Read Mousgoum Seŋ joro 17 Bible Online

Seŋ joro 17 - Mousgoum bible

Seŋ joro 17

¹Gangaŋ na ku higraŋ gaini hangalku dam ɗa, pɗem a suwa, neŋ na gaini futini na ku sumaŋ aha warɗi pakatai zi sispai ɗa.

²Bege na yel ɗa a kiɗa a tika balamni ahi zi kisi siyer ɗa, a mula bulum gaiɗi ali zi wi ɗa lai.

³Or gaini arzaŋ ɗa a siŋka pɗemni edi ɗa afu, amma n’a sɗa hiini na warɗi agulni ɗif ɗa a EPIƊ-ƊAI.

⁴Ɗif na hiinini meefeŋ ɗa a zaga ɵimani mini seŋ na maafanai, ɗif z'eles a zuɓura ɗa a seŋ na jreni aŋ kai ɗa lai.

⁵Ɗif n’a zini yewere wiini ɗif na murga ɗa, a tirka ɗa a ni n’a rgaŋ ɗa, n’a firiya pini girɗi marni ɗa, aga a niviti emini seŋ.

⁶Bogorai na wiini ɗif na wel ɗa e ɗi tiyakaini, wala zi gaŋ na wiiɗi ali ɗa a e ɗi tamaiɗi.

⁷Miɗi na pɗem a kiɗa a niyasi mini ɗif zi dûûli par kai, eles ɗa a zuva sini ɗif n’abai kaalai.

⁸Katu ɗa a na arni ɗif n’aŋ tini ɗa maini wala zi hiila nɵa, hlai n’a bunda arni woni paŋ ɗa a nava paŋ.

⁹Ɗif n’a kusuɓa meefeŋ ɗa, a paya ɗa a marmai, amma n’a waya a muɗa gaini meefeŋ n’a za ɗa, a ɓirwiɗi marmakai.

¹⁰Gadai ktai ɗa a zina pini ɗif zi siɗi, a suwa dabala miya ɗaw na sini ɗif na tatala ɗa.

¹¹Ɗif na meefeŋ a paya ɗa a fiki n’amai na wiiɗi ɗai siɗi marɗi, amma Alaw aga a ɵinasi ɵeŋ na sabab midini.

¹²Ku tapa midini wala na buza n’e yikiŋ ɓa Urs na aliɗi gaini mili yaw ɗa, pɗem, a suwa na ku tapa midini ɗif zi dûûli war giɵibini ɗa.

¹³Ɗif n’a waya meefeŋ midini pɗem ɗa, pakataini aga te ɓurwa gaini gir kai.

¹⁴Fikini sispai ɗa a maini hiɗini daŋ na mini yem ɗa, wuzani hlai na hiy ɗa a sawa ta ɗa a pɗem ɓa, ku yima suku edi kai.

¹⁵Ɗif n’a ɵa ɗif na meefeŋ su lai, gaini ni n’a rga ɗif na tini war seŋ kai aŋ suma daŋgai lai ɗa, ɗai na sulu hanɗa paŋ e ɗa haharai arni EPIƊ-ƊAI.

¹⁶Farai, tini ɗif na tatala yaw ɗa a nava ɗa a maɗa? A wura gaini ɗa a yel zaw? Ni mal maa hangalni a kiɗa kai.

¹⁷Marmai ɗa a siŋka dirini edi hlai paŋ, amma tawal a na ɗa buri ziyini gir.

¹⁸Ɗif n’a yima sini mini tumuŋ na wiini maini, n’a za ha ɓa aga a vurgaŋ lai ɗa, ni a ɗif na tatala.

¹⁹Ɗif n’a firiya hiy ɗa, a firiya ɗa a tuwur, ni n’a firiya kûlini-si ɗa, a ɓuka na ɗa a sini.

²⁰Ɗif na hiinini ɗikat kai ɗa, a kiɗa a nava simni na muluk kai, ni n’a muɗa meefeŋ siɗi marni ɗa, aga a kɵa war gir.

²¹Ɗif n’a wa li ahi na tatala ɗa, a nava ɗa a gir ɵa, epini ahi zi dûûli ɗa firiyi warni kai.

²²Agul na t'aŋ war firiyi ɗa te kurgum na pɗem, seze n’aŋ war kwimi ɗa, a vada gdaŋni ɗif edi.

²³Ɗif na meefeŋ ɗa a yima katu ɗa azumai ɗaw, kapai a viiɗiti sariya na jre ɗa.

²⁴Yel ɗa a na gobi mini ɗif zi siɗi ɗa, amma ɗif na tatala ɗa a hala a payaŋ ɗa edi aziɗi yai.

²⁵Ahi na tatala ɗa, a fiɗini sini epini, a siɗi kwimi wiiɗi na na te waŋ ɗa lai.

²⁶Kûɗi sariya midini ɗif na jreɗikat ɗa a pɗem kai, koo lamaŋ, ɵiɓini ɗif n’abai na wuzaɗi ɗai a futini ka lai.

²⁷Ɗif n’a ɗala sini war seŋ zi miɗi ɗa a ɗif zi yel, na hangalni gaini tiki azumai ta ɗa, a ɗif zi siɗi lai.

²⁸Koo ɓa ɗif zi dûûli ɗi, na ɓa a muɗa seŋ kai ɗa, ɗif a kiɗa aŋ yimaŋ aŋ ɗif zi yel, a mala mini amai kai ɗa, ɗif a kiɗa a yimaŋ aŋ ɗif zi siɗi lai.