Read Mousgoum Yama na wiini David 71 Bible Online

Yama na wiini David 71 - Mousgoum bible

Yama na wiini David 71

¹EPIƊ-ƊAI, tuku ku hlai zi ŋoyai na wiya. Ku hina siyer a yimaŋa duk kai.

²Tuku ku na ɗikat, plaŋa edi, hinaŋa mu pra edi, zagasi ɵimaku ma, kurɗaŋa.

³Bunda buriya aŋ huwuŋ na mu ŋoya siɗi, -tuku ku muɗaŋa buri mu lawasi woni kûreɗ-kûreɗ, kapai mu kurɗa. Buri ɓa tuku ku huwuŋ na wiya, ku ɵaga na wiya.

⁴Alaw wiya, ku hinaŋa tiɗi na maafanai kaai, tiɗi ɗai na jrekai kai gaiɗi na karasai kaalai.

⁵Alaw EPIƊ-ƊAI, mu pɵa na ɗa muduku, haa war agwiya par, mu baya na ɗa war tuku.

⁶Haa warɗi ama par, ku zina pa na ɗa ɗa ku tuku, ku waŋasi edi warɗi ama par ku tuku, mefeŋ paŋ mu zina yama gaiku.

⁷Buriɗi ɗai viya, mu wala zi hiila, amma tuku kuhlai zi ŋoyai na wiya na gaini futini.

⁸Hina ma a va gaini kol na musaŋ suku, mukuliti abai na wiiku, mefeŋ mefeŋ paŋ.

⁹Won hlai na mu za li wel ɗa, ku hinaŋa edi kai. Gdaŋa a vada li ɗa, ku mula tuku edi pa kai.

¹⁰Buri ɓa gawŋa e ɗa miɗi gaya, nagai n’e mili arɗi pa ɗa e kiti miɗi mada.

¹¹E miɗi ɓa: alaw a hinaŋ edi mak, tiki futi pini, ymiŋ, ɗif n’a ɵaŋ tumu par aŋ kai.

¹²Alaw wiya, ku hinaŋa edi kai Alaw wiya, halasi witaw, zina pa.

¹³Nagai n’e pi gaya ɗa, siyer a yimiɗi, e vidi edi, ngai n’e piyi aŋ ziŋa meefeŋ ɗa, e nivi tirki, siyer a duguɗi lai.

¹⁴Amma ta, aga mu baya tuku kureɗ; aga m kuluku a suwa a suwa pra.

¹⁵Aga mu muɗa edi midini jreku, gaini kûrɗi na ku kurɗaŋ lai, mefeŋ mefeŋ paŋ, buri a suwa suwai

¹⁶Aga mu muɗa wuza sek, midini sdaku n’abakai na ku zaŋ, Alaw EPIƊ-ƊAI, Aga mu muɗa edi midini jreku ɗa, jre na wiiku tuku ktai pal.

¹⁷Alaw wiya, tuku ku hitraŋa war agwiya par, haa tiyana mu muɗa edi ɗa a sdaku n’abakai.

¹⁸Nɵa, haa mu za wel, ayir na mada a bunda muɗukwi, ku hinaŋa edi kai. Kapai mu muɗa edi midini sda na ku zaŋ gaini gdaŋku wiini pinziba hanɗa, mu muɗa edi midini spakku, wiiɗi nagai paŋ n’aga e wii asakal sek ɗa lai.

¹⁹Alaw wiya, ɗikatku ɗa a na haa amai arni ɗugul ta, buri ɓa ku za wazagai n’abakai: Alaw wiya, na maiku ɵa ɗa asiya ɗa?

²⁰Tuku ku titimiyi gaini gir viya, mi siɗi gir viya lai, amma aga ku hiniyi karyi pra, aga ku yimaŋasi amai azumai war hulumni afti par.

²¹Aga ku riyiti abaiŋa amai, aga ku saŋa arai zi pi pra.

²²Ta lai aga mu kuluku gaini adill zi sogom, burini pɗemku Alaw wiya, aga mu ɵiɓa gaŋgraŋ buriku, tuku Alaw na sɗik na wiiɗi Izrayel.

²³Aga mu ɗuula gaini firyi, won hlai na mu zina yama gaini wazagai zi yama buriku, suŋfaɗi agula na ku plaŋsi edi ɗa aga a kuluku lai.

²⁴Ma aga a muɗa edi midini jreku mefeŋ mefeŋ paŋ nagai n’e piyi aŋ ziŋa meefeŋ ɗa, arɗi aga a yima amai kai.