Read Mousgoum Seŋ joro 23 Bible Online

Seŋ joro 23 - Mousgoum bible

Seŋ joro 23

¹Na ɓa ku na suma gaini ɗif n’abai ɗa, ku rodo suku burini ni na k’aŋ wuzani dam ɗa.

²Koo ɓa ku ɗif na gorom tekeɗeɗi, ku yima tuku warku.

³Ku za suna sini simi na pɗamai n’aŋ wuzani ɗa kai, buri ɓa a simi n’a kiɗa a kuku war siyer.

⁴Ku kaya suku aŋ piyi farai kai, ɗiya hiinuku na midini ɗa zaw.

⁵Arku a mula li gaini tar ɗa, aŋ kai tar, buri ɓa farai ɗa a pa baada, maiɗi muka na te ɗuufla amai arbani hlai sek nɵa.

⁶Ku suma simi na wiini ɗif na warni murɗek ɗa kai, za suna sini simini na pɗamai ɗa kaalai.

⁷Buri ɓa n’a hiinaŋ amlai warni ɗa kiini, a muɗuku gaini mini n’amai ɓa: Suma, ca, amma warni ɗa aŋ gaiku kai.

⁸Asakal par simini n’a niya warku agwi ɗa aga ku hunvaŋsi edi, ku kaya suku aŋ miɗini seŋ na pɗamai na ɗa kadai meere.

⁹Ku sini gadai wiini ɗif na tatala kai, aga a sɗa pɗemni gadai na ku siŋni ɗa kai.

¹⁰Ku zogo haga na wel n’arni vuwai edi kai, ku tika vuwai tiɗi ɗai na huyokai kai.

¹¹Buri ɓa ɗif zi giɗimi na wiiɗi a na spak gara, a ni n’aga a zina piɗi warni sariyaɗi na gaiku.

¹²Tika hangalku sini gadai na ku na navaŋ, zaga ɵimaku mini miɗi zi yel ɗa lai.

¹³Ku hina ɵiɓi na wiiɗi aliyagoi kai, ku ɵiɓiɗi li gaini daɓala ɗa e kiɗi e mri tar kai.

¹⁴Na ɓa ku na ɵiɓiɗi gaini daɓala maa, ku kûrɗiɗifu na edi mini hlaiɗi ɗai zi mri par.

¹⁵Ahiya, na ɓa agulku te rga sini yel ɗa, agula ta kaw aga te firiya lai.

¹⁶Agula aga te va gaini firiya, Won hlai n’a niyasi war muku par ɗa a seŋ na jre.

¹⁷Ku za sile siɗi ɗai na tuwarai ɗa kai, amma sini hormo wiini EPIƊ-ƊAI mefeŋ paŋ.

¹⁸Buri ɓa, dawai te na, biyi na pini ɵeɗ na wiiku ɗa aga a vada edi kadai kaalai.

¹⁹Tuku ahiya, ɵina pɗem, aga ku za aŋ ɗif zi yel, aga ku paya ɗikat.

²⁰Ku tapa gaiɗi ɗai n’e cini gaini vin ɗa kai, gaiɗi nagai n’e limi neŋ gara ɗa kaalai.

²¹Buri ɓa nagai n’e cini, gaiɗi nagai n’e simi haa a suwa gdaŋɗi lai ɗa, aga e binidi murgakai. Weseŋ na viya ɗa a bunda ɗif a wa sini ɗa a kese kese!

²²Slina mini apuku n’a wuku ɗa, ku miisiti amuku buri te za wuuli ta ɗa kaalai.

²³Paya aŋ za aŋ ɗif na jre, aŋ ɗif zi yel, n’a firiya hitrai gaini hangal lai, wazagai hanɗa paŋ ku navaŋ li ɗa, ku baŋ edi kai.

²⁴Apini ɗif na jre ɗa, firiyi a hogoŋ aŋ dedema, ni n’a wa ahi zi yel li ɗa aga a firiya.

²⁵Apuku gaiɗi amuku ɗa aga e firiyi tiɓ ɗi, a zuva ɓa na na te wuuku ɗa te dedema gaini firiyi.

²⁶Ahiya, tika hangalku sa, a zuva ɓa ku tika aza gaini firiyi.

²⁷Buri ɓa, muni zi zawar ɗa te waŋ na hulum, munini ɗif ɗa te kiliŋi n’agwi sörre lai.

²⁸Falakai hanɗa, e ɗa maiɗi gorɓolokai n’e ciki futi wuzaɗi ɗai nɵa, maɵagai zamai viya e bindi jrekai kai buriɗi falakai hanɗa.

²⁹Na ɗai e zi pini ɓa, "gir gara ɗa" asiya ɗa? Zaw e zi ɓa "aiya ɗa" asiya ɗa? Hiy ɗa a wiiɗi ɗai maɗa? Marava ɗa a wiiɗi ɗai maɗa? Sispai na meere ɗa a wiiɗi ɗai maɗa? Arai na makalakai ɗa a wiiɗi ɗai maɗa?

³⁰A wiiɗi nagai n’e sûfi mini wala zi ci ɵa ca, nagai n’e yivi aŋ zilni pinzibani sul na kiini kiini ɗa.

³¹Ku mula arku sini vin n’a sɗasi mekele, n’a za amai ɗef ɗef warɗi kup ɗa, n’a ka azumai wulaku sek zalalala ɗa kai.

³²A vada edi sek ɗa a luma maini wala meefeŋ ɵa, a yaka suku maiɗi maakai ɵa lai.

³³Arku aga a tala wala na ku talaŋ kaa duk kai, seŋ n’aga a cosi war hiiniku ɗa a na pini su kaalai.

³⁴Aga ku sɗa suku ɗa maini na ɓa ku na agoɗom war yem-ra n’abai waŋ, zaw amai merfeŋni luwuŋ na gaini pi tiɓ waŋ nɵa.

³⁵Aga ku hiina ɓa: Ɗai e ɵiɓiŋa, amma sa ɗa a fuɗa kai, e didibiŋa meefeŋ, amma mu sɗa wala ktai sa kai, mu faka amai na ɗa kaswa ta ki ɗi ɗa? Aga mu payasi sul zamai mu ca pra.