Read Mousgoum Seŋ joro 20 Bible Online

Seŋ joro 20 - Mousgoum bible

Seŋ joro 20

¹Viŋ ɗa a bunda ɗif hiriŋ, sul na ɗewek ɗe a turla ɗif amai, ɗif n’a na caŋ a siina gaini lai ɗa, a za yel kai.

²Hiy na wiini pai ɗa a na maini nûmi na wiini gurnai nɵa, ɗif n’a riya hiyni amai ɗa a glasi midini n’a seŋ.

³Ɗif a ɗala sini war hiy ɗa, a za ɗa a sda zi kol, amma ɗif na tatala ɗa a wa sini warni.

⁴Sarti na wiini hirim ɗa, ɗif na malam ɗa a dara a hirma kai, sini hiɗi ɗa a paya amma a nava wala kai.

⁵Hiini n’amlai warɗi agulni ɗif a na maini yem na hulum nɵa, ɗif na hangal ɗa a navasi ɗa warni par.

⁶Ɗai n’e yiki siɗi ɓa e ɗi pɗamai viya, amma ɗif na jre ɗikat ɗa a navaŋ ɗa asiyaŋ

⁷Ɗif na jre ɗa a paya ɗa a payai na ɗikat, ɵeɗ midiɗi alini n’e hini duɓani!

⁸Won hlai na pai a sumna li midiɗi Paramai zi pai aŋ ziti sariya ɗa, n’a ɵa arni nɵa nlza, n’a hala kai ɗa a sɗaŋ tar.

⁹Ɗif n’a siɗa a muɗa ɓa: Mu ziti agula edi aŋ hilu ya, tuwurŋa a ma edi silak ya ɗa asiya ɗa.

¹⁰Kilo na gaini futini kai ɗa lai, agodo na gaini futini kai ɗa lai, wazagai hanɗa sulu paŋ a na haharai arni EPIƊ-ƊAI.

¹¹Gawla a kiɗa a siŋka edi war sdani ɓa, payaini aga a za pɗem zaw, ɗikat.

¹²Slime a na burini ɵini, arai burini tel lai, gaini sulogoini paŋ a zaŋ ɗa a EPIƊ-ƊAI.

¹³Ku taɓa pini weseŋ zi kili kai, ɵa kai ɗa aga ku hina murga. Ku arku kai, na ɓa ku firiya ɓa wiyamai te zuku kai ɗa.

¹⁴Ni n’a wura wala ɗa a miisaŋ ɓa a meefeŋ, amma a wuraŋ li ɗa, a hala gaini firiyi.

¹⁵Or gaini pinzibani aidaw na kiini kiini ɗa a suwa viya, amma seŋ zi miɗi zi yel ɗa a wala n’a nava butu kai.

¹⁶Na ɓa ɗif a yima sini li mini tumuŋ na wiini ɗif na morkoi ɗa, ku militi kaputni, na ɓa a ɗiya li eziɗi muni na morkoi ɗa, a suku ka wala ktai ta haw.

¹⁷Simi n’a nava war jre kai ɗa, a suma mini ɗif neemma, muku a va li gaini ɗa a bunda a kai kai!

¹⁸Wazagai na ku hiinaŋ aŋ zi paŋ ɗa, ku tikaŋ wuzaɗi ɗai avut haw, nɵa aga a va amai. Hlai na ku hala edi mini hatam sek ɗa, ku hiina pɗem.

¹⁹Ɗif n’a gna marni ɗa a kiɗa a siŋka asirɗi edi lai, ku za bonu gaini ɗif n’a ɓaka sariya viya viya kai.

²⁰Ɗif n’a muɗa meefeŋ sini epini gaiɗi emini ɗa, aga a mra maini lampa na te mra war gegeŋ nɵa.

²¹Der na ɗif a navaŋ kokolai tar war pi zi tiki ɗa, aga a zina pini dawai sek kai.

²²Ku muɗa kai ɓa: Meefeŋ n’e ziŋŋa ɗa aga mu vurgaŋ, hina suku war tini EPIƊ-ƊAI aga a zina puku.

²³Gumani wala n’a tika gaini futini kai ɗa, a tala hi-hir arni EPIƊ-ƊAI, kilo n’a tika wala na pɗem kai ɗa, pɗem kaalai.

²⁴Paiaini ɗif a ɗiketaŋ ɗa a EPIƊ-ƊAI, na ɓa ɵa ɗa ni aga a sɗa hlai n’a hala woni ɗa maɵa maɵa ɗa?

²⁵Agir gara burini ɗif n’a za ɵinini-ha wiini Alaw gaini hiini kai, kapai a tika pini a hiina miɗi n’a muɗaŋ ɗa asakal par.

²⁶Pai na yel ɗa a ɵiriɗi ɗai na maafanai ɗa edi, a hinasi gir midiɗi haa a vidiɗi edi.

²⁷Sezeni ɗif te lampa na wiini EPIƊ-ƊAI, a sɗa hiini n’amlai warni ɗif.

²⁸Pɗem gaini jre ɗa a giɗima pai, Paramaini zi pai te ɗiya gdaŋ gaini jre.

²⁹Gdaŋ a wala n’a siɗi firiyi wiiɗi gawlakai, ayir na muɗukwi a wala n’a siɗi hormo wiiɗi ɗai na walakai lai.

³⁰Wuruk zi fel ɗa a kurgum na wiini meefeŋ, ɵiɓi a kurgum n’a za sda haa amlai warɗi agulni ɗif.