Read Mousgoum Yama na wiini David 73 Bible Online

Yama na wiini David 73 - Mousgoum bible

Yama na wiini David 73

¹Yama na wiini Asaf, a jre, Alaw a pɗem buriɗi Izrayel, buriɗi nagai n’agulɗi hilu ɗa lai.

²Ta ɗa, aŋ kai agwi buri mu sirɓa edi warɗi futi na pɗemi par, agwi kai ɗa mu kɵafu na ɗa a kɵi.

³Buri mu nafu war sile siɗi nagai n’e kûli siɗi ɗa, war sile burini der na wiiɗi na maafanai ɗa lai.

⁴Wala ktai n’a huyiɗi aŋ kai, haa sini mriɗi, gaini liki ca ca, veglek war siɗi aŋ kai.

⁵Huwiyi n’a za siɗi ɗai ɗa, siɗi nagai ɗa aŋ kai, gir n’a za siɗi ɗai ɗa a vuga edi siɗi ɗaw.

⁶E ɵi kûlini-si wulaɗi maiɗi aiduwi ɵa, karai ɗa e wiŋ siɗi maini sapa ɵa,

⁷war mulukɗi ɗa, e tili siɗi amai midiɗi marɗi par, wazagai n’e hiiniŋ warɗi agulɗi ɗa a suwa gdaŋɗi.

⁸E zi yewere wiiɗi ɗai, e miɗi midini meefeŋ n’e ziŋ ɗa wiiɗi ɗai gaini gir n’e ziŋ wiiɗi ɗai lai, e miɗiŋ ɗa war kûlini-si.

⁹Miɗi ɗa a muɗa meefeŋ haa sini Alaw paŋ, Alsiɗi te miisa wazagai na midiɗi yai ɗa paŋ lai.

¹⁰Buri nɵa, ɗai e bindi e hili ɗa piɗi sek, e ci seŋɗi ɗa maini yem n’e ciŋ ɵa.

¹¹Ɗai na maafanai hanɗa e miɗi ɓa: Alaw a sɗaŋ maɵa maɵa ɗa? Alaw n’amai ɗa, siɗi ktai aŋ midini ɗi?

¹²Ɗai a maafanai e ɗa mani hanɗa ɵa, wala ktai n’a hûyiɗi aŋ kai, derɗi a riya amai sek ɵa.

¹³Kapai mu ziti agula edi hilu lai, mu ma ta edi ɓa, mu na ta war seŋ kaalai na ɗa kadai meere.

¹⁴Mefeŋ paŋ ɗa a gir ɗa ɵa, gorof par paŋ gir aŋsi mada.

¹⁵Mu muɗa fu ɓa mu muɗa maiɗi nagai ɵa ɗa, mu kasi na ɗa a tirki siɗi aliku ɗa.

¹⁶Nɵa mu hiina ɓa, mu paya aŋ ɵina ezini seŋ hanɗa, amma a tala ara gir gara.

¹⁷Haa mefeŋ na mu niya amlai war hlai na sɗik na wiini Alaw ɗa, kapai wala n’a na biyiɗi ɗai hanɗa a yima mada.

¹⁸Aakam, tuku ku miliɗi na ɗa midini hlai na gai jigi jak, na sirɓa, ku huguɗi na ɗa sini ɓilki n’edi.

¹⁹Gai yafai kai, e ɗi kir kai, gai vidi edi vat, hunai te vidiɗi edi vat.

²⁰EPIƊ-ƊAI, won hlai na ku ɵiya li amai war weseŋku par ɗa, aga ku hiniɗi e wiyisi war hiiniku kai, e vidi edi maini weseŋ n’a pɵa ɗif n’a ɵiya li amai ɗa, a na arni kir kai ɗa nɵa.

²¹Won hlai n’agula te naka te sawa, hiiniŋa lai a ɓilka suku na ɗa,

²²mu nafu na ɗa, yel mada kai, mu siɗa wala ktai ma kaalai, wuzani arku ɗa, mu nafu maini wala n’ezini puɗu nɵa.

²³Gai hanɗa paŋ ɗa, mu na kureɗ gaiku, ku yimaŋa ta.

²⁴Ku ɵa wuza war yel na wiiku, asakal par, ku kaŋa war abai na wiiku.

²⁵Ɗifŋa zamai n’amai war hlai n’amai ɗa asiya ɗa? Na ɓa ku tuku kai ɗa, wala zamai na mu firyaŋ warɗi yai aŋ kir kai.

²⁶Neŋ sa lai, agula lai, a kiɗa a tuura edi, amma Alaw ɗa a huwuŋ na wiya, a godai na wiya lai haa kureɗ.

²⁷Buri ɓa nagai n’e hinuku edi ɗa, e bi edi, ku dugiɗi miɗi nagai n’e ɵini muku kai ɗa lai.

²⁸Amma ta ɗa, simniŋa na gobi gaini Alaw, a derŋa n’abai, Alaw EPIƊ-ƊAI ɗa mu zaŋ aŋ hlai zi ŋoyai na wiya ta, kapai mu muɗa edi midini sdaku na ku zaŋ ɗa paŋ.