amai gaini hiy, zina pa, faka amai siɗi gawŋa n’e ɗa gaya hiy ɗa, ɗiliɗi, tuku na k’apini jre ɗa, ɗiya ɵima zaw, giɗimaŋa.

⁸A zuva ɓa pinzibaɗi ɗai paŋ e gunuku azumai, amma tuku, waya amai par midiɗi.

⁹EPIƊ-ƊAI, ziɗi sariya wiiɗi ɗai ɗa, EPIƊ-ƊAI, zaŋa sariya, pini jreŋa gaini ɗikatŋa.

¹⁰Ɗiya meefeŋ na ɗai na maafanai e ziŋ ɗa, sini gdaŋ wiini ɗif na jre ɗa, tuku na ku sɗa wala n’a na amlai war hiinini ɗif, Alaw na jre.

¹¹Gamarŋa n’a kotoŋa ɗa a Alaw, a ni n’a kûriɗi nagai n’agulɗi ɗikat ɗa.

¹²Alaw a ɗif zi ɗûkliti sariya na jre, amma a za hiy mefeŋ paŋ sini meefeŋ.

¹³Na ɓa ɗif na meefeŋ a bunda payaini kai ɗa, a luɓa mini kaɵkarni sini, a rga tanni, a tikiti ɓurwi war tan sini lai.

¹⁴A zizina wazagai zi gaw zi fiɗi ɗif burini, a zizina ɓarawai zi ɵi afu pini hlai burini lai.

¹⁵Tili, a tika fel na wiini meefeŋ, a ziya ɗa a gir, a poko ɗa a eles lai.

¹⁶A ɓula waŋ na hulum tiɓ, amma ni dama a kɵa warni waŋ n’a ɓulaŋ ɗa.

¹⁷Meefeŋni n’a zaŋ ɗa a wayasi midini, garmas n’a zaŋ siɗi ɗai ɗa aga a kɵa midini lai.

¹⁸Aga mu sa kol sini EPIƊ-ƊAI buri jreni, aga mu kola yikini Epiɗ-ɗai Alaw n’amai gaini yama.