Read Mousgoum Seŋ joro 22 Bible Online

Seŋ joro 22 - Mousgoum bible

Seŋ joro 22

¹Yiki n’a wa pɗem ɗa, pɗem a suwa farai na viya, diri na ɗai e diriku ɗa, pɗem a suwa arzaŋ gaini or.

²Ɗif zi farai gaini na murga ɗa, wala n’a tipiɗi a na, gaini sulogoiɗi paŋ a ziɗi ɗa a EPIƊ-ƊAI.

³Ɗif zi yel ɗa, Won hlai n’a tala gir a na halasi ɗa, a ŋoya cok, amma nagai na gaini nihi kai ɗa, e hili arni sek, e hini e siɗi gir lai.

⁴Der na pini hûsini-si ɗa: Hormo na wiini EPIƊ-ƊAI, farai, kol gaini suŋfa na mogo lai.

⁵Futini ɗif na ɗikat kai ɗa, aŋ warɗi ɗa a hedek gaini azaw, ni n’a dara a godo suŋfani a yima sini edi sini par.

⁶Ku hitrini wazagai na pɗamai wiini arwagwi war agwiyenni par, a za wel kaw aga a hinaŋ edi kai.

⁷Ɗai zi farai ɗa e ŋi midiɗi na murgakai ɗa, ɗif na tumuŋ aŋ midini ɗa a begeni ɗif n’a tifiŋni ɗa.

⁸Ɗif n’a suuɗa jrekai ɗa aga a haɗa gir, spakni zi karai ɗa aga a vada.

⁹Ɗif n’a sɗa hawɗi ɗai ɗa a nava ɓiki, buri ɓa a ɓurwa simini gaiɗi na murgakai.

¹⁰Birga ɗif ɵina seŋ kai ɗa, sispai ɗa aga a ɗiya, hiy ɗa aga a za kir kai, tirki kir kaalai.

¹¹Ɗif n’a firiyiti agul na hilu ɗa, n’a muɗa seŋ na pɗamai lai ɗa, pai ɗa a marmaini.

¹²EPIƊ-ƊAI arni aŋ midini siɗi, amma seŋ na wiiɗi ɗai na alasakai ɗa a tuuraŋ edi.

¹³Ɗif na malam ɗa a muɗa: Gurnai a na anene woɗi futi, aga a fuɗaŋa.

¹⁴Seŋ na miɗi falakai zi zawar ɗa a azaw na sabab gara, ni n’EPIƊ-ƊAI a blaŋsi li edi ɗa a kɵa warni.

¹⁵Gɵibi ɗa aŋ gaini nigi siɗi agulni arwagwi, a tikaŋ edi ɗa a ɵiɓi na gaini daɓala.

¹⁶Ɗif n’a siɗini gir wiini ɗif na murga ɗa, a zaŋ na ɗa aŋ ɗif zi farai, amma n’a sini wala wiini ɗif zi farai ɗa, a zaŋ na ɗa murga sek sek.

¹⁷Zaga ɵimaku, ɵina seŋ na miɗi ɗai na yalakai ɗa, siɗi na wiya na mu navaŋ, na mu na suŋku na ɗa, yimaŋ warɗi agulku.

¹⁸Na ɓa ku giɗimaŋ li warɗi agulku, na ɓa ku na muɗaŋ edi gaini muku lai ɗa, firiyuku aga a va amai.

¹⁹Kapai hiinuku a ɗiya midini EPIƊ-ƊAI ɗa, girna mu firiya ɓa mu huturuku seŋ hanɗa wiiku tuku lai.

²⁰Tala, mu ɗo seŋ joro a na doogo doogo hu a zina puku, war gadai gaini siɗi.

²¹Kapai ku sɗa aŋ muɗa seŋ na jre edi war jre, kal kal maini n’a za ɗa nɵa, Na ɓa ɗif a ɵunuku li, aga ku wiyini seŋ ɗa ku viiɗaŋ kai.

²²Ku mula wazagaini ɗif na huruf buri ɓa a huruf ɗa kai, wuzaɗi sariya ɗa, ku kirpa ɗif na znaini aŋ kai ɗa kaalai,

²³buri EPIƊ-ƊAI aga a zina piɗi, aga a tika suŋfaɗi nagai n’e virmi wazagaiɗi ɗa.

²⁴Ku za marmai gaini ɗif na maswar gara ɗa kai, ku paya gaini ɗif n’a za hiy witaw witaw ɗa kai.

²⁵Kapai ku tikiti futi na wiini kai, ku kɵa war azaw kaalai.

²⁶Ku wa suku arbaɗi ɗai n’e yimi siɗi mini tumuŋ na wiiɗi marɗi, n’e ɵiɓi dedigɗi mini ɓa aga e virgiŋ ɗa kai.

²⁷Buri ɓa na ɓa wala na ku vurgaŋ gaini aŋ kai ɗa, aga e tiki liyku na ku fana midini azumai puku par.

²⁸Ku zogo haga na wel n’arni vuwai na tamaiku e ɓisiŋ gamai par ɗa edi kai.

²⁹Ɗif n’a sɗa sdani zi zi gaini futini ɗa, a kiɗa a za sda wuzani pai, a kiɗa a za sda ahaɗi ɗai na ɗif a siɗiɗi kai ɗa kai.