Read Mousgoum Seŋ joro 18 Bible Online

Seŋ joro 18 - Mousgoum bible

Seŋ joro 18

¹Ɗif n’a tapa gaiɗi marni kai ɗa a paya ɗa a pɗem na wiini, Won hlai na ɗif a sini gadai li ɗa, a za ɗa a hiy.

²Ɗif na tatala a firiya ɗa a siɗi ɗa kai, amma a firiya ɓa a siŋka hiinini edi wuzani arɗi ɗai.

³Meefeŋ ɗa a kasi miisi, tirki a kasi siyer lai.

⁴Seŋ na mini ɗif par ɗa a na maini yem-ra na hulum nɵa, maiɗi arai zi ki yem na te huŋva edi nɵa, maiɗi kiliŋi zi yel nɵa.

⁵Zinai na pini ɗif na meefeŋ war sariya, kapai ku wula ezini ɗif na jre ɗa a futini kai.

⁶Mini ɗif na tatala ɗa a glasi hiy, n’a niyasi mini par ɗa a glasi ɵiɓi.

⁷Mini ɗif na tatala ɗa a ɓilki n’edi na wiini, n’a niyasi mini par ɗa a azaw n’a yimaŋ ɗa lai.

⁸Seŋ na mini ɗif zi gni ɗai a na maini simi na pɗem, n’a niya haa edi war suku paŋ nɵa.

⁹Ɗif n’a bunda malam war sdani, gaini ni n’a tuura sda edi ɗa, e ɗi ɗai ktai.

¹⁰EPIƊ-ƊAI a hlai zi ŋoyai na gdaŋ, ɗif na jre ɗa a ŋoya sini, wala na meefeŋ a tetemaŋ kaalai.

¹¹Farai na wiini ɗif zi farai ɗa, a fuŋ n’abai zi ɵaga na wiini, war hiinini ɗa a ɵaga na ɗif a kiɗa a pra midini kai.

¹²Won hlai na kûlini-si a cosi li ɗa, ɓilki n’edi aŋsi pini lai, amma abai ɗa te halasi asakalni hûsini-si par.

¹³Ɗif n’a waya seŋ a zuɓura kai ɗa, a siŋka edi ɗa a gɵibini, a za ɗa a yewere wiini sini lai.

¹⁴Hiini na wiini ɗif ɗa a kiɗa a sini gdaŋ Won hlai n’a na veglek, amma na ɓa hiini hanɗa a bunda li huruf ɗa, n’aga a sini gdaŋ ɗa asiya ɗa?

¹⁵Ɗif na hangal ɗa a nava siɗi ɗif zi yel ɗa a paya hitrai n’a zina pini.

¹⁶Ɗif n’a sa tini edi ɗa, mini hlai paŋ a mala edi burini, a kiɗa a niya haa amlai siɗi ɗai n’abakai.

¹⁷Ɗif n’a vurna seŋ avut war sariya ɗa seŋni ɗa a tala gaini futini, amma gawni a tika seŋ li ɗa a mulaŋ edi pini.

¹⁸Wala zi vili ɗa a ɗiya hiy, a vada seŋ arbaɗi ɗai zi spak.

¹⁹Tawal na agulni a tuura li suku ɗa, hili na sini sek a bunda gir a suwa fuŋ n’abai zi ɵaga ɗa, hiy ɗa a dûgûti agul maini kawakai na gdaŋai n’e ɵi mini fuŋ n’abai gaini nɵa.

²⁰Ɗif a kiɗa a suma pini seŋ na mini par, a ka sini gaini seŋ n’a muɗaŋ ɗa lai.

²¹Seŋ zi miɗi ɗa a kiɗa a sa suŋfa zaw a kasi mri, n’a firiya a muɗa ɗa a yima seŋ n’aŋ pini ɗa sini.

²²Ɗif n’a niviti li muni ɗa, a nava na ɗa a der n’abai, a nava ɗa a katu tini EPIƊ-ƊAI par.

²³Ɗif na murga ɗa a siiwa ɗif gaini siiwi Won hlai n’a muɗa seŋ ɗa, amma zi farai ɗa, a waya seŋ sai gaini wûle na gdaŋ.

²⁴Marmakai na viya ɗa e kiɗi e tûûri ɗif, amma marmai zamai ɗa, jreni a suwa tawal.