Read Mousgoum Seŋ joro 13 Bible Online

Seŋ joro 13 - Mousgoum bible

Seŋ joro 13

¹Ahi na yel ɗa a yima gadai na wiini epini, amma ahi na hiriŋ ɗa a ɵene gadai kai.

²Miɗi na pɗamai na mini ɗif par ɗa a kiɗa a navaŋ amma ɗai zi rhai ɗa saiɗi ɗa aŋ midini zini karai.

³Ɗif n’a giɗima mini ɗa a goda na ɗa sini, amma ɗif n’a muɗa kla kadai ɗa a ɓulka ɗa sini.

⁴Ɗif na malam ɗa a za suna pini wala amma a kiɗa a navaŋ kai. Amma ɗif n’a za sda gara ɗa, wala na sunani midini ɗa a navaŋ.

⁵Ɗif na jre ɗa a dara seŋ z'eles kai, amma ɗif zi meefeŋ ɗa a tirka marni, a kiɗisi siyer midiɗi lai.

⁶Jire-ɗikat ɗa a godo ɗif na payaini pɗem, ɗikat ɗa, amma meefeŋ ɗa a ɓulkiɗi ɗai na maafanai lai.

⁷Ɗif zamai a za sini aŋ ɗif zi farai kapai walani kaalai, na zamai ɗa a za sini murga, paŋ ktai wazagaini viya.

⁸Ɗif zi farai ɗa a sumna karni barkani faraini, amma ɗif na murga ɗa wala ktai n’a huwuyaŋ aŋ kai.

⁹Gaglai na wiiɗi ɗai na jrekai a ŋala gaini firiyi, amma lampa na wiiɗi ɗai na maafanai aga a mra.

¹⁰Kûlini-si ɗa a glasi sispai, amma n’e yimi gadai ɗa e ɗi ɗai na yalakai.

¹¹Farai na ɗif a navaŋ huɓ ɗa a ɓa maini smer nɵa, amma farai na ɗif a navaŋ agwi agwi ɗa a riya amai sek.

¹²Ɗif n’a baiya wala amma a navaŋ war sartini kai ɗa hiinini a bunda huruf, amma dirini ɗif n’a va amai li ɗa, a na maini luwuŋ zi suŋfa nɵa.

¹³Ni n’a yima seŋni ɗif kai ɗa a ɓa ɗa sini, amma ni n’a za pini gadai ɗa a ɓa kadai.

¹⁴Hitrai na wiini ɗif zi yel ɗa te kiliŋi zi suŋfa, a ɗala ɗif aŋ niya war azaw na wiini mri.

¹⁵Hangal na gaini tiki azumai ta ɗa a sa firiyi wiiɗi ɗai gara, amma futi na wiiɗi ɗai na maafanai ɗa a daba sini hlai ktai kai.

¹⁶Ɗif zi yel ɗa a za wala paŋ gaini hiini, amma zi dûûli ɗa a siŋka edi ɗa a giɵibini.

¹⁷Sleŋ na meefeŋ ɗa a kasi tûrli arbaɗi ɗai, amma ɵeŋ na jre ɗa a zizina hlai lai.

¹⁸Nagai n’e bili edi sini gadai ɗa aga e hini war haw, ɗai e miisiɗi lai, amma nagai n’e yimi gadai aga e nivi kol.

¹⁹Won hlai na dirini ɗif a va li amai ɗa a sini firiyi gara, ɗai na tatalakai e diri e bili edi sini meefeŋ kai na ɗa buri hanɗa.

²⁰Ɗif n’a paya gaiɗi ɗai na yalakai ɗa a bunda yel, amma ni n’a paya gaiɗi ɗai na tatalakai ɗa aga a nava hûwyi.

²¹Gir ɗa aŋ piɗi ɗai na maafanai su, amma pɗemi te na buriɗi nagai na jrekai lai.

²²Ɗif n’a za pɗem ɗa bulumni a hina haa siɗi tiyakaini, amma der na wiini ɗif na tuwur ɗa aga a sa sini ɗif na jre ɗa pra.

²³Vuwaiɗi ɗai na murgakai ɗa wala zi simi warni viya gara, amma ɗif na meefeŋ ɗa, agwiya agwiya haa gdaŋni a vada edi.

²⁴Api n’a ɵiɓa ahini kai ɗa a daraŋ kai, amma ni n’a dara ahini ɗa a ɵeɓaŋ.

²⁵Ɗif na jre ɗa a suma haa warni a va, amma ɗif na meefeŋ ɗa warni a suura tiɗi wiyamai.