Read Mousgoum Seŋ joro 12 Bible Online

Seŋ joro 12 - Mousgoum bible

Seŋ joro 12

¹Na a paya hitrai ɗa a paya ɗa a siɗi, n’a bla ei sini gadai ɗa a ɗif zi ɗûûwili.

²Ɗif n’a za pɗem ɗa a nava yum arni EPIƊ-ƊAI, amma ni n’a sɗa futini zini meefeŋ gara ɗa, EPIƊ-ƊAI aga a kûti sariya midini.

³Ɗif a bunda gdaŋ ɗa gaini zini meefeŋ kai, sirdaini ni na jre ɗa aga a gigi ɗa kai.

⁴Muni zi hormo ɗa te bogorai na wiini mafaɗi, muni zi tiki siyer wiini mafaɗi ɗa te dadalai na sini keɵkeni.

⁵Ɗai na jrekai ɗa e hiini midini zi n’e zi pini gadai, amma na maafanai e hiini ɗa a rhai n’e rhi marɗi.

⁶Miɗi na wiiɗi ɗai na maafanai ɗa a azaw zi fiɗi ɗai, amma na wiiɗi na jrekai ɗa a kûrɗiɗi edi mini mri par.

⁷Won hlai na ɗai na maafanai e kɵi li ɗa, wala a hina piɗi kir kai, amma pinzibaɗi ɗai na jrekai wala a muguzaŋ kai.

⁸Ɗif ɗa a nava kol pini hangalni na pɗem, amma ni na hiinini meefeŋ ɗa a hina mini tirki ɵa.

⁹Ɗif na ɗai e tûriŋ kai, amma aŋ gaini begeni aha su ɗa a suwa, ɗif n’a kola sini amma wala zi simi ahani kai ɗa.

¹⁰Ɗif na jre ɗa a sɗa hazani farani ya, amma ɗai na maafanai ɗa hiinini haw warɗi kai.

¹¹Ɗif n’a hirma vuwaini ɗa aga a nava wala zi simi viya, amma ni n’a tika futi pini wazagai n’a nava kai ɗa, a ɗif na hangalni a kiɗa kai.

¹²Ɗai na maafanai e zi suna sini der na wiiɗi ɗai jrekai kai, amma nagai n’e zi pɗem ɗa e ɗa gdaŋai e nivi der na pɗem lai.

¹³Miɗi na ɗewek na wiini ɗif na meefeŋ ɗa azaw na tuwur aŋ warni, amma ɗif na jre ɗa a mula mini gir par.

¹⁴Seŋ na mini ɗif par, a kiɗa a kinisi der viya, maini n’a navaŋ gaini sdani nɵa.

¹⁵Ɗai na dulakai e siɗi ɓa e zi na ɗa a meefeŋ nɵa kai. Amma ɗai na yalakai ɗa e yimi gadai.

¹⁶Ɗif zi dûûli ɗa a siŋka hiyni ɗa edi tizaw, amma ɗif na yel ɗa a yima tirki sini.

¹⁷Ni n’a muɗa jre ɗa a zina pini jre ɗikat, amma zaida z'eles ɗa a zina pini seŋ na jre kai.

¹⁸Ɗif na mini taf taf ɗa a za wuruk maini kaɵkar ɵa, amma alsiɗi ɗai na yalakai ɗa te kurgum.

¹⁹Seŋ na jre ɗa a fana viya, amma eles ɗa, a na burini hlai n’agwi kadai.

²⁰Amlai warɗi agulni ɗif n’a rga warni aŋ zi meefeŋ ɗa, a rhai. Amma amlai warɗi nagai n’e piyi ɵeɗ ɗa, a firiyi.

²¹Gir ktai maa a za sini ɗif na jre ɗa kai, amma nagai na maafanai ɗa gir siɗi viya.

²²Ɗai na alasakai ɗa EPIƊ-ƊAI a diriɗi kai, a diriɗi ɗa e ɗi nagai n’e zi jre ɗa.

²³Ɗif na yel ɗa a ŋoya siɗini warni, amma na tatala ɗa, a siŋka dûûlini edi.

²⁴Ɗif n’a za sda gdaŋ ɗa aga a ŋa, amma na malam ɗa aga a hina ɗa aŋ bege.

²⁵Hûwiyi ɗa a vada gdaŋni ɗif edi, amma labar na pɗem ɗa a sa firiyi.

²⁶Ɗif na jre ɗa, a ɗikita maini, amma futiɗi ɗai na maafanai ɗa te kiɗi war bi.

²⁷Ɗif na leŋ leŋ ɗa a kiɗa a fuɗa salak kai, jak jak ɗa, a der na pɗem.

²⁸Suŋfa aŋ warɗi futi na wiini jre-ɗikat, futi na sini mri sek ɗa t'aŋ gaini ɓisi gaiɗi futiɗi lai.