Read Mousgoum Yama na wiini David 78 Bible Online

Yama na wiini David 78 - Mousgoum bible

Yama na wiini David 78

¹Hitri na wiini Asaf. Ɗaiŋa, jigi ɵimaki min gadaiŋa tiki hangalki sin seŋ n ma par ɗa.

²Mu dara mu muɗa war seŋ zi siŋka maini, midini wazagai n’a vuga aɗipar, na ɗai e siɗiŋ kai.

³Wala na tiyi mi ɵiniŋ, na mi siɗiŋ, na tamaiyi e miɗiŋyi lai.

⁴Aga mi ŋuyiŋ wuzaɗi aliyi kai, Aga mi miɗiɗi wiiɗi pinziba n’asakal sek midini sda zi kol na wiini EPIƊ-ƊAI, midini spakni gaini sda n’abakai n’a bunda ɗif hiyak n’a zaŋ ɗa lai.

⁵A sa gadai zi ɗiyi wiini pinzibani Yakob, a siɗi wiiɗi aliɗi Izrayel lai. A gidiɗi tamaiyi, buri e miɗi midini wazagai hanɗa wiiɗi aliɗi,

⁶kapai pinziba n’asakal sek ɗa e siɗiŋ, ali n’aga e wii ɗa, aga e miɗi midiɗi wazagai hanɗa wiiɗi aliɗi lai.

⁷Kapai nagai e tiki yimiɗi midini Alaw, midiɗi a wula gaini sda n’abakai n’Alaw a zaŋ ɗa kai, kapai e zi pin seŋ zi gadaini lai.

⁸Nagai aga e zi maiɗi tamaiɗi nɵa kai, pinziba na midiɗi gdaŋ n’e ɵini seŋ kai, n’e fiki amai sin Alaw, pinziba n’agulɗi a ɗiya won hlai ktai kai, na hiiniɗi a tika midini Alaw ktai kai.

⁹Pinzibani Efrayim na siɗi gai zizini gaini futini, n’e siɗi ɵiɓini ɓaraw lai, e rûvi wuzaɗi gawɗi war mefeŋ zi hatam.

¹⁰Buri e zi pin bonu n’Alaw a zaŋ gaiɗi kai, e diri e zi pin gadaini kaalai.

¹¹Midiɗi a wula gaini sdani n’abakai n’a zaŋsi, gaini wazagai n’abakai n’a bunda ɗif hiyak, n’a siŋkiŋɗi arɗi.

¹²Wuzani arɗi tamaiɗi, war Egipte, midini afti na Sowon, Alaw a za wala ktai n’a bunda ɗif hiyak.

¹³A ɓasa futi arni yem-ra n’abai, a vigiɗi warni ɗaw, a hina yem a rga amai maini daŋ nɵa.

¹⁴Girvudi ɗa a ɵa wuzaɗi gaini ɗugul, duvuk ɗa, gaini gaglai na wiini afu lai.

¹⁵A ɓasa huwaŋai edi war basga na kaɗataŋ, a siɗi yem e ci haa midini saiɗi ta, maini yem n’azumai par pini afti nɵa.

¹⁶Sin huwuŋ par a hina yem a naɓasi edi, a ka maini yem na war ra nɵa.

¹⁷Amma edi war basga na kaɗataŋ ɗa, e hili wuzaɗi gaini tuwur n’e ziŋ sini Alaw ɗa, e fiki amai sin Alaw n’Amai ɗa.

¹⁸E piyini min Alaw war agulɗi aŋ blaŋ, e zilbiŋ buri a siɗi simi na miɗi a daraŋ.

¹⁹E miɗi sin Alaw maini nɵa: Alaw a kiɗa a sumu simi edi war basga na kaɗataŋ hanɗa ɗi?

²⁰A jre, a ɵiɓiti huwuŋ, yem a kasi edi, a tika pini a ka war hlai paŋ. Tiyana ɗa, a kiɗa a sa ɓuk gaini neŋ wiiɗi ɗai ɵa lai ki ɗi?

²¹EPIƊ-ƊAI a ɵina hanɗa a za hiy ta, a faka gaini hiy sin pinzibani Yakob, a za hiy sin pinzibani Izrayel lai.

²²Buri e ɗiyi yimiɗi midini Alaw kai, e yimi ɓa a kiɗa a kûrɗiɗi nɵa kaalai.

²³Asakal par, Alaw a sa miɗi sin ɗugul zi faŋ n’arbani hlai n’amai, a mala min hlai n’amai ɗa edi lai.

²⁴A hinasi manna a yakasi amai par midiɗi maini faŋ n’a ɵa nɵa, a siɗisi algama n’amai par aŋ simi lai.

²⁵Asiya ɗi paŋ a suma simi na wiiɗi ɗai na gdaŋai ɗa, a siɗisi simi midini wiyamaiɗi ta ta.

²⁶Amai war hlai n’amai par, a fakasi smer na gdaŋ na piɗi futi na dawai par, pin spakni a kasi smer na war gal n’amai par.

²⁷A hinasi neŋ a yakasi amai par midiɗi maini alogodo nɵa, wala zi ɗifli lai maini kaikai n’agoɗom wulani yem-ra n’abai ɗa nɵa.

²⁸A kaŋsi a yakaŋ aha arbani kaŋɗi, anene par sini gumuɗi lai.

²⁹E simi haa e vi, Alaw a siɗi wala na miɗi a daraŋ ɗa lai.

³⁰Suunaɗi maa, a vada kai, simi n’aŋ miɗi maa e rɓiŋ kai hai,

³¹hiy na wiini Alaw a luɓasi midiɗi, a vidiɗi na gdaŋai n’arbaɗi edi, gaiɗi n’agogoi na war Izrayel ɗa lai.

³²Gaini hanɗa paŋ e zi tuwur ɗaai, e yimi sdakai n’abakai n’a bunda ɗif hiyak ɗa aŋ jre kai.

³³A vada mefeŋɗi gaini yafai kai, maini wala kadai nɵa, a vada buzaɗi ɗa, war hunai n’abai lai.

³⁴Won hlai n’Alaw a firya a fiɗiɗi ɗa, e tiki piɗi aŋ piyi zinai tini par, e wiyisi sini e piyi zinai tin Alaw par.

³⁵Midiɗi a kɵa ɓa, Alaw a huwuŋ na wiiɗi. Ɓ'Alaw n’Amai ɗa a ɗif n’a kûrɗiɗi.

³⁶Amma, e firyi e rhiŋ gaini miɗi, gaiɗi alesiɗi e miɗini jre kaalai.

³⁷Agulɗi te nafu gaini rgi sini gai futini kai. E ɗiyi jre war bonu n’Alaw a zaŋ gaiɗi kai.

³⁸Amma ni n’a va gaini hiinini haw, a haza meefeŋ na wiiɗi edi, vidiɗi edi kai. Kureɗ, a ɗala sini war hiyni, a hina suwarni a daba edi kai.

³⁹Alaw miini a kɵa lai ɓa, nagai ɗa e ɗi ɗai kadai, e ɗi smer n’a vuga li ɗa a vaisi kir kai.

⁴⁰E fiki amai sini azi viya, edi war basga na kaɗataŋ, e ɓilkini hiinini edi midini afti na kooloŋ azi viya lai.

⁴¹E wiyi aŋ piyini mini Alaw pra, aŋ divini agulni Alaw na sɗik na wiiɗi Izrayel.

⁴²Midiɗi a kɵa gaini spakni n’a zaŋ buriɗi kai, gaini mefeŋ n’a pliɗisi edi war tiɗi gawɗi par kai,

⁴³gaini wazagai zi siŋki n’a zaŋ aha warɗi Egipte ɗa kai, gaini wazagai zi hiila n’a zaŋ midini afti na Sowon ɗa kaalai.

⁴⁴A bunda tini ra Nil ɗa aŋ fel, arakai na ɵimani lai- ɗai n’Egipte e kiɗi aŋ ci yem hanɗa kir kai.

⁴⁵A ɵinasi abazani midiɗi, a limiɗi, a ɵinasi muguze, a turliɗi amai.

⁴⁶A hina hiɗini seyemɗi, gaini der na wiini sdaɗi lai wiini ayuwi.

⁴⁷A fuɗa luwuŋ zi vin na wiiɗi edi gaini wutiŋ, a fuɗa luwuŋ Sikomor na wiiɗi edi gaini hlai na ɗarak gara lai.

⁴⁸A hina ɵakaiɗi gaini adumaiɗi gaini haakaiɗi lai min wutiŋ, farani faraiɗi min afu n’amai par lai.

⁴⁹Alaw a hinasi hiyni a ya maini afu nɵa midiɗi ɗai n’Egipte, gaini suwar, gaini agul zi yi, gaini gir lai, a ɵina vokɗi ɗai zi ɵeŋ na wiini gir midiɗi lai;

⁵⁰A ɵa futi wiini suwarni su, a kutiɗi min mri par kai, A vidiɗi edi gaini vlak.

⁵¹A fiɗiɗi aliɗi ɗai n’Egipte n’e wii avut ɗa paŋ edi, nagai n’e ɗi merfeŋɗi tamaiɗi, n’e tili gdaŋɗi edi gaiɗi, na war pinzibani Kam.

⁵²A hiniɗi ɗaini e hili maini adumai gaini haakai nɵa, a ɵa wuzaɗi maini farani farai nɵa edi war basga na kaɗataŋ.

⁵³A ɵa wuzaɗi, a giɗimiɗi gaini futini, hunai te kiɗa te yimiɗi kai, Yem-ra n’abai ɗa a biɗi gawɗi.

⁵⁴Akiɗi tamaimu midini afti na sɗik, midiɗi huwuŋ n’a tikiti gaini gdaŋni.

⁵⁵A birgiɗi ɗai edi wuzaɗi, a ɓirwiɗi afti na Kanaan ɗa aŋ bulum ta ta, pinzibaɗi Izrayel paŋ ɗa, e nivi hlaiɗi zi simni n’ahaɗi ahaɗi.

⁵⁶Amma e piyini mini Ala n’Amai ɗa, e fiki amai sini, e yimi seŋ zi gadai na wiini ɗa kai.

⁵⁷Nagai lai e tikiti futi zamai, e zi meefeŋ lai maiɗi tamaiɗi nɵa, e ɗiyi cir kai maini taŋ na gai viyɗi nɵa;

⁵⁸E bindiŋ maswar gaini hlaiɗi zi ɓaka, e bindiŋ mesile gaini alawaiɗi zi rgi.

⁵⁹Alaw a tala wala hanɗa a faka gaini hiy, a hiniɗi Izrayel edi gamai.

⁶⁰A hinasi hlaini zi simni na war Silo ɗa edi, gumu n’a sumna arbaɗi ɗai warni ɗa lai.

⁶¹Zuŋduk zi bonu n’a siŋka spakni gaiɗi abaini edi ɗa, a hinaŋ war tiɗi gawni, e kiŋ edi midini afti zamai maini bege ɵa.

⁶²Alaw a za hiy siɗi ɗai na wiini, a hiniɗi e mri edi min gaw.

⁶³Afu a yiɗi aliɗi na gawlakai edi, yama zi kol na war tikiɗi ɓulamai ɗa aŋ kir kai.

⁶⁴Paakai zi ɓaka ɗa e mrisi edi min gaw, falakai na war greŋ ɗa e tuwi kai.

⁶⁵EPIƊ-ƊAI a fakasi amai maini ɗif n’aŋsi weseŋ nɵa, maini gaŋgalaŋ n’aŋsi gaini ciini gaini vin, n’arni a tika pini aŋ ɵara nɵa.

⁶⁶A fiɗiɗisi gawni piɗi asakal par, a duguɗi gaini siyer gamai.

⁶⁷Gaini hanɗa paŋ, a hiniɗi pinzibani Yosef ɗa edi, a viriɗi pinzibani Yosef ɗa kaalai.

⁶⁸Amma a viriɗi e ɗi pinzibani Yuda, a diriti te huwuŋ na Siyon ɗa lai.

⁶⁹A rga hlaiɗi na sɗik ɗa maini hlai n’amai nɵa, maini afti n’ezini aŋ gai tûûri azumai haa kureɗ nɵa.

⁷⁰EPIƊ-ƊAI a vara David na ɗifni, a hala a payaŋsi edi pin farani faraini par.

⁷¹A yimaŋsi edi pin adumai n’alini a na ca fiyaw pini par, kapai a za aŋ ɗif zi gɗam na wiini pinzibani Yakob na ɗaini, na wiini pinzibaɗi Izrayel na bulumni.

⁷²David a ɵa wuzaɗi gaiɗi agul na hilu, a ɵa wuzaɗi gaiɗi tiy na te za wala na meefeŋ kai.