Read Mousgoum Seŋ joro 21 Bible Online

Seŋ joro 21 - Mousgoum bible

Seŋ joro 21

¹Agulni pai t'aŋ war tini EPIƊ-ƊAI maini ra nɵa, a kiti woɗi paŋ n’a dara.

²Ɗif paŋ a hiina ɓa n’a na zaŋ na ɗa a pɗem, amma n’a sɗa n’a na amlai warɗi agul ɗa a EPIƊ-ƊAI.

³Payai na jre, na ɗikat lai, arni EPIƊ-ƊAI pɗem a suwa ɓaka.

⁴Teli zi miisi, agul zi kûlini-si, gaini ŋili na wiiɗi ɗai na maafanai lai ɗa, hanɗa paŋ a tuwur paŋ.

⁵Hiini na pɗem na warni ɗif n’a za wala ɗa a kaŋ sini der, amma ɗif n’a baiya kai ɗa a nava wala kai.

⁶Ɗif n’a za farai gaini eles ɗa, a ɗif n’a lawa na pini mri, der n’a navaŋ ɗa aga a giha maini agiyiŋ nɵa.

⁷Karai na ɗai na maafanai e kiri ɗai ɗa aga a biɗi, buri ɓa e diri e zi pini gadai ɗa kai.

⁸Payai na wiini gorɓolo ɗa a na ɗikat kai, amma sda na wiini ɗif na jre ɗa a na ɗikat.

⁹Rûki n’ezini hlai rok ɗa pɗem, a suwa simni n’aha gaiɗi muni zi hiy ɗa.

¹⁰Ɗif na meefeŋ a firiya ɗa a meefeŋ bas, koo marmaini maa a za paŋ.

¹¹Sliɓa ɗif n’a ɵina seŋ kai ɗa, ɗif na gaini niyi kai ɗa aga a za yel, hitra ɗif zi yel ɗa, ni aga a nava siɗi.

¹²Ɗif na jre ɗa a tika hangalni sini pinzibani ɗif na meefeŋ ɗa, a hogoŋ war gir.

¹³Ni n’a taka ɵimani mini ɗuwal na wiini ɗif na murga ɗa, Won hlai n’aga a ɗuula aŋ paya zinai aga a nava wiyini seŋ kaalai.

¹⁴Katu n’a sa war kuɗuhai ɗa, a tika hiy azumai, a niya li war ɵubu ɗa a vada hiy n’abai ɗa edi.

¹⁵Zi na pini gadai ɗa a wala n’a sini firiyi wiini ɗif na jre, amma buriɗi nagai n’e zi meefeŋ ɗa a wala zi mili hunai.

¹⁶Ɗif n’a hiniti futi zi yel ɗa li edi ɗa, aga a nava simnini arbaɗi zi mri.

¹⁷Ɗif n’a firiya a za barbar ɗa a hina murga ɵa, n’a firiya a suma pɗem, a ca maini n’a dara ɵa lai ɗa a za farai kai.

¹⁸Ɗai na maafanai ɗa aga e hini e siɗi gir eziɗi na jrekai ɗa, na zi rhai ɗa eziɗi na ɗikat ɗa lai.

¹⁹Simni n’edi war basga na kaɗataŋ dam ɗa pɗem, a suwa simni na gaiɗi muni zi hiy, na te ɓulkutuku agulku kûreɗ-kûreɗ ɗa.

²⁰Ahani ɗif zi yel ɗa wazagai na pɗamai gaini farai ɗa a na viya, amma ɗif na tatala ɗa a ɓa na wiini edi kafa.

²¹Ni n’a firiya a za aŋ ɗif na jre na pɗem lai ɗa, aga a nava suŋfa, ɗai ɗa aga e zi sini war jre, e sini hormo lai.

²²Ɗif zi yel ɗa a kiɗa a niya aha war fuŋ n’abai zi ɵaga, a haɗa hlai na wazagai zi hatam aŋ warni, na ɗai e tiki hiiniɗi midini ɗa azumai.

²³Ɗif n’a giɗima mini, n’a giɗimiti alsini lai ɗa, a koto na sini wuzani gir.

²⁴Ɗif n’a kola sini, n’a miisa marni lai ɗa, e yikiŋ ɓa: Ɗif n’a ɵina seŋ kai, a za sdani paŋ ɗa war kûlini-si

²⁵Suna na wiini ɗif na malam ɗa a kaŋ mini mri, buri ɓa a firiya a za sda kai.

²⁶Yuvai paŋ ɗa aŋ war suna ɵa, amma ɗif na jre ɗa a sa edi ɗa a hiina sini kai.

²⁷Ɓaka na wiiɗi ɗai na maafanai ɗa a wala na hi-hir, buri ɓa e ziŋ ɗa gaini hiini na meefeŋ.

²⁸Ɗif n’a muɗa zaiɗa z'eles ɗa aga a mra, amma ni n’a tika hangalni ta aŋ zuɓura seŋ ɗa a kiɗa a ɵa seŋ edi gaini futini su.

²⁹Ɗif na meefeŋ ɗa a za wala gaini hunai kai, amma ni na jre ɗa, a sɗa payaini n’a payaŋ.

³⁰Wuzani arni EPIƊ-ƊAI ɗa, yel aŋ kai, siɗi aŋ kai, hiini na hulum aŋ kaalai.

³¹Ɗai e gini plasai war mefeŋ zi hatam, amma rɗi n’amai ɗa aŋ tini EPIƊ-ƊAI.