Read Mousgoum Yama na wiini David 9 Bible Online

Yama na wiini David 9 - Mousgoum bible

Yama na wiini David 9

¹Yama na wiini David n’a tikaŋsi war maktuɓ zi yama na wiini abai na midini yama par, n’a zina gaini wazagai n’e zini yama gaini.

²EPIƊ-ƊAI, mu na zuku tese gaiɗi agula paŋ, aga mu muɗa edi midini sda n’abakai na ku zaŋ ɗa.

³Mu didima gaini firiyi buriku, mu kola yikuku gaini yama lai, Alaw n’amai.

⁴Won hlai na gawŋa e wiyi gaini duɓaɗi, eziɗi a turma, e vidi edi wuzani arku par.

⁵Buri ɓa ku siŋka jreŋa ɗa edi, ku zitiŋa sariya na jre, ku sumna midiɗi paramaiku zi pai, aŋ ɗif zi ɗûkliti sariya na jre lai.

⁶Ku ziɗi gir wiiɗi pinziba n’edi par, ku vidiɗi ɗai na maafanai edi. Ku haza yikiɗi edi gamai haa kureɗ.

⁷Gawyi e ɗi kir kai, e vidi edi gamai, fuŋɗi n’abakai maa ku vadaŋ edi kafa, midini ɗif maa a kɵa gaini kir kai.

⁸EPIƊ-ƊAI aŋ warɗi paramaini zi pai gaini siiwi ta, a ɗiyiti paramaini gdeŋi buri zini sariya.

⁹Ni ɗa a ziti sariya wiiɗi ɗai na midiɗi yai paŋ war jre, a za ɓraw arbaɗi ɗai kai.

¹⁰A zuva ɓa EPIƊ-ƊAI a za aŋ hlai zi ŋoyai na wiini ɗif n’a na sɗa gir, aŋ hlai zi ŋoyai na war mefeŋ zi gir.

¹¹A zuva ɓa nagai n’e sɗiku ɗa e tiki yimiɗi muduku, buri ɓa tuku EPIƊ-ƊAI, ku hiniɗi nagai n’e piyuku ɗa edi kai.

¹²Zini zi kol sini EPIƊ-ƊAI n’a tikiti paramaini zi pai war Siyon, miɗi edi midini sdani n’abakai n’arbaɗi pinzibaɗi ɗai.

¹³A na piyiɗi nagai n’e ɗa ɵiɓi belek ɗa, midini a wula gaiɗi nagai n’e nivi fiɗi n’edi kai, tuywi na wiiɗi nagai na haw ɗa midini a wula gaini tuwiɗi kai.

¹⁴Hiina haw buriya EPIƊ-ƊAI, tala gir na gawŋa e ɗa ziŋŋa mada ɗa, tuku na ku kurɗaŋasi mini magalani mri par.

¹⁵Nɵa kapai wuzani vokɗi ɗai na Yeruzalem ɗa, mu muɗa edi midini wala paŋ n’a hogoŋa aŋ sa kol suku gaini yama ɗa, aŋ dedema gaini firiyi lai buri kûrɗi na ku kurɗaŋa.

¹⁶Pinziba n’edi par e kɵi war waŋ na nagai e ɓiliŋ ɗa, azaw n’e giniŋ ɗa a yima eziɗi.

¹⁷EPIƊ-ƊAI a siŋka sini edi, a ziti sariya war jre a yimiɗi ɗai na maafanai warni azaw na nagai e giniŋ ɗa. Wala zi yama a tuwa. Sela

¹⁸A zuva ɓa ɗai na maafanai paŋ e wiyi war hlai zi simni na wiiɗi ɗai zi mri, pinziba n’edi par na midiɗi a wula gaini Alaw paŋ.

¹⁹Zaw kai, Alaw midini a wula gaiɗi na murgakai ɗa kai, biyi na pini ɵeɗ na wiiɗi na haw a ɓa edi duk kai zaŋ.

²⁰Fakasi amai fak kai ɗi EPIƊ-ƊAI, ku hiniɗi ɗai e rɗi amai muduku kai, a zuva ɓa pinzibaɗi ɗai n’edi par paŋ ku ziɗi sariya ku tuku.

²¹Hina hunai n’abai a yimiɗi, kapai a yima midiɗi pinziba n’edi par ɓa nagai e ɗi ɗai kadai meere.