Read Mousgoum Seŋ joro 10 Bible Online

Seŋ joro 10 - Mousgoum bible

Seŋ joro 10

¹Seŋ joro na wiini Salmun Ahi zi yel ɗa a sa firiyi wiini epini ahi na tatala ɗa a ɓulka hangalɗi emini.

²Der na ku navaŋ war jre kai ɗa a zuku nava kai, amma payai na jre ɗa a pla ɗif edi mini mri par.

³EPIƊ-ƊAI a hina ɗif n’a za pɗem a sɗa gir tiɗi wiyamai kai, amma nagai n’e zi meefeŋ ɗa, a siɗi wala na sunaɗi midini ɗa kai.

⁴Ti na malam ɗa a kasi murga pini ɗif, ti n’a za sda ɗa a kinisi farai lai.

⁵N'a haɗa seyem amsai ɗa, ni a ɗif zi yel, amma ni n’a kala weseŋ war sartini ni ɗa, a ɗif zi miisi.

⁶Ɓiki aŋ midini ɗif na jre ɗa, amma miɗi zi kal ɗa aŋ war miɗi ɗai na maafanai.

⁷Ɗif n’a za pɗem, midiɗi ɗai a kɵa gaini sdani na pɗem ɗa, a siɗi firiyi, amma nagai n’e zi meefeŋ ɗa koo yikiɗi maa midiɗi ɗai a wula gaini.

⁸Ɗif zi yel ɗa a yima gadai, amma zi vilmi ɗa a ɓa ɗa a sini.

⁹Ni n’a paya war jre a paya hunai pini kai, ni na payaini ɗikat kai ɗa, pini aga a wa amai.

¹⁰Ni n’arni sini jre ca amma a ŋoyaŋ wuzaɗi marni ɗa, a kasi midiɗi ɗa a gir, amma ni n’a miɗiɗi jre arɗi ɗa a kasi ɗa a ɵeɗ.

¹¹Mini ɗif na jre ɗa te kiliŋi zi suŋfa, amma miɗi ɗai na maafanai a ɓulka ɗa a hangalɗi ɗai.

¹²Bilini-gaw ɗa a glasi hiy, amma diri a meefeŋ paŋ.

¹³Ɗif zi siɗi ɗa yel aŋ war mini, amma ni na hangalni a kiɗa kai ɗa, a ɓurwa gaini ɵiɓi kai.

¹⁴Ɗai na yalakai ɗa e giɗimi siɗi na wiiɗi maini godai nɵa, amma nagai zi vilmi ɗa, a ɓilki n’edi n’a na gobi.

¹⁵Farai na wiini ɗif zi farai ɗa a fuŋ n’abai zi ɵaga, amma wala n’a ɓilkiɗi ɗai na murgakai a haw na wiiɗi ɗa.

¹⁶Der na wiini ɗif na jre ɗa a zina pini war simnini, amma der na wiini ɗif na meefeŋ ɗa a za gaini ɗa a meefeŋ.

¹⁷N'a yima hitrai ɗa a tikiti na ɗa te futi zi suŋfa, amma n’a ɵina gadai kai ɗa a ɓa ɗa a sini.

¹⁸Ɗif n’a ɵiɓa gaini warni ɗa a ɗif zi rhai, n’a muɗa zaida z'eles midiɗi marni wuzani sek sek ɗa a ɗif zi dûûli.

¹⁹Ɗif n’a ɓaka sariya gara ɗa, a mula mini zini tuwur par kai, amma ni n’a caka sini war seŋ zi miɗi ɗa, ni a ɗif zi yel.

²⁰Seŋ na mini ɗif na jre ɗa a arzaŋ na gaini futini, amma hiinini ɗif na meefeŋ ɗa, a nava wala kai.

²¹Miɗi na mini ɗif na jre ɗa, a zina piɗi ɗai viya, amma na duulakai e mri buri ɓa yel midiɗi kai.

²²A za ɗif aŋ ɗif zi farai ɗa a ɓiki na tini EPIƊ-ƊAI par, was na wiini ɗif ɗa a kasi wala ktai amlai mini kai.

²³Ɗif zi ddûûli ɗa a tala sda zi siyer ɗa arni maini wala zi dawaŋ nɵa, ɗif zi siɗi ɗa a tala yel ɗa arni nɵa lai.

²⁴Wala na ɗif na meefeŋ a hunaŋ wuzani, a za sini ɗa a ni ɗa, wala paŋ na ɗai na jrekai e firiyiŋ ɗa, a sa siɗi lai.

²⁵Won hlai na smer na gdaŋ a vuga li ɗa, ɗif na meefeŋ balamni aŋ kir kai, amma na jre ɗa a gigiɗa kai sam.

²⁶Agiyiŋ ɗa a yiyipa arai, wala na hahaiaŋ ɗa a ɵaya sesiyeŋ lai, ɗif na malam ɗa a na maini nɵa lai, buriɗi nagai n’e yimiŋ war sda.

²⁷Ɗif n’a sini hormo wiini EPIƊ-ƊAI, a riya amai ɗa a mefeŋni, amma buzani ɗif na meefeŋ ɗa a faiasi amlai sek.

²⁸Biyi na pini ɵeɗ na wiini ɗif na jre ɗa a vada war firiyi, biyi na pini ɵeɗ na wiiɗi na maafanai ɗa a mula edi kadai.

²⁹EPIƊ-ƊAI a giɗima ɗif na jre ɗa maiɗi ɵaga na sini fuŋ nɵa, amma buriɗi nagai n’e zi meefeŋ ɗa a ɓilkiɗi n’edi.

³⁰Na jrekai wala ktai maa aga a gigiɗi kai, amma na maafanai aga e hini midini afti ɗa kai.

³¹Mini ɗif na jre ɗa a muɗa yel, amma alsiɗi ɗai z'alasakai ɗa, aga te ɗukla edi.

³²Ɗif na jre ɗa a muɗa a seŋ na pɗamai, amma mini ɗif na meefeŋ ɗa a muɗa a seŋ zi rhai.