Read Mousgoum Seŋ joro 14 Bible Online

Seŋ joro 14 - Mousgoum bible

Seŋ joro 14

¹Muni na yili ɗa te rgiti pakataiɗi amai, amma na tatala ɗa te tûriti pakataiɗi ɗa edi.

²Ɗif n’a paya payai na ɗikat a sini na ɗa a hormo wiini EPIƊ-ƊAI, amma ni n’a tikiti futi na ɗikat kai ɗa a kasi sini na ɗa a miisi.

³War miɗini ɗif na tatala ɗa, kûlini-si a niyasi edi, amma miɗi na wiiɗi ɗai na yalakai ɗa a giɗimiɗi.

⁴Ɗif na garakaini zi hirim aŋ kai ɗa, vreni wala warni kai, amma ni n’aŋ gaini garakai na gdaŋai ɗa, a haɗa viya.

⁵Zaida na jre ɗa a za eles kai, amma zaida z'eles ɗa a muɗa ɗa a eles sal.

⁶Ɗif n’a ɵina gaŋ kai ɗa a paya yel amma a kiɗa a navaŋ kai. Amma ɗif zi siɗi ɗa, burini siɗi ɗa a wala na gir kai.

⁷Ku yima suku edi sini ɗif na tatala par, buri ɓa aga ku nava seŋ zi yel ktai maa war mini par kai.

⁸Yel na wiiɗi ɗai na yalakai ɗa a tikini hangal na sini payaiɗi ɗa. Giɵibi na wiiɗi na tatalakai ɗa a rhai ɗa.

⁹Ɗai na tatalakai ɗa e ɗiyi sini zizini meefeŋ ɗa kai, amma ɗai na jrekai ɗa e firiyi ɓa meefeŋ a za arbaɗi kai.

¹⁰Ɗif paŋ a sɗa girni gaini firyini amlai war sini kiini, ɗif zamai n’a kiɗa a sɗaŋ maini ɵa ta aŋ kai.

¹¹Dalamɗi ɗai na maafanai ɗa aga a tuura edi, amma gumu na wiiɗi ɗai na jrekai ɗa aga a riya edi sek sek.

¹²Ɗif zamai ɗa a hiina ɓa futini te na pɗemi, amma sini dibini ɗa te kaŋ sini mri.

¹³Koo ɓa ku na riya kaw agul te kiɗa te kwima, haa sini vidi ɗa, firiyi ɗa a bunda aŋ kwimi.

¹⁴Koo na ɓa ɗif na meefeŋ ɗa, a suma pɗem gaini sdani na meefeŋ, amma ni na payaini pɗem ɗa simnini ɗa aga a suwaŋ.

¹⁵Ɗif na gaini nihi kai ɗa, a yima seŋ na ɗai e miɗiŋni paŋ, amma ɗif na yel ɗa a za wala gaini hiini.

¹⁶Ɗif na yel a huna meefeŋ, a yima sini edi sini par lai, amma na tatala ɗa a niya warni, gaini hunai pini kai.

¹⁷Ɗif n’a za hiy witaw ɗa, a za na ɗa maini ɗif zi dûûli ɵa, ɗif na hiinini meefeŋ ɗa, ɗai e bili gaw sini.

¹⁸Ɗai na gaini niyi kai ɗa wiiɗi nagai ɗa a dûûli, amma siɗi ɗa te bogorai na wiiɗi na yalakai.

¹⁹Ɗai na maafanai aga e hûrgi azumai wuzaɗi na pɗamai, na tuwarai aga e simni mini magalaɗi na jrekai lai.

²⁰Ɗif na murga ɗa zagalakaini maa e diriŋ kai, amma zi farai ɗa marmakaini viya.

²¹Ɗif n’a miisa maini ɗa a za ɗa tuwur, amma ɵeɗ aŋ midini ni n’a hiina haw buriɗi na hurafai.

²²Nagai n’e rgi warɗi aŋ zi meefeŋ ɗa, e wili na e wili kai ɗi? Amma pɗem gaini yum a na buriɗi nagai n’e rgi warɗi aŋ zi pɗem.

²³Sda paŋ ɗa der na pini a na, amma ni n’a ɓaka ɗa a sariya ɗa a hina murga ɵa.

²⁴Bogorai na wiiɗi ɗai na yalakai ɗa a farai na wiiɗi ɗa, giɵibi na wiiɗi na tatalakai ɗa a giɵibi ɵa.

²⁵Zaida na jre ɗa a kurɗa ɗai viya, amma ni n’a muɗa eles ɗa a wula edi ɗa a ɗai.

²⁶Biyi na pini ɵeɗ na gaini futini ɗa aŋ war hormo na wiini EPIƊ-ƊAI. Buri ni a hlai zi ŋoyai na wiiɗi alini.

²⁷Hormo na wiini EPIƊ-ƊAI ɗa te kiliŋi zi suŋfa, a kota ɗif mini azaw na wiini mri par.

²⁸Vok n’abai ɗa a kol na wiini pai, amma na ɓa vokɗi ɗai ɗa a faya azumai sek ɗa, a kɵi na wiini pai ɗa lai.

²⁹Ɗif n’a za hiy witaw kai ɗa a ɗif zi yel, amma ni n’a hiy witaw ɗa a siŋka edi ɗa a giɵibini.

³⁰Hangal na gaini tiki azumai ta ɗa a jam na wiini amur-si, amma sile ɗa te dadalai na war keɵke.

³¹Ɗif n’a zini gir wiini ɗif na huruf ɗa, a tirka na ɗa a Ni n’a rgaŋ ɗa, amma ni n’a hiina haw burini na murga ɗa, a sini na kol wiini Ni n’a rgaŋ lai.

³²Meefeŋ na wiini ɗif na meefeŋ a ɵiŋkaŋ azumai, amma ɗif na jre ɗa a baiya pini ɵeɗ, koo war mrini.

³³Yel ɗa a nava midiɗi ɗai zi siɗi, amma arbaɗi ɗai na tatalakai ɗa, a kiɗa a nava kai.

³⁴Jire ɗa a riya afti amai, amma tuwur ɗa a wala zi siyer na midiɗi ɗai.

³⁵Pai ɗa a za pɗem siɗi ɗifni n’abai zi yel, amma a za hiy sini ni n’a kinisi siyer midini ɗa.