Read Mousgoum Seŋ joro 19 Bible Online

Seŋ joro 19 - Mousgoum bible

Seŋ joro 19

¹Ɗif na murga na paya war jre ɗa pɗem, a suwa ɗif na tatala zi viiɗi seŋ ɗa.

²Ɗif n’a za wala gaini hiini kai ɗa a za wala na pɗem kai, wala n’a za war gûzi ɗa a ɵa edi pɗem kai.

³A tûriti futi na wiini ɗif ɗa a giɵibini, amma ni, a za hiy ɗa sini EPIƊ-ƊAI.

⁴Marmakaini ɗif zi farai ɗa, e riyi ɗa amai sek sek, amma ɗif na murga ɗa, marmaini na ktai maa a yima sini edi sini par.

⁵Ɗif n’a muɗa zaida z'eles ɗa a mula edi miɗi sariya par kai, ɗif n’a muɗa eles ɗa a mula edi kaalai.

⁶Ɗai n’e ɵiɓi gabara miɗi ɗai n’abakai ɗa viya, ɗai paŋ e ɗi marmakaini ni n’a sa tini edi ɗa.

⁷Tawalakaini na murga ɗa e bili gaw sini, marmakaini e pri edi wuzani a suwa pra, Won hlai n’a dara a miɗiɗi seŋ ɗa, ɗif sini kir kai.

⁸Ɗif n’a paya yel ɗa a za ɗa a pɗem wiini sini dama, n’a yima siɗi midini ɗa a nava ɗa der na pɗem gara.

⁹Ɗif n’a muɗa zaida z'eles a mula edi miɗi sariya par kai, ɗif n’a muɗa eles ɗa a ɓa na ɗa a sini.

¹⁰Simni na muluk ɗa a juva sini ɗif na tatala kai, bege n’a ŋa midiɗi ɗai n’abakai ɗa a juva kai a suwa pra.

¹¹Ɗif na hangal ɗa a za hiy witaw kai, kol na wiini a wili n’a wula midini gaini meefeŋ na ɗai e ziŋni ɗa.

¹²Hiy na wiini pai a na maini nûmi na wiini gurnai nɵa, pɗem na wiini a na maini maaɗai na sini evek nɵa.

¹³Ahi na tatala ɗa a gir na midini epini, muni zi hiy ɗa te na maini baŋa na midini dalam na faŋ a ɵa li ɗa, teɗûwiini a ɗiya kai ɗa nɵa.

¹⁴Ɗif a kiɗa a nava dalam gaini der aŋ bulum siɗi tamaini par, amma muni na yelli ɗa a sitini wiini ɗif a EPIƊ-ƊAI.

¹⁵Ɗif na malam ɗa, weseŋ na wiini a vada kai, na liŋ liŋ ɗa, wiyamai aga te fuɗaŋ lai.

¹⁶Ɗif n’a za pini gadai ɗa, a giɗima na ɗa a sini, ni n’a tika hangalni sini payaini kai ɗa aga a mra.

¹⁷Ni n’a sa sini ɗif na murga ɗa, a tufaŋ na ɗa wiini EPIƊ-ƊAI n’aga a virgiŋni.

¹⁸Won hlai n’aliku e ɗa ɵini muku hai ɗa, gidiɗi, amma ku hina hiiniku a tuura haa dai dai na ku paya fiɗiɗi n’edi kai.

¹⁹Ɗif n’a niya li hiy abai ɗa a vurga lamaŋ, na ɓa ku hinini lamaŋ ɗa li ɗa, a hala ɗa wuzani gaini meefeŋni sek.

²⁰Slina gadai n’e ɗa e suŋku, yima wala n’e ɗa e hitrunku lai, aga ku za aŋ ɗif zi yel.

²¹Agumni ɗif ɗa te hiina wazagai viya, amma a vaŋ amai ɗa a diri na wiini EPIƊ-ƊAI ɗa.

²²Ɗif a firiya sini maini par ɗa a jre, ɗif na murga ɗa a suwa ɗif z'eles.

²³Hormo na wiini EPIƊ-ƊAI a ka ɗif sini suŋfa, nagai n’e zi nɵa wala ktai maa a sûwiɗi kai, gir a ziɗi kaalai.

²⁴Ɗif na malam ɗa a wa tini war tasa, amma a kiɗa a witisi amai mini kai.

²⁵Sliɓa ɗif n’a ɵina seŋ kai ɗa, ɗif na gaini nihi kai ɗa aga a za yel, gada ɗif na hangal ɗa, aga a sɗa wala na ku dara ku hitriŋni ɗa lai.

²⁶Na a zini gir wiini epini, a birgiti emini edi lai ɗa, ni a ahi zi tiki siyer, zi miisi lai.

²⁷Ahiya, na ɓa ku bunda li ku yima gadai kir kai ɗa, ku yima na ɗa a suku edi sini hitrai zi yel ɗa par.

²⁸Ɗif n’a nava kai e yikiŋ li aŋ zaida ɗa, jaani gaini gadai kai, Meefeŋ ɗa miɗi ɗai na maafanai pɗem.

²⁹Ɗif n’a ɵina seŋ kai ɗa a biyiti t'emini seŋ, na tatala ɗa duɓani a baiya ɗa a daɓala.