Read Mousgoum Yama na wiini David 85 Bible Online

Yama na wiini David 85 - Mousgoum bible

Yama na wiini David 85

¹Yama na wiiɗi alini Kore n’e tikiŋsi war maktuɓ zi yama na wiini abai na midini yama par.

²EPIƊ-ƊAI, tuku ku siŋka pɗemku sini aftiku, ku wiyiɗisi pinzibani Yakob n’e ɗisifu edi aŋ bagakai ɗa aha,

³ku siɗi ni burini meefeŋ na wiiɗi ɗaiku, ku haza tuwurɗi edi kafa, Sela

⁴Ku waya suwar na wiiku azumai, ku tika hiyku n’abai ɗa azumai lai.

⁵Wiyiyi aha wai kai ɗi! Alaw na ku kurɗiyi, ku taɓa piɗi agulku na te lumuku siyi ɗa kai,

⁶aga ku hina pini hiyku na ku zaŋ siyi ɵa haa kureɗ ɗi? Hiy hanɗa aga a vada edi kai ɵa haa sini piniziba n’asakal sek ɵa ɗi?

⁷Aga ku wayasi u siyi gdaŋ waryi, kapai e firiyi warku ɗa ku tuku kai ɗi?

⁸EPIƊ-ƊAI, siŋkiyi pɗemku, kurɗiyi edi kuruɗ lai.

⁹Nɵa aga mu zuɓura wala n’Alaw EPIƊ-ƊAI a muɗaŋ ɗa, buri a muɗa edi midini ɵeɗ na wiiɗi ɗaini gaiɗi marmakaini na jre, amma a zuva ɓa e wiyi war payaiɗi zi vilimi kai.

¹⁰Aakam, nagai n’e zini hormo ɗa, pli n’edi na wiiɗi a gobi, kapai abai na wiini te wayasi midini aftimu.

¹¹Pɗem gaini jre a nava marni, jre ɗikat gaini ɵeɗ a gobo marni.

¹²Jre ɗa te diyasi azumai par arni afti, jre ɗikat ɗa te halasi amai par ahani Alaw lai.

¹³EPIƊ-ƊAI gaini midini dama aga a sa simni na ɵeɗ, aftimu aga a sa seyemni lai,

¹⁴Jre ɗikat aga a halasi wuzani EPIƊ-ƊAI, ezini aga a ɓisiti futi azumai lai.