Read Mousgoum Yama na wiini David 90 Bible Online

Yama na wiini David 90 - Mousgoum bible

Yama na wiini David 90

¹Siiwa na wiini Musus, na ɗif na wiini Alaw. EPIƊ-ƊAI, tuku ku naka ku hlai zi ŋoyai na wiyi war vuna vuna paŋ.

²Wuzani hlai na huwoŋai a rga kai hai, na yai gaiɗi duniya a za kai hai lai, war hlai n’a vada kai par, haa hlai n’a vada kai, tuku k’Alaw ɵa.

³Ku waya ɗif azumai arni afti, ku miɗini ɓa: Ɗif murɗek, waya arni.

⁴Buri ɓa wuzani arku ɗa, buza dubu ɗaw ɗa a na maiɗi yuvai na ɗiibi na te vuga ɗa nɵa, maini galni hlai ktai na duvuk ɗa nɵa.

⁵Tuku ku tika suŋfani ɗif, a yafa viya kai maini hlai na war weseŋ nɵa, na gorof par a vuga maini evek n’a diya nɵa.

⁶Gorof par ɗa a za fler a wula, koskoi a siita a huula lai.

⁷Gdaŋyi a vada edi tiɗi hunai na wuzaku, suwar na wiiku a miliyi hunai piyi abai gara.

⁸Ku gaŋa meefeŋyi amai wuzani arku gaŋ, wazagai na mi ziŋ war ŋoyai ɗa ɗe, aŋ war gaglai wuzani arku ɗa lai.

⁹Mefeŋyi a vada na ɗa burini hiy na wiiku, buzayi ɗa a vada na ɗa maini nuumi na ɗif a nuuma azi ktai nɵa.

¹⁰Buzayi a suwa li ɗa a doogo doogo muguzak, na gdaŋai e zi li gara ɗa a doogo doogo mitwis, n’a suwa hanɗa li ɗa, a kasi ɗa a kayai gaini gir meere, buza ɗa a vuga goppa, tiyi mi ɗifliɗi lai.

¹¹N'a sɗa gadaŋni hiyku ɗa asiya ɗa? N'a sɗa hiyku, n’a huguɗi ɗai aŋ suku hormo ɗa asiya ɗa?

¹²Hitraiyi aŋ pɵi mefeŋyi gaini futini, kapai mi siɗi aŋ nivi yel warɗi agulyi.

¹³Waisi, EPIƊ-ƊAI, pini hiyku ɵa haa kaswata ɗa? Hiina haw buriyi tiyi na ɗaiku ɗa,

¹⁴Gorof par tar, ku viyi gaini pɗemku, aga mi ɗûûli gaini firiyi haa sini dibini suŋfayi.

¹⁵Mefeŋ yaw, mi ɗifu war gir, buza yaw war gir lai. Tiyana ɗa, ku siyi mefeŋ zi ɵeɗ ɵa ta lai.

¹⁶Hina sdaku na pɗamai a siŋka edi aryi tiyi na ɗaiku, Jufku a siŋka edi arɗi aliyi lai.

¹⁷A zuva ɓa hangal na wiini EPIƊ-ƊAI, Alaw na wiimu a sumna midiyi, sda na mi ziŋ gaini tiyi paŋ, ɵaŋ edi pɗem su, Aakam, sda na mi ziŋ gaini tiyi paŋ ɗa ɵaŋ edi pɗem su.