Read Mousgoum Yama na wiini David 86 Bible Online

Yama na wiini David 86 - Mousgoum bible

Yama na wiini David 86

¹Siiwa na wiini David. EPIƊ-ƊAI, zagasi ɵimaku ma, wayaŋa seŋ, buri mu ɗif na murga na haw lai,

²giɗima sunfaŋa ɗa, buri ta mu marmaiku na jre, tuku Alaw na wiya, kurɗaŋa ta na ɗifku, na mu ɗiya yimiŋa muduku ɗa.

³Hiina haw buriya EPIƊ-ƊAI, buri mu siiwuku mefeŋ paŋ na ɗa ku tuku,

⁴vaŋa gaini firiyi, ta na ɗifku ɗa. EPIƊ-ƊAI, mu maɗaɗi na ɗa suku sek.

⁵Buri tuku EPIƊ-ƊAI ku pɗem, ku sa ni burini tuwur; Pɗemku abai gara siɗi nagai n’e siiwi tuku.

⁶EPIƊ-ƊAI, zaga ɵimaku mini siiwiŋa, tika hangalku mini tûwiŋa na suku ɗa ta.

⁷War mefeŋ na m’aŋ war gir ɗa, mu siiwa tuku, buri ɓa aga ku wayaŋa seŋ.

⁸EPIƊ-ƊAI, arbaɗi alawai paŋ ktai na maiku ɵa aŋ kai, sdaɗi n’e ziŋ paŋ ɗa, ktai n’a kata gaini na wiiku aŋ kai.

⁹Pinziba na ku rgaŋ paŋ ɗa aga e hilisi, e hûrgi azumai wuzaku EPIƊ-ƊAI, e si kol sini yikuku lai.

¹⁰Buri ɓa tuku k’abai, ku za wazagai n’a bunda ɗif hiyak, Alaw ɗa ku tuku ktai.

¹¹EPIƊ-ƊAI, siŋkitiŋa futiku, kapai mu paya war jreku, ku saŋa hiini ktai warɗi agula kapai mu sini hormo wiini yikuku.

¹²EPIƊ-ƊAI, Alaw na wiya, aga mu kuluku gaiɗi agula paŋ, aga mu kola yikuku haa kureɗ lai.

¹³Buri pɗemku na ku zaŋ sa ɗa abai gara, ku plaŋasi edi azumai war hudukni hlai zi simni na wiiɗi ɗai zi mri par,

¹⁴Alaw wiya ɗai n’e kûli siɗi e fikisi amai sa, vokɗi ɗai na karasai e firiyi e fiɗiŋa, e ɗi ɗai na jaaɗi gaiku kai.

¹⁵Amma tuku EPIƊ-ƊAI, k’Alaw na ku hiiŋa haw, k’Alaw zi hangal lai, k’Alaw na ku luba seŋ, pɗemku abai, jreku abai lai.

¹⁶Bundasi arku sa, hiina haw buriya, saŋa gdaŋ wiya ta na ɗifku, kurɗaŋa ta n’ahiɗi bagaiku ɗa.

¹⁷Za wala zi siŋki ktai buriya ta, kapai gawŋa e tiliŋ siyer a ymiɗi lai! Buri ɓa, ku zina pa na ɗa ku tuku EPIƊ-ƊAI, ku saŋa arai-zi-pi na ɗa ku tuku lai.