Read Mousgoum Seŋ joro 15 Bible Online

Seŋ joro 15 - Mousgoum bible

Seŋ joro 15

¹Wiyini-seŋ na gaini hangal ɗa a tika hiy azumai, amma miɗi na ɗewek ɗa a riya hiy ɗa amai sek.

²Alsiɗi ɗai na yalakai ɗa te bunda siɗi neeme, a niyasi war miɗi ɗai na tatalakai par ɗa a miɗi zi giɵibi.

³Arni EPIƊ-ƊAI a n’a tala war hlai paŋ, a n’a tiliɗi na pɗamai gaiɗi na maafanai lai.

⁴Arai zi pi na pɗem ɗa a luwuŋ zi suŋfa, seŋ zi miɗi na meefeŋ ɗa a ɓulka hiini.

⁵Ahi zi dûû li ɗa a yima gadai na wiini epini kai, amma ni n’a yima gadai ɗa ahi zi yel.

⁶Ɗif na jre ɗikat ɗa a der ahani viya, amma der na wiini ɗif na meefeŋ ɗa a glasi gir.

⁷Mini ɗif zi yel ɗa a ɓaka edi ɗa a siɗi, amma agulni ɗif na tatala ɗa te muɗa ɗa a wala na zamai.

⁸Ɓaka na wiiɗi ɗai na maafanai a wala na hi-hir arni EPIƊ-ƊAI, amma siiwa na wiiɗi ɗai na jreɗikat a sini firiyi.

⁹Payai na wiiɗi ɗai na maafanai a hi-hir arni EPIƊ-ƊAI, amma ni n’a paya aŋ za pɗem ɗa, EPIƊ-ƊAI a daraŋ gara.

¹⁰Ni n’a sala edi warɗi futi par ɗa, aga a niviti emini seŋ, n’a dara a yima gadai kai ɗa aga a mra.

¹¹Hlaiɗi ɗai zi mri gaini huduk na wuŋŋa lai maa aŋ gaini ŋûyi wuzani arni EPIƊ-ƊAI kai. Azi gama ɗa agulni ɗif murɗek ɗa.

¹²Ɗif n’a yima seŋŋi ɗif kai ɗa a firiya ɓa ɗif a gdaŋ kai, a tapa siɗi ɗai na yalakai kaalai.

¹³Na ɓa agul t'aŋ war firiyi ɗa, arni ɗif ɗa a juva, na ɓa t'aŋ war kwimi ɗa, arni ɗif a ɓulka lai.

¹⁴Hiini zi yel ɗa a paya ɗa siɗi, amma miiɗi ɗai na tatalakai ɗa a va gaini giɵibi.

¹⁵Ɗif na murga ɗa mefeŋni na pɗem aŋ kai, amma na war muluk ɗa, mefeŋ paŋ ɗa a fet.

¹⁶Na ɓa wala aŋ tuku agwi, ku na sini hormo wiini EPIƊ-ƊAI lai ɗa, a suwa na farai tuku viya, amma kureɗ war hûwyi ɗa.

¹⁷Maama na ɗif a suŋku war diri ɗa, a suwa neŋ na gaini futini na ɗif a suŋku warni suku pɗem kai ɗa.

¹⁸Ɗif na maswar ɗa a kasi sispai, ɗif na guma ɗa a tika hiy azumai.

¹⁹Futi na wiini ɗif na malam ɗa warɗi a hedek kiini, amma na wiini ɗif na jre ɗikat ɗa gaini dûgi edi gaini futiɗi.

²⁰Ahi zi yel ɗa a sini firiyi wiini epini, amma na tatala ɗa a siɗi hormo wiiɗi emini kai.

²¹Sda zi giɵibi ɗa a sa firiyi wiini ɗif na tatala ɗa, amma ɗif na yel ɗa a hala wuzani sir.

²²Na ɓa ku zilba ɗif kai ɗa, wala na pɗem a za kai, a kiɗa a za ɗa sai na ɓa ku tapa hiiniɗi ɗai li viya.

²³Wiyini seŋ na pɗem a sa firiyi wiini ni n’a muɗa ɗa, seŋ n’a muɗa war sartini ɗa pɗem gara.

²⁴Ɗif zi yel ɗa a tikiti te futi na te ka amai sek sini suŋfa, a tikiti na te ka azumai sek sini mri ɗa kai.

²⁵EPIƊ-ƊAI a tuura dalamɗi ɗai n’e kûli siɗi edi, amma a giɗima arni hlai na wiiɗi muni na war greŋ ɗa.

²⁶Hiini na maafanai ɗa a wala na hi-hir arni EPIƊ-ƊAI, amma seŋ na pɗamai ɗa, a na arni hilu.

²⁷Ɗif n’a paya farai gaiɗi futi na pɗemi kai ɗa a glasi ɗa a gir midiɗi pakataini, amma ni n’a bla edi sini katu na maafanai ɗa, aga a sumna karni.

²⁸Ɗif na jre ɗa a hiina haw kapai a waya seŋ, amma ɗai na maafanai ɗa, e hûnvisi miɗi par a seŋ na ɗewek.

²⁹EPIƊ-ƊAI a na gaigai gaiɗi ɗai na maafanai ɗa, amma a na ɵina siiwaɗi ɗai na jrekai ɗa.

³⁰Arai zi teli na pɗem ɗa a sa firiyi, labar na pɗem ɗa a sa gdaŋ wiini amur-si.

³¹Ɗif n’a tika hangalni sini gadai n’a sa suŋfa, aga a sumna gaiɗi ɗai na yalakai.

³²Ɗif n’a bla edi sini gadai ɗa a miisa ɗa a sini dama, amma ni n’a yima gadai ɗa aga a nava hangal na pɗem.

³³Hormo na wiini EPIƊ-ƊAI ɗa a hitra yel wiini ɗif. Hûsini-si a vuga wuzani rɗi n’amai ɗa.