Read Mousgoum Seŋ joro 1 Bible Online

Seŋ joro 1 - Mousgoum bible

Seŋ joro 1

¹Seŋ joro na wiini Salmun n’ahini David, pai na Izrayel.

²Seŋ joro hanɗa a na buri ɓa a hitriɗi yel wiiɗi ɗai, a siɗi siɗi, a zina piɗi aŋ siɗi hulumni seŋ,

³a hitra ɗif aŋ paya payai zi yel, aŋ paya war jre, aŋ ɗiya war jre, war ɗikat lai,

⁴aŋ sa yel wiiɗi nagai na gaini ŋiiyi war seŋ kai, aŋ sa siɗi gaini hiini na hulum wiiɗi na agogoi lai,

⁵ɗif zi yel n’a na talaŋ ɗa a nava wala warni par. Zi siɗi ɗa kaw a nava yel warni par lai,

⁶a na buri a siŋka ezini seŋ joro zamai zamai edi gaini seŋ zamai n’a ɵina gir na war hitri na wiiɗi ɗai na yalakai lai.

⁷Hormo na wiini EPIƊ-ƊAI a pi zi tiki na wiini siɗi, yel gaini siɗi, e piyiŋ kai ɗa e ɗi ɗai zi duulakai.

⁸Ahiya, yima gadai na wiini apuku, ku miisa wazagai na amuku te hutruku midini ɗa kai,

⁹buri ɓa a na maiɗi bogorai na juvi na muduku nɵa, maiɗi aiduwi na wulaku nɵa.

¹⁰Ahiya, na ɓa marku na payaiɗi meefeŋ e diri e wuluku azuku ɗa, ku ɗiya siɗi kai.

¹¹Na ɓa e muɗuku ɓa halasi gaiyi, ŋuyumu ezini hlai cok mu fuɗumu ɗai edi, cukuɗumu ɗai n’e zi wala na meefeŋ kai war ŋoyai aŋ blaŋ,

¹²mu rɓuɗumu karɗi maini hlaiɗi ɗai zi mri n’a rɓa ɗai nɵa, mu rɓuɗumu gaini siɗi paŋ maiɗi ɗai n’e niyi azumai war waŋ ɗa nɵa.

¹³Aga mu nuvumu der na gaini futini pini nafarni kiini kiini, aga mu vumu dalammu gaini der hanɗa.

¹⁴Halasi, aga ku nava geɗel na wiiku gaiyi, buri ɓa godaimu te za fu na ktai ta.

¹⁵Ahiya, ku hala gaiɗi kai, ku tika futi piɗi kai,

¹⁶Buri ɓa e rivi na pini zini meefeŋ, e pirmi aŋ fiɗi ɗai lai.

¹⁷Ɗif n’a na gana azaw, na ɓa wala zi ɗufli a talaŋ wuzani hlai ɓa ɗa, a guna war hlaini kir kai.

¹⁸Amma nagai ɗa e gûni azaw na ɗa wuzaɗi nagai dama, e yimi gaini na ɗa a siɗi dama lai.

¹⁹Nagai n’e hili wazagaiɗi marɗi ɗa, aga e vidi edi maini nɵa, hil ɗa aga a ɓa suŋfani ni n’a na hala ɗa lai.

²⁰Yel a na ɗuwula anene war futi na agogoi paŋ, a na ɓaka war hlai na ɗai e tipi woni ta ta ɗa paŋ.

²¹War dagrani futi na ɗai e tipi warni viya gara ɗa, yel a na yika ɗai, War faada na war fuŋ n’abai a na sa miɗi edi maini nɵa:

²²Tiki na gaini ŋiyi war seŋ kai ɗa, aga ki simni ɵa haa kaswata ɗa? Tiki zi zi aniya ɗa, aga ki zi anya sa ɵa haa kaswa ta ɗa? Tiki na tatalakai, aga ki piyi siɗi kai ɵa haa kaswata ɗa?

²³Slini seŋ na mu na miɗiŋki ɗa, nɵa aga mu maaɗi sezeŋa miɗiki, mu sikiniki ezini seŋŋa zi miɗi ɗa lai.

²⁴Buri ɓa mu yikiki haa, amma ki diri sa kai, mu waɗi ta miki haa, amma jaani ɗif gaiɗi kai.

²⁵Dagai na mu siŋki paŋ ki pûkiŋ edi puk puk, arai zi pi na mu siŋki paŋ, ki yimiŋ maini wala kadai nɵa lai.

²⁶Hlai na gir aga a cosi miɗiki ɗa, ta aga mu riya piki gaini riyi, hlai n’aga ki ziriyi tiɗi hunai ɗa, ta aga mu ziki yewere lai.

²⁷Buri ɓa, mefeŋ ktai hunai aga te luɓasi miɗiki maini berber gdaŋ nɵa, gir aga a cosi miɗiki maini smer na gdaŋ nɵa, hunai gaini gir aga a tikiki miki lai.

²⁸Nɵa tiki aga ki yikiŋa, amma aga mu ɗiya siki kai, aga ki piyiŋa, amma ki niviŋa kai.

²⁹Buri ɓa ki ɗiyi sini siɗi kai, ki viri aŋ zini hormo wiini EPIƊ-ƊAI ɗa kaalai.

³⁰Buri ɓa e ɗiyi sini gadaiŋa kai, e ɗiyi sini arai zi pi na wiya kaalai.

³¹Tiyana ɗa aga ki nivi gir pini payai zi vilimi na wiiki ɗa, aga ki vi warki gaini wazagai na ki hiiniŋ warki aŋ ziŋ ɗa lai.

³²A fiɗiɗi ɗai na gaini niiyi war seŋ kai ɗa a humokɗi na gdaŋ ɗa, a biɗi na tatalakai edi ɗa a hiini n’aŋ kai ɗa.

³³Amma asiya ɗi paŋ n’a ɵina seŋŋa a sumna ɵeɗ, gaini hangalni, a huna wuzani gir kai.