Read Mousgoum Yama na wiini David 97 Bible Online

Yama na wiini David 97 - Mousgoum bible

Yama na wiini David 97

¹Pai ɗa a EPIƊ-ƊAI, hina afti paŋ a va gaini firiyi, wudi na gaini abaini paŋ a firya lai.

²Ɗugul gaini gegeŋ a gunaŋ amlai gun, Jre-ɗikat gaini ɗiyi na midini gadai ɗa a wala na paramaiku te tika midini.

³Afu a halaɗi wuzani, a yiɗi gawni n’e guniŋ azumai ɗa edi lai.

⁴Wilɗi na wiini ɗa, a za gaglai midiɗi yai paŋ, afti a tala hanɗa a jiriya.

⁵Huwaŋai a hiliya maini analam nɵa, wuzani EPIƊ-ƊAI, wuzani Epin-gezaɗi yai paŋ.

⁶Hlai n’amai ɗa a muɗa edi midini jreni, ɗai paŋ e tiliti abai na wiini.

⁷Nagai n’e zi ɵeŋ na wiini alawai na zamai ɗa, siyer aga a yimiɗi, siyer aga a yimiɗi nagai n’e kûli siɗi gaini alawaina jrekai na wiiɗi ɗa. Alawai paŋ aga a hurga azumai wuzani.

⁸EPIƊ-ƊAI, fuŋ n’abai na Yeruzalem, aga a ɵina hanɗa, a firya, fuŋ n’abakai na Yuda ɗa a firya lai, Buri sariya na ku ɗiyaŋ ɗa.

⁹Buri ɓa tuku EPIƊ-ƊAI, k’Alaw n’Amai, n’amai par midini afti paŋ par, ku na amai par midini alawai paŋ par.

¹⁰Tiki paŋ na ki diri EPIƊ-ƊAI ɗa, bili gaw sini meefeŋ, ni a giɗmiɗi marmakaini, a pliɗi edi tiɗi ɗai na maafanai par.

¹¹Burini ɗif n’a ɵina min Alaw ɗa, gaglai aga a ŋala, buriɗi nagai n’agulɗi hilu ɗa, firyi aga a za lai.

¹²Tiki na ki ɵini min Alaw ɗa, firyi war EPIƊ-ƊAI, kûliŋ gaini yama, yiki yikini na sɗik.