Read Mousgoum Seŋ joro 11 Bible Online

Seŋ joro 11 - Mousgoum bible

Seŋ joro 11

¹Kilo na gaini futini kai ɗa EPIƊ-ƊAI a firiyaŋ kai, amma a firiya gumani wala n’a tika gaini futini.

²Kûlini-si a cosi li ɗa, miisi aga a cosi lai, amma na yalakai ɗa e ɗi nagai n’e hûsi siɗi ɗa.

³Ɗiyi na war jre na wiiɗi ɗai na jrekai ɗa a ɵa wuzaɗi, amma yel na wiiɗi zi rhai ɗa a tûwiriɗi edi.

⁴War mefeŋ zi hiy na wiini Alaw ɗa, farai ɗa a nava kai, amma n’aga a puluku edi mini mri par ɗa a jreku ɗa.

⁵Jire na wiini ɗif na jre ɗa a ɗopa payaini, amma ɗif na meefeŋ ɗa a mra war meefeŋni ɗa.

⁶Jire na wiiɗi ɗai na jrekai a siɗi piliɗi n’edi, amma ɗai zi rhai ɗa e kɵi war azaw na wiini suna na wiiɗi.

⁷Won hlai na ɗif na meefeŋ a mra li ɗa, bayai na pini ɵeɗ na wiini a ɗiya ta, hiinini n’a tikaŋ midini farai ɗa a ɗiya ta lai.

⁸Ɗif na jre ɗa a kurɗa edi mini gir par, amma na meefeŋ ɗa a kɵa war balamni.

⁹Ɗif na jaani gaini Alaw kai ɗa a tûriɗi marni gaini seŋ na mini par, amma na jrekai ɗa e kûrɗi mini par barkani siɗi na wiiɗi.

¹⁰Won hlai na nagai na jrekai e ɗa war firiyi ɗa, fuŋ n’abai ɗa a firiya, amma hlai na ɗai na maafanai e mri li ɗa, a na ɗa a ɗuwal zi firiyi.

¹¹Barkani ɓiki na wiiɗi ɗai na jrekai, fuŋ n’abai a wula amai, amma miɗi na meefeŋ na wiiɗi ɗai na maafanai ɗa a tuuraŋ edi.

¹²Ni n’a miisa maini ɗa, a ɗif na yel midini kai, amma ɗif zi yel ɗa a muɗa seŋ kai.

¹³Ni n’a gna marni ɗa, koo ɓa a seŋ zi ŋoyai kaw a muɗaŋ paŋ, amma ɗif na hangal ɗa seŋ ɗa a ɓa warni.

¹⁴Na ɓa ɗif n’a sɗa yel zi ɵi wuze aŋ kai ɗa, ɗai ɗa e wili amai kai, rɗi n’amai ɗa a za sini vokɗi ɗai n’e si gadai ɗa.

¹⁵Ɗif n’a ɗiya sini mini tumuŋ na wiini ɗif na morkoi a kasi midini ɗa a hûwyi. N'a dara a wa sini war seŋ ni kai ɗa a nava hûwyi kai.

¹⁶Muni na juvi ɗa te nava ɗa a kol, ɗai na gdaŋai ɗe e nivi ɗa a farai lai.

¹⁷Ɗif n’a za pɗem siɗi marni ɗa, a zaŋ na sini ni dama, amma ni n’aga a za meefeŋ siɗi ɗai, a glasi na ɗa a gir midini ni dama.

¹⁸Ɗif na meefeŋ ɗa aga a nava vrak na pɗem pini sdani kai. Amma nagai n’e zi wazagai na pɗamai ɗa aga e nivi vrak na gaini futini.

¹⁹Buri nɵa, jreɗikat ɗa a ka sini suŋfa, amma ni n’a tika futi pini meefeŋ ɗa a hala na ɗa sini mrini sek.

²⁰Nagai na hiiniɗi ɗikat kai ɗa, EPIƊ-ƊAI a bla gaw siɗi, amma a za yum siɗi nagai na payaiɗi ɗikat.

²¹Koo kaswata ɗi, ɗif na meefeŋ ɗa aga a mula miɗi sariya par kai, amma pinzibaɗi ɗai na jrekai wala ktai ma aga titimiɗi kai.

²²Muni na juvi na hangalɗi a kiɗa kai ɗa, te na maini adoŋo zi or n’e wiŋ merfeŋ hoho ɗa nɵa.

²³Ɗai na jrekai ɗa e firiyi ɗa a pɗem ɵa, amma na maafanai e kiɗi e biyi ɗa a hiy n’abai ɗa ɵa.

²⁴Ɗif zamai ɗa tini a sa edi gara, faraini ɗa a riya amai sek sek bas, amma zamai ɗa a paya der haa a suwa pɗemni, a sa wala edi kai, a bunda murga sek sek lai.

²⁵Na tini a sa edi gara ɗa Alaw aga a sini viya, n’a sa yem miɗi ɗai ɗa, ɗai aga e sini yem mini ni lai.

²⁶Ɗai ɗa e miɗi meefeŋ sini ni n’a bla gaini algamani cok a wuraŋ edi kai ɗa, amma ni n’a kasi wiini a kosku ɗa e ɓikiŋ.

²⁷Ni n’a paya aŋ za pɗem ɗa, ɗai e firiyiŋ gara, amma ni n’a paya aŋ za meefeŋ ɗa, meefeŋ aga a navaŋ.

²⁸Ni n’a tika hiinini midini faraini ɗa aga a kɵa, amma ɗai na jrekai aga e gûɗi maini ɵimani luwuŋ nɵa.

²⁹Ɗif n’a glasi li tûrli aha warɗi pakataini ɗa, a haɗa smer, ɗif zi dûûli ɗa aga a bunda aŋ bege na wiini ɗif zi yel ɗa.

³⁰Sdani ɗif na jre ɗa a na maini luwuŋ zi suŋfa nɵa, ɗif zi yel ɗa ɗai e firiyiŋ paŋ.

³¹Na ɓa ɗai na jrekai e nivi vrakɗi warɗi yai ɗa, na maafanai gaiɗi na tuwarai aga e nivi kai ɗe?