Read Mousgoum Yama na wiini David 77 Bible Online

Yama na wiini David 77 - Mousgoum bible

Yama na wiini David 77

¹Yama na wiini Asaf n’e tikiŋsi war maktuɓ zi yama na wiini Yedutuŋ abai na midini yama par.

²Mu yika Alaw gaini gdaŋŋa, mu yikaŋ gaini gdaŋŋa, aga a zaga ɵimani maa.

³War mefeŋ na m’aŋ warni gir ɗa, mu paya EPIƊ-ƊAI, duvuk ɗa ta amai pini Alaw nɵa yaw, mu kaya kai, mu dara arai-zi pi-kai.

⁴Mada a kɵa li gaini Alaw ɗa, mu nuuma, mu tika hiini li ɗa, sezeŋa a kwima. Sela

⁵Mu hina ara a doogo azumai kai, mu turla marwai, mu sɗa wala na mu muɗaŋ ɗa kai.

⁶Mu hiina midini meefeŋ n’a vuga ɗipar gaini buza n’a vuga a ɗipar ɗa lai.

⁷Duvuk ɗa, mada a kɵa gaini Alaw war yama na mu zinaŋ, mu hiina, mu zilba sa lai ɓa:

⁸EPIƊ-ƊAI a hina ɗif edi nɵa gamai lai ɗi, aga a za yumni sumu pra kai ɗi?

⁹Pɗemni ɗa a vada vad ɗi? Seŋni n’a muɗaŋ ɗa aga a vada edi nɵa marwai haa hlai n’a vada kai ɗi?

¹⁰Alaw ɗa, midini a wula gaini pɗem n’a zaŋ sini ɗif ɗa ta ɗi? War hiyni ɗa a dûguti agulni sini duk ɗi? Sela

¹¹Mu muɗa: Wala n’a fuɗaŋa sa ɗa ɓa: Spakni Alaw n’amai ɗa a na maini n’avut par ɵa kir kai,

¹²Mada aga a kɵa gaini sda n’abakai na wiini EPIƊ-ƊAI, mada aga a kɵa gaini sda n’abakai n’a bunda ɗif hiyak na ku zaŋsi ka ɗipar ɗa.

¹³Aga mu muɗa edi midini sdaku na ku zaŋ ɗa paŋ, aga mu hiina midini sdaku n’abakai ɗa lai.

¹⁴Alaw wiya, futiku ɗa a sɗik, alaw n’abai maiku tuku Alaw ɵa ɗa a na wata ɗa?

¹⁵Alaw n’a za wazagai n’abakai n’a bunda ɗif hiyak ɗa ku tuku. Ku siŋka spakku edi arɗi ɗai paŋ.

¹⁶Gaini spakku ku piliɗisi ɗai ɗa edi, pinzibani Yakob gaini pinzibani Yosef. Sela

¹⁷Alaw wiya yem a suɗuku ɓa, hunai a yimaŋ, huduk n’azumai ɗa lai a ziriya.

¹⁸Ɗugul zi faŋ a ɵa faŋ viya, arbani hlai n’amai ɗa, alaw a ɓara, wilɗi a ruva pit pit maini ɓaraw nɵa.

¹⁹Pini ɓarai na ku ɓara ɗa, wilɗi a za gaglai midiɗi yai paŋ war avuli vuli, afti a muguza, a ziriya.

²⁰Ku ɓisiti futi warni yem-ra n’abai, ku vuga arbani yem n’abakai, hlai na ku vuga woni ɗaw ɗa, ɗif a nava azuku kai.

²¹Ku ɵa wuzaɗi ɗaiku maini n’e ɵi wuzani farani farai nɵa, ku za hanɗa gaini Musus gaini Aaron lai.