Read Mousgoum Seŋ joro 2 Bible Online

Seŋ joro 2 - Mousgoum bible

Seŋ joro 2

¹Ahiya, na ɓa ku yima seŋŋa li, na ɓa ku yima gadaiŋa li tuku pɗem ɗa,

²na ɓa ku za ka ɵimaku li mini yel ɗa pɗem, ku paya aŋ sɗa ezini edi lai,

³Na ɓa ku ɗuula siɗi li, na ɓa ku paya zinai li tini yel par lai,

⁴na ɓa ku payaŋ li maini arzaŋ ɵa, na ɓa ku vurgoŋsi li amai maini godai n’a na gaini ŋûyi azumai pini afti cok nɵa,

⁵Nɵa aga ku siɗa wala n’e yikiŋ ɓa: Hormo na wiini EPIƊ-ƊAI ɗa, aga ku sɗa Alaw lai.

⁶Buri ɓa a sa yel ɗa a EPIƊ-ƊAI, siɗi gaini yel a niyasi ɗa war mini par.

⁷A zina piɗi ɗai na jrekai, a gamar na wiiɗi nagai n’e piyi war jre.

⁸A giɗima ni n’a na za pini gadai zi ɗû, a giɗima payaiɗi marmakaini na jrekai lai.

⁹Nɵa aga ku sɗa wala n’e yikiŋ ɓa jre, zi na pini ɗû, gaini ɗiyi na war jre, hanɗa paŋ a futi n’a ka siɗi pɗemi.

¹⁰Won hlai na yel a niya li warɗi agulku, hlai na siɗi a suku firiyi li war suŋfaɗi agulku lai,

¹¹Zini braw n’arbani pɗem gaini na meefeŋ aga a giɗimuku, yel aga a kutuku lai.

¹²Aga a puluku edi mini payai na meefeŋ par, miɗi nagai n’e miɗi seŋ z'eles par,

¹³tiɗi nagai n’e hini futi na jre ɗa edi, aŋ tiki futi na maafanai,

¹⁴n’e firiyi war zini meefeŋ, n’e firiyi war payaiɗi na hi-hir lai:

¹⁵Nagai ɗa, payaiɗi a na ɗikat kai, na futiɗi ɗa a hala sir lai.

¹⁶Gaini hanɗa, aga ku pla suku edi tiɗi zi na zuwar ɗa par, mini kalaŋ na pɗamai na miɗi ɗa par,

¹⁷na te hinasi marmaiɗi n’avut edi dam, midiɗi a wula gaini bonu n’arbaɗi gaini Alaw na wiiɗi.

¹⁸Payaiɗi ɗa a kiti na mini mri sek, sdaɗi na te zaŋ ɗa a kiti na ahaɗi ɗai zi mri sek.

¹⁹Ɗif n’a hala ahaɗi paŋ ɗa a wayasi duɓani sek kir kai, futi n’a ka sini suŋfa a navaŋ kir kaalai.

²⁰Buri nɵa, ku paya payai na wiiɗi ɗai n’e zi pɗem, tika eziɗi ɗai na jrekai.

²¹Buri ɓa ɗai na jrekai ɗa aga e simni midini afti hanɗa, nagai n’e ɗiyi war jre aga e hini woni.

²²Amma na maafanai Alaw aga a miliɗi edi midini afti par, zi rhai ɗa aga a hûrɗiɗi amai maini luwuŋ nɵa.